ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް)ގެ 2021 ވަނަ އަހަރުގެ ރިސާޗް ގްރާންޓަށް ކުރިމަތިލި ފަރާތްތަކަށް ރިސާޗް ގްރާންޓް ހަވާލުކޮށްފިއެވެ.

އައިޔޫއެމްގެ 2021 ވަނަ އަހަރުގެ ގްރާންޓް އެންޑް ފަންޑިންގ ސްކީމްގެ ގޮތުގައި މައިގަނޑު ދެ ދާއިރާއަކަށް ކުރިމަތިލުމަށް ފުރުސަތު ހުޅުވާލިއެވެ. އެއީ އައިޔޫއެމްގެ ރިސާޗް ޕްރޮމޯޝަން ސްކީމް އަދި އައިޔޫއެމް އިނޮވޭޝަން ޕްރޮޖެކްޓް ސްކީމްއެވެ.

ބުދަ ދުވަހުގެ ރޭ ޔުނިވާރސިޓީއިން ރަސްމީކޮށް މި ރިސާޗްތަކަށް ކުރިމަތިލި ފަރާތްތަކުގެ ތެރެއިން ގްރާންޓް ލިބޭ ފަރާތްތަކަށް އެކަމަށް ޚާއްސަ ރަސްމިއްޔާތެއްގައި ގްރާންޓް ހަވާލުކޮށްފައިވެއެވެ.

ޔުނިވާރސިޓީގެ ފަރާތުން މި ރިސާޗް ގްރާންޓް ރިސާޗް ޓީމްތަކާއި ހަވާލުކޮށްދެއްވީ ޔުނިވާރސިޓީގެ ވައިސް ޗާންސެލާރ ޑރ. އިބްރާހިމް ޒަކަރިއްޔާ މޫސާއެވެ. އަދި މި ރަސްމިއްޔާތުގައި ޔުނިވާރސިޓީގެ އެންމެހާ މުވައްޒަފުންނާއި ލެކްޗަރާއިން ބައިވެރިވެ ވަޑައިގެންނެވިއެވެ.

އައިޔޫއެމް ރިސާޗް ޕްރޮމޯޝަން ސްކީމްއަކީ އެކިދާއިރާތައް ހިމެނޭގޮތުން މުޖުތަމައަށް ފައިދާކުރާނެ ބޭނުންތެރި ދިރާސާތަކެއްގެ މަސައްކަތް ގުޅިގެން ކުރުމަށް މުވައްޒަފުންނަށް ހިތްވަރުދިނުމުގެ ގޮތުން ހުޅުވާލެވުނު ރިސާޗް ސްކީމެކެވެ. އަދި އައިޔޫއެމް އިނޮވޭޝަން ޕްރޮޖެކްޓް ސްކީމްގެ މައިގަނޑު ބޭނުމަކީ މުޖުތަމައަށް ފައިދާކުރާނެ އިލްމާއި، އައު ޚިޔާލުތަކާއި އިލްމީ އުފެއްދުންތައް ތައްޔާރުކުރުމާއި ޝާއިއުކުރުމަށް ޔުނިވަރސިޓީގެ މުވައްޒަފުންނަށާއި ދަރިވަރުންނަށް ހިތްވަރުދިނުމެވެ. އަދި ހަމަ އެހެންމެ، ފުޅާ ދާއިރާއެއްގައި ދިވެހި މުޖުތަމައަށް ހެޔޮ އަސަރުކުރާނޭ ފަދަ އައު އީޖާދުތަކާއި، ޚިޔާލުތަކާއި އުފެއްދުންތަކަށް މަގުފަހިކޮށްދިނުމަކީ މި ސްކީމުގެ މަގުސަދެވެ.

އައިޔޫއެމުން ބުނީ މި ގްރާންޓްތަކަށް ކުރިމަތިލުމަށް 11 ފެބްރުއަރީގެ ނިޔަލަށް ހުޅުވިގެންދިޔައިރު އެކިފަރާތްތަކުން މި ގްރާންޓް ސްކީމްތަކަށް ކުރިމަތިލާފައިވެއެވެ. އެގޮތުން ޔުނިވާރސިޓީގެ ސްކޯލާރޝިޕް އެންޑް ގްރާންޓް ކޮމެޓީގެ ފަރާތުން ހުށައަޅާފައިވާ ރިސާޗް ޕްރޮޕޯސަލްތައް ބަލައިގަނެ އިންޑިވިޖުއަލް ދެ ރިވިއުއާސްގެ ރިވިއުއަށް ފޮނުވައި ރިވިއުލިބުމުން ޕްރޮޕޯސަލްތަކާ މެދު މަޝްވަރާކުރިއެވެ.