ހޯމަ ދުވަހު ރާއްޖެއިން ވެކްސިން ޖެހީ 6،838 މީހުން
27 އެޕްރީލު 2021 | އަންގާރަ 21:18ރާއްޖެއިން ވެކްސިން ޖެހި މީހުންގެ އަދަދު 293،429ށް ވަނީ އަރާފައި
އައްޑޫގައި ވެކްސިން ދިނުމުގެ ޕްރޮގްރާމުގެ ތެރެއިން
ހޯމަ ދުވަހު 6،838 މީހުން ވެކްސިން ޖަހާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އެންމެ ފަހުން ނެރުނު ތަފާސްހިސާބުތައް ދައްކާ ގޮތުން ހޯމަ ދުވަހު ރާއްޖެއިން 6،838 މީހުން ކޮވިޑް-19 ގެ ވެކްސިން ޖަހާފައިވާއިރު، އޭގެ ތެރެއިން 1،016 މީހުން ޖަހާފައިވަނީ ވެކްސިންގެ ފުރަތަމަ ޑޯޒެވެ. އެއީ، މާލެ ސަރަހައްދުން ވެކްސިން ޖެހި 313 މީހުންނާއި އަތޮޅު ތެރެއިން ވެކްސިން ޖެހި 703 މީހުންނެވެ. ހޯމަ ދުވަހު 5،822 މީހުން ވެކްސިންގެ ދެވަނަ ޑޯޒު ޖަހާފައިވާއިރު އެއީ މާލެ ސަރަހައްދުން ވެކްސިން ޖެހި 2،780 މީހުންނާއި އަތޮޅު ތެރެއިން ވެކްސިން ޖެހި 3،042 މީހުންނެވެ.
މިއާއެކު ރާއްޖެއިން ވެކްސިން ޖެހި މީހުންގެ އަދަދު ވަނީ 293،429ށް އަރައިފައެވެ. އޭގެ ތެރެއިން 88،649 މީހުން ވަނީ ވެކްސިންގެ ދެވަނަ ޑޯޒު ޖަހައިފައެވެ.
މިދިޔަ ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިނޭޝަން ޕްރޮގްރާމް ކުރިއަށްގެންދާއިރު، ދެވަނަ ޑޯޒު ޖަހަން ފަށާފައި ވަނީ މި މަހު ކުރީކޮޅުއެވެ. ދެވަނަ ޑޯޒު ޖަހަނީ ކޮވިޝީލްޑް ވެކްސިންއާއި ސިނޮފަރމް ވެކްސިންގެއެވެ. ދެވަނަ ޑޯޒުޖަހަން ފެށުމާއެކު ވެކްސިން ކިއުތަކުގައި މައްސަލަ ދިމާވެ އެކަމުގެ ރަގަޅު އުސޫލެއް ނެތި ކަންބޮޑުވުންތައް އިތުރުވެފައިވާތީ އެކަން ހައްލުކޮށްދޭނެ ކަމަށް އެޗްޕީއޭއިން ބުނެފައިވެއެވެ.
މިހާރު ރާއްޖޭގައި ޖުމްލަ ތިން ވެކްސިނެއް އަންނަނީ ބޭނުންކުރަމުންނެވެ. އެއީ ކޮވިޝީލްޑް ވެކްސިނާއި ސިނޮފަރމް ވެކްސިން އަދި ފައިޒާ ވެކްސިނެވެ. އޭގެ ތެރެއިން މިވަގުތު އާންމުންނަށް ފުރަތަމަ ޑޯޒު ޖަހަނީ ސިނޮފަރމްގެ އެކަންޏެވެ. އަދި ފައިޒާ ވެކްސިން ދެނީ ވަކި ޚާއްސަ ހާލަތެއްގައި ތިބޭ މީހުންނަށެވެ. މިހާރު ދެވަނަ ޑޯޒު ޖަހަނީ ކޮވިޝީލްޑް އަދި ސިނޮފާމްގެއެވެ.
