އަންނަ ސީޒަނުން ފެށިގެން ޖަރުމަނުގެ އާރްބީ ލައިޕްޒީގުގެ ކޯޗުގެ މަގާމަށް ރެޑް ބުލްއިން ހިންގާ ދެވަނަ ކްލަބު ކަމަށްވާ އޮސްޓްރިއާގެ އާރްބީ ސާލްޒްބާގުގެ ކޯޗު ޖެސޭ މާޝް ހަމަޖައްސައިފިއެވެ.
ބުރާސްފަތި ދުވަހުގެ ވަގުތެއްގައި ލައިޕްޒީގުން ވަނީ އަންނަ ޖުލައި މަހުގެ އެއްވަނަ ދުވަހުން ފެށިގެން މާޝް އެ ޓީމާ ހަވާލުވާނެކަން ރަސްމީކޮށް އިއުލާންކޮށްފައެވެ. އަދި އަންނަ ސީޒަނުގައި ލައިޕްޒީގާއެކު މާޝް ދެ އަހަރުގެ އެއްބަސްވުމެއް ހަދާފައިވާ ކަމަށާއި، އެހެންކަމުން 2023 ވަނަ އަހަރުގެ ހޫނު މޫސުމުގެ ނިޔަލަށް މާޝް ލައިޕްޒީގަށް އިރުޝާދުދޭނެ ކަމަށްވެސް ވަނީ ބުނެފައެވެ.
އަންނަ ސީޒަނުގައި ލައިޕްޒީގުގެ ކޯޗަކަށް މާޝް ހަމަޖެއްސީ، މި ސީޒަނަށްފަހު ލައިޕްޒީގް ދޫކޮށްލަން އުމުރުން 33 އަހަރުގެ ހޫލިއަން ނާގަލްސްމަން ނިންމުމުންނެވެ. އޭނާ ލައިޕްޒީގް ދޫކޮށްލަން ނިންމީ އަންނަ ސީޒަނުން ފެށިގެން ޖަރުމަނުގެ ޗެމްޕިއަން ބަޔާން މިއުނިކުގެ ކޯޗުގެ މަގާމާ ހަވާލުވުމަށެވެ.
މިހާރު އުމުރުން 47 އަހަރުގެ މާޝް ރަސްމީކޮށް ކޯޗިންގެ މަސައްކަތް ފެށީ 2010 ވަނަ އަހަރު އެމެރިކާގެ ގައުމީ ޓީމުގެ އެސިސްޓެންޓް ކޯޗެއްގެ ގޮތުގައެވެ. އެއަށްފަހު އޭނާ އެންމެ ފުރަތަމަ އިރުޝާދުދީފައިވަނީ އެމެރިކާގެ މޭޖާ ލީގު ސޮކާ (އެމްއެލްއެސް) ގައި ކުޅެމުން އަންނަ ކެނެޑާގެ ކުލަބެއް ކަމަށްވާ މޮންޓެރެއާލް އިމްޕެކްޓަށެވެ. އަދި ފަހުން ނިއު ޔޯކް ރެޑް ބުލްސްއަށްވެސް އޭނާ ކޯޗުކަން ކޮށްދިންއިރު، ސާލްޒްބާގާ މާޝް ހަވާލުވީ 2019 ވަނަ އަހަރުގެ ޖޫން މަހުގެ ތެރޭގައެވެ.
މާޝްގެ އިރުޝާދުގެ ދަށުން މިހާތަނަށް ސާލްޒްބާގުން 89 މެޗެއް ކުޅެފައިވާއިރު، 59 މެޗުން އެ ޓީމު ވަނީ މޮޅުވެފައެވެ. އަދި މާޝްގެ ކޯޗުކަމުގައި ސާލްޒްބާގުން ވަނީ މިދިޔަ ސީޒަނުގެ އޮސްޓްރިއަން ބުންޑެސްލީގާ އާއި އޮސްޓްރިއަން ކަޕް ކާމިޔާބުކޮށްފައެވެ.
