އޭއެސް/އޭލެވެލް އިމްތިހާނުގެ ހުރިހާ ޕޭޕަރެއް ލީކްވެއްޖެ
29 އެޕްރީލު 2021 | ބުރާސްފަތި 17:08ޕޭޕަރުތަކުގެ ކޮޕީ އެކި ވައިބަރ ގުރޫޕްތަކާއި ސޯޝަލް މީޑިއާ ފްލެޓްފޯމްތަކުގައި ދަނީ ދައުރުވަމުން
ސްކޫލް ދަރިވަރުން އިމްތިހާނު ހަދަނީ
މި އަހަރުގެ އޭއެސް/އޭލެވެލް އިމްތިހާނުގެ ހުރިހާ ޕޭޕަރެއް ލީކުވެއްޖެއެވެ.
އިތުބާރު ހުރި ފަރާތަކުން ރާއްޖެއެމްވީއަށް ބުނީ އޭއެސް/އޭލެވެލްގެ ހުރިހާ ޕޭޕަރެއް ލީކުވެފައިވާ ކަމަށާއި މި ޕޭޕަރުތަކުގެ ކޮޕީ އެކި ވައިބަރ ގުރޫޕްތަކާއި ސޯޝަލް މީޑިއާ ފްލެޓްފޯމްތަކުގައި ދައުރުވަމުންދާ ކަމަށެވެ.
ހުރިހާ ޕޭޕަރެއް ލީކުވެފައި މިވަނީ ފިޒިކްސް ޔުނިޓް-1 ޕޭޕަރު ލީކުވެ އެމައްސަލަ ބަލަމުންދަނިކޮށްށެވެ. ފިޒިކްސް ޔުނިޓް-1ގެ އިމްތިހާނު އޮތީ ބުރާސްފަތި ދުވަހުގެ މެންދުރުފަހު 2:00ގައެވެ.
މިކަމާއި ގުޅިގެން އެޑިޔުކޭޝަން މިނިސްޓްރީން ބުނީ ޕޭޕަރު ލީކުވިކަމުގެ މައުލޫމާތު ލިބިފައިވާ ކަމަށާއި ވަރަށް ސީރިއަސް މައްސަލައެއްގެ ގޮތުގައި މިކަން ކަންކަން ބަލަމުންދާ ކަމަށެވެ. ޕޭޕަރު ލީކުވެފައިވަނީ ރާއްޖޭގައި ކަމެއް ސާފެއް ނޫން ކަމަށާއި ބޮޑަށް ބެލެވެނީ ބޭރުގައި އެކަން ހިނގާފައިވާ ކަމަށެވެ. މިކަމާއި ގުޅޭ ގޮތުން ވަކި އިތުރު ތަފްސީލެއް އެޑިޔުކޭޝަން މިނިސްޓްރީން ދީފައި ނުވެއެވެ.
އޭއެސް/އޭލެވެލް އިމްތިހާނު ފަށާފައިވަނީ އޭޕްރީލް މަހުގެ 26 ވަނަ ދުވަހުއެވެ. މެއި/ޖޫންގައި ބޭއްވުމަށް ހަމަޖެހިފައިވާ އިމްތިހާނު އަވަސްވުމާއި ގުޅިގެން އޭރު އެޑިޔުކޭޝަން މިނިސްޓްރީން ބުނީ މި ނިންމުން ބަދަލު ކުރުމަށް އެ މިނިސްޓްރީ އާއި ޑިޕާޓްމެންޓް އޮފް ޕަބްލިކް އެގްޒެމިނޭޝަނުން އެޑެކްސެލްއާއެކު ގިނަ މަޝްވަރާތަކެއް ކުރިކަމަށެވެ. ނަމަވެސް މި މަޝްވަރާތަކުން އަލިމަގެއް ފެނިފައި ނުވާކަމަށް ވަނީ ބުނެފައެވެ.
އޭއެސް/އޭލެވެލް އިމްތިހާނު އޭޕްރީލް މަހަށް އަވަސްވުމުން މިއަހަރުގެ އެޗްއެސްސީ އިމްތިހާނު ބާއްވާނީ 13 ޖޫން 2021ގައި ކަމަށް އެޑިއުކޭޝަން މިނިސްޓްރީން ވަނީ ހާމަކޮށްފައެވެ.
