ރާއްޖޭގެ އިގްތިސާދީ ސަރަހައްދުގައި މަސްވެރިކަންކުރަމުން ދިޔަ ބޭރުގެ ބޯޓުތަކެއް އަތުލައިގެންފި

ރާއްޖޭގެ އިގްތިސާދީ ސަރަޙައްދަށް ގަވާއިދާ ޚިލާފަށް ވަދެ މަސްވެރިކަން ކުރަމުން ފިޔަ ބޭރުގެ 5 ބޯޓެއް ސިފައިންގެ ބެލުމުގެ ދަށަށް ގެންގޮސްފިއެވެ.

މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފުން ބުނީ އެ ފަސް ބޯޓު އަތުލައިގަތީ، ކޯސްޓް ގާޑުގެ ބޯޓު ‘ހުރަވީ’ އިން ޕެޓްރޯލް ކުރުމުގެ ތެރޭގައި، މ. އަދި ވ. އަތޮޅާއި ދިމާ އިރުން ރާއްޖޭގެ ކަނޑުގެ ޙާއްސަ އިޤްތިސާދީ ސަރަޙައްދުގެ 30 ނޯޓިކަލް މޭލު އެތެރެއިން ކަމަށެވެ.

ބޯޓްތައް އެމްްއެންޑީއެފް ކޯސްޓްގާޑް ޝިޕް ހުރަވީއަށް ފެނުނުއިރު ބޯޓްތައް މަސްވެރިކަން ކުރުމަށް ހަރަކާތްތެރިވަމުން ގޮސްފައިވަނީ، ބޯޓްތައް މެދުގައި ވަކި ދުރުމިނެއް ބަހައްޓައިގެންކަމަށް އެމްއެންޑިއެފުން ބުނެއެވެ. މި ފަސް ބޯޓް، ކޯސްޓްގާޑް ޝިޕް ހުރަވީ ބެލުމުގެ ދަށަށް ގެނެވިފައިވަނީ ބުދަ ދުވަހުގެ ރޭ އިރާކޮޅު ކަމަށް އެމްއެންޑިއެފުން ބުނެއެވެ.

އެމްއެންޑީއެފުން ބުނީ މި ބޯޓްތައް މާލެ ގެނައުމަށްޓަކައި މިހާރު ދަތުރުކުރަމުން އަންނަކަމަށާއި، މާލެ އާދެވޭނެ ކަމަށް ލަފާކުރެވެނީ ބުރާސްފަތި ދުވަހުގެ މެންދުރުފަހުގެ ވަގުތެއްގައެވެ. މިއިން ކޮންމެ ބޯޓެއްގައި 6 މީހުން ތިބިކަމަށް މިހާތަނަށް މަޢުލޫމާތު ލިބިފައިވެއެވެ. މި ބޯޓްތަކުގެ މައްސަލަ ސަރުކާރުގެ ކަމާގުޅުންހުރި އިދާރާތަކާ ގުޅިގެން ދަނީ ތަޙުޤީޤު ކުރަމުން އަންނަ ކަމަށް އެމްއެންޑީއެފުން ބުނެއެވެ. މިއީ ކޮން ގައުމެއްގެ ބޯޓެއްކަން ދެނެގަތުމަށް މަސައްކަތްކުރަމުން އަންނަ ކަމަށެވެ.

މިދުވަސްވަރަކީ ރާއްޖޭގެ ސަރަހައްދުގައި މަސްވެރިކަން ރަނގަޅު ދުވަސްވެރެކެވެ.