އިންތިހާބުގެ ދާއިމީ ނަތީޖާ: އެމްޑީޕީން 400 ގޮނޑިއާއެކު މެޖޯރިޓީ ނަގައިފި
އެމްޑީޕީއަށް ލިބުނީ 43 އިންސައްތަ އަދި ޕީޕީއެމަށް ލިބުނީ 34.9 އިންސައްތަ
ލޯކަލް ކައުންސިލް އިންތިޚާބު 2020ގެ ތެރެއިން
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި އެމްޑީޕީން 400 ގޮނޑި ކާމިޔާބުކޮށް މެޖޯރިޓީ ނަގައިފިއެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ރަސްމީ ނަތީޖައްތައް ދައްކާ ގޮތުން އެމްޑީޕީން 400 ގޮނޑި ކާމިޔާބުކޮށްފައިވާ އިރު، އިދިކޮޅު ޕީޕީއެމުން ކާމިޔާބުކުރީ 325 ގޮނޑިއެވެ. އިންސައްތައިން ބަލާނަމަ އެމްޑީޕީއަށް ލިބުނީ 43 އިންސައްތައެވެ. އަދި ޕީޕީއެމަށް ލިބުނީ 34.9 އިންސައްތައެވެ.
އިންތިހާބުގެ ދާއިމީ ނަތީޖާ އިއުލާންކުރުމަށް ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ ކައުންސިލްތަކުގެ 975 ގޮނޑިއަކަށް މީހުން އިންތިހާބުކޮށްފައިވާ ކަމަށެވެ. އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި 905 މަގާމަކަށް މީހުން އިންތިހާބުކުރެވިފައިވާ ކަމަށެވެ.
ޝަރީފް ވިދާޅުވީ އެމްޑީޕީން މެޖޯރިޓީ ނަގާފައިވީ ނަމަވެސް، އެ ޕާޓީން ވާދަކުރި 894 ކެނޑިޑޭޓުންގެ ތެރެއިން ކާމިޔާބުވީ 400 ކެންޑިޑޭޓުންނަށް ކަމަށެވެ. އަދި އިދިކޮޅު ޕީޕީއެމުން 646 ކެންޑިޑޭޓުން ވާދަކުރި އިރު އެ ޕާޓީން ކާމިޔާބުކޮށްފައިވަނީ 325 ކެންޑިޑޭޓުން ކަމަށެވެ.
3 މޭޔަރުން
ސިޓީ ކައުންސިލްގެ 18 ގޮނޑި
އަތޮޅު ކައުންސިލް ރައީސުންގެ 11 ގޮނޑި
ރަށު ކައުންސިލްތަކުގެ 71 ގޮނޑި
ކައުންސިލް މެމްބަރުންގެ 155 ގޮނޑި
އަންހެނުންނަށް ހާއްސަކޮށްފައިވާ 142 ގޮނޑި
މޭޔަރު (މާލެ ސިޓީ)
ސިޓީ ކައުންސިލްގެ 16 ގޮނޑި
އަތޮޅު ކައުންސިލް ރައީސުންގެ 7 ގޮނޑި
ކައުންސިލްގެ ރައީސުންގެ 51 ގޮނޑި
ކައުންސިލް މެމްބަރުންގެ 121 ގޮނޑި
އަންހެނުންނަށް ހާއްސަކޮށްފައިވާ 129 ގޮނޑި
މީގެ އިތުރުން އިންތިހާބުގައި ވާދަކުރި ކުދި ޕާޓީތަކުގެ ތެރެއިން ޖުމްހޫރީ ޕާޓީން 115 ކެންޑިޑޭޓުން ވާދަކޮށް ކާމިޔާބު ލިބުނީ 23 ކެންޑިޑެޓުންނަށެވެ. މީގެ އިތުރުން އަދާލަތު ޕާޓީން 28 ކެންޑިޑޭޓުން ވާދަކޮށް 11 ކެންޑިޑޭޓުން ކާމިޔާބުކޮށްފައިވާއިރު އެމްޑީއޭއިން 20 ކެންޑިޑޭޓުން ވާދަކޮށް 16 ކެންޑިޑޭޓުން ވަނީ ކާމިޔާބު ހޯދާފައެވެ. އަމިއްލަ ގޮތުން ވާދަކުރި 600 ކެންޑިޑޭޓުންގެ ތެރެއިން އިންތިހާބުވީ 173 ކެންޑިޑޭޓުންނެވެ.
މި މަހުގެ 10 ވަނަ ދުވަހު ބޭއްވި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި 3814 ކެންޑިޑޭޓުން ވާދަކޮށްފައިވެއެވެ. މީގެ ތެރެއިން ކައުންސިލްތަކަށް ވާދަކުރީ 982 ކެންޑިޑޭޓުންނެވެ. އަދި އަންހެނުންގެ ތަރައްގީއަށް މަސައްކަޔް ކުރާ ކޮމިޓީގެ އިންތިހާބުގައި 930 ކެ ކެންޑިޑޭޓުން ވާދަކުރިއެވެ. ޖުމްލަ 1912 ކެންޑިޑޭޓުން އިންތިހާބު ކުރަން ނިންމި ނަމަވެސް، މައްސަލަ ޖެހުނު 3 ވޯޓު ފޮއްޓަކާއި ނަތީޖާ އެއްވަރުވެގެން ބައެއް ދާއިރާތަކާއި ރަށްރަށުގައި އަލުން އިންތިހާބު ބޭއްވުމަށް އިލެކްޝަންސް ކޮމިޝަނުން ވަނީ ނިންމާފައެވެ.
