މަޝްރޫއުތައް ކުރިއަށް ގެންދިއުމަށް ނިންމާފައިވަނީ ހުރިހާ ގިންތިއަކަށް ނިސްބަތް ވާނެހެން
"ވަން ސެންޓްރަލް ޕާކް” ހައުސިން ޔުނިޓްތަކުގެ ބިންގައު އެޅުމުގެ ރަސްމިއްޔާތުގައި މިނިސްޓަރު އަސްލަމް ވާހަކަފުޅު ދައްކަވަނީ
މި އަހަރުގެ ތެރޭގައި 5000 އަށްވުރެ ގިނަ ހައުސިން މަޝްރޫއުގެ އަމަލީ މަސައްކަތް ފެށުމަށް ސަރުކާރުން ނިންމާފައި ވާކަމަށް ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
"ވަން ސެންޓްރަލް ޕާކް” ހައުސިން ޔުނިޓްތަކުގެ ބިންގައު އެޅުމުގެ ރަސްމިއްޔާތުގައި ވާހަކަފުޅު ދައްކަވަމުން އަސްލަމް ވިދާޅުވީ، މާލޭގައި ބޯހިޔާވަހިކަން ބޭނުންވެފައިވާ 17000 އާއިލާ އެބަ ތިބިކަމަށެވެ. އޭގެ ތެރެއިން 5600 އާއިލާއަކީ ސީދާ މާލެއަށް ނިސްބަތްވާ އާއިލާތައް ކަން އަސްލަމް ފާހަގަކުރެއްވިއެވެ. އެހެންކަމުން މި ފެށުނު ވަން ސެންޓްރަލް ޕާކު މަޝްރޫއަކީ އޭގެ ތެރެއިން ކުޑަ މިންވަރެއް ކަމަށާއި މުސްތަގުބަލުގައި މިފަދަ ގިނަ މަޝްރޫއުތަކެއް ހިންގޭނެ ކަމަށް މިނިސްޓަރު ވިދާޅުވިއެވެ.
އަސްލަމް ވިދާޅުވީ ރާއްޖޭގެ އާބާދީއަކީ އެކި ފަންތިތަކަށް ބެހިފައިވާ އާބާދީއެއް ކަމަށެވެ. އޭގެތެރެއިން ބޯހިޔާވަހިކަން ބޭނުންވާ މީހުން ނިސްބަތްވަނީ އެންމެ ގިންތިއަކަށް ނޫންކަމަށެވެ. އެހެން ކަމުން ސަރުކާރުން މަޝްރޫއުތައް ކުރިއަށް ގެންދިއުމަށް ނިންމާފައިވަނީ މިހުރިހާ ގިންތިއަކަށް ނިސްބަތް ވާނެހެން އެކިއެކި ކެޓެގަރީތަކަށް ބަހާލައިގެން ކަމަށް މިނިސްޓަރު ވިދާޅުވިއެވެ.
"ވަން ސެންޓްރަލް ޕާކް" ގެ ބިންގާ އަޅުއްވައިދެއްވީ ހައުސިން މިނިސްޓަރު މުހައްމަދު އަސްލަމާއި ސްޓޭޓް މިނިސްޓަރު އަކްރަމް ކަމާލުއްދީނާއި އެޗްޑީސީގެ މެނޭޖިން ޑިރެކްޓަރު ސުހައިލް އަހުމަދާއި ސެންޑަލް މޮރިޝަސް- އަސޯޓެކް ގްރޫޕްގެ މެނޭޖިން ޑިރެކްޓަރު ނީރަޖް ގުލާޓީ އެވެ.
މި އެޕާޓްމަންޓްތައް ހެދުމުގެ އެއްބަސްވުމުގައި އިންޑިއާގެ ސެންޑަލް މޮރިޝަސް ކުންފުންޏާއެކު ދިވެހި ސަރުކާރުން ސޮއިކޮށްފައިވަނީ 19 މާރޗު 2015 ގައެވެ. އެހެން ނަމަވެސް މި މަޝްރޫއުގެ ދަށުން ފްލެޓް އަޅާނެ ދެ ބިން އެ ކުންފުންޏާއި ހަވާލުކޮށްފައިވަނީ 2020 ވަނަ އަހަރުގެ އޮކްޓޯބަރު މަހުގެ 8 ވަނަ ދުވަހުއެވެ. މި މަޝްރޫއުގެ މަސައްކަތް ކުރިއަށް ގެންދިޔުމަށް ސެންޑަލް މޮރިޝަސްއިން ހަވާލުކޮށްފައިވަނީ ރަޝީދް ކާޕެންޓްރީ އެން ކޮންސްޓްރަކްޝަން (އާރްސީއެންސީ) އާއެވެ.
މިއީ މެދުފަންތީގެ އާމްދަނީއެއް ލިބޭ އާއިލާތަކަށް ބޯހިޔާވަހިކަން ފޯރުކޮށްދިނުމަށް ސަރުކާރުން ހިންގާ މަޝްރޫއެކެވެ. މި މަޝްރޫއުގެ ދަށުން 120 ހައުސިން ޔުނިޓް އެޅުމަށް ނިންމާފައިވެއެވެ.
