މާލޭ ލީގު: ޓީސީ ބަލިކޮށް ގްރީން ސްޓްރީޓް ތިންވަނަ އަށް

މާލޭ ލީގުގައި ޓީސީ ސްޕޯޓްސް ކްލަބް ބަލިކޮށް ގްރީން ސްޓްރީޓް ޕޮއިންޓް ތާވަލުގެ ތިންވަނައަށް ޖެހިލައިފި އެވެ.

ހޯމަ ދުވަހު ހަވީރު ކުޅުނު މި މެޗު ޓީސީއާ ވާދަކޮށް ގްރީން ސްޓްރީޓުން މެޗު ކާމިޔާބުކުރީ 1-3 ގެ ނަތީޖާއަކުންނެވެ.

ގަލޮޅު ރަސްމީ ދަނޑުގައި ކުޅުނު މި މެޗު ފެށިގެން ތިންވަނަ މިނެޓުގައި ގްރީން އިން ވަނީ މެޗުގެ ލީޑު ނަގާފަ އެވެ. މި ލަނޑު އެޓީމަށް ކާމިޔާބުކޮށްދިނީ ސޮބުލް އެވެ.

މި ލަނޑަށްފަހުވެސް ގްރީން އިން ދިޔައީ ޓީސީގެ ގޯލަށް ނުރައްކާކޮށް ހަމަލާ އުފައްދަމުންނެވެ. މީގެއިތުރުން ޓީސީން ވެސް ވަނީ ގްރީންގެ ގޯލަށް ނުރައްކާކޮށްފައެއެވެ.

ގްރީން އިން މެޗުގެ ލީޑު ފުޅާކުރީ 45 ވަނަ މިނެޓުގައި ސޮބުލް ކާމިޔާބުކުރި ލަނޑުންނެވެ. މިއީ މެޗުގައި އޭނާ ކާމިޔާބުކުރި ދެވަނަ ލަނޑެވެ.

ފުރަތަމަ ހާފް ނިމުނީ 0-2 ގެ ނަތީޖާއިން ޓީސީގެ މައްޗަށް ގްރީން ކުރީގައި އޮވެގެންނެވެ.

ދެވަނަ ހާފް ފެށިގެންވެސް ގްރީން އިން ދިޔައީ ޓީސީގެ ގޯލަށް ނުރައްކާކުރަމުންނެވެ. އެގޮތުން އެޓީމަށް ވަނީ ލަނޑު ޖެހުމަށް ގިނަ ފުރުސަތުތައް ލިބި ބޭކާރުވެފައެވެ.

ޓީސީން މެޗުގެ ނަތީޖާ ފަރަގު ކުޑަކުރީ 71 ވަނަ މިނެޓޫގައި އިބްރާހިމް ވަހީދު ހަސަން ކާމިޔާބުކުރި ލަނޑުންނެވެ. އެހެންނަމަވެސް އޭގެ ނުވަ މިނެޓު ފަހުން ގްރީންގެ އިބްރާހިމް ރިޒުހާން ވަނީ އެޓީމަށް ދެވަނަ ފަހަރަށް ލީޑު ފުޅާކޮށްދީފައެވެ.

މި ނަތީޖާއާއެކު ޓީސީ އޮތީ ކުޅުނު ހަ މެޗުން ލިބުނު 10 ޕޮއިންޓާއެކު ޕޮއިންޓް ތާވަލުގެ ހަތަރުވަނައިގައެވެ. މެޗުން މޮލުވި ގްރީން ވަނީ 13 ޕޮއިންޓް ހަމަކޮށް ޕޮއިންޓް ތާވަލުގެ ތިންވަނައިގަ އެވެ.