އިންތިޚާބުގެ މައްސަލައިގައި ކޯޓަށް ނުދާން އެމްޑީޕީން ނިންމައިފި
މާލޭގެ ހަ ދާއިރާއެއްގެ ވޯޓު ފޮށިތައް އަލުން ގުނުމަށް އެމްޑީޕީން ވަނީ އީސީގައި އެދިފައި
އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމުގައި ރައީސް ސޯލިހު (މ) ރައީސް ނަޝީދު (ކ) އަދި ޕާޓީގެ ޗެއަރޕާސަން ހަސަން ލަތީފް (ވ) ބައިވެރިވެވަޑައިގަންނަވަނީ
ނިމިގެންދިޔަ ލޯކަލް ކައުންސިލް އިންތިޚާބުގެ ނަތީޖާ އާއި ގުޅިގެން އެއްވެސް މައްސަލައެއްގައި ކޯޓަށް ނުދާން އެމްޑީޕީގެ ގައުމީ މަޖިލީހުން ނިންމައިފިއެވެ.
މާލޭގެ ހަ ދާއިރާއެއްގެ ދެ ކެންޑިޑޭޓުންގެ ފަރަގަށް ވުރެ ބާތިލް ވޯޓު ގިނަ ކަމަށް ބުނެ އެމްޑީޕީން ވަނީ އެ ދާއިރާތަކުގެ ވޯޓު އަލުން ގުނައިދިނުމަށް އިލެކްޝަންސް ކޮމިޝަން (އީސީ) ގައި އެދިފައެވެ. އަދި ބައެއް ގޮނޑިތަކުގެ މައްސަލައިގައި ކޯޓަށް ދާން ނިންމާފައިވާ ކަމަށްވެސް އެމްޑީޕީން ކުރިން ބުނެފައިވެއެވެ.
ލޯކަލް ކައުންސިލް އިންތިޚާބާއި ގުޅޭ މައްސަލަތައް ކޯޓަށް ހުށައެޅުމާއިމެދު ގޮތެއް ނިންމުމަށް ބޭއްވި ގައުމީ މަޖިލީހުގެ ބައްދަލުވުމުގައި ނިންމާފައިވަނީ އިންތިޚާބާއި ގުޅޭ އެއްވެސް މައްސަލައެއްގައި ކޯޓަށް ނުދިޔަމަށެވެ. އެމްޑީޕީގެ ގައުމީ މަޖިލީހުގެ ބައްދަލުވުމުގައި މިގޮތަށް ނިންމާފައިވާއިރު މިބައްދަލުވުމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި އެމްޑީޕީގެ ރައީސް މުހައްމަދު ނަޝީދު ބައިވެރިވެވަޑައިގެންނެވިއެވެ.
އެމްޑީޕީގެ އަސާސީ ގަވާއިދުގެ ދަށުން އުފައްދާފައިވާ ގައުމީ ހިންގާ ކޮމިތީގައި ތިއްބަވަނީ ރައީސާއި ޕާޓީގެ ލީޑަޝިޕާއި ކެބިނެޓް އަދި މަޖިލީހުގެ މެމްބަރުންނެވެ.
އެމްޑީޕީން އިލެކްޝަނަށް ޝަކުވާ ހުށަހެޅި ފޮށިތަކުގެ ތެރޭގައި ހިމެނެނީ، T03 (މެދުހެންވޭރު ދާއިރާ)، T04 (ހެންވޭރު ދެކުނު ދާއިރާ)، T05(ހެންވޭރު ހުޅަނދު ދާއިރާ)، T10 (މައްޗަންގޯޅި އުތުރު ދާއިރާ)، T14 (މާފަންނު އުތުރު ދާއިރާ)، T16 (މާފަންނު ހުޅަނގު ދާއިރާ) އެވެ.
އެ ފޮށިތަކުގެ އިތުރުން، ބާތިލް ވޯޓާއި ގުޅޭ ގޮތުން ދިރާސާތަކެއްކޮށް ޖުމްލަ ހުށަހެޅުމެއް ހުށަހަޅާފައި ވާކަމަށް އެމްޑީޕީން ކުރިން ބުނެފައިވެއެވެ. އެގޮތުން، އިންތިޚާބު ކާމިޔާބުކުރި ކެންޑިޑޭޓާއި އެމްޑީޕީގެ ކެންޑިޑޭޓާ ދެމެދު ހުރި ވޯޓުގެ ފަރަގަށް ވުރެ، ބާތިލު ވޯޓުގެ އަދަދު އިތުރުކަން ފާހަގަކުރެވިފައިވާކަމަށް ވިދާޅުވެފައިވެއެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބު މި މަހުގެ 10 ވަނަ ދުވަހު ބާއްވާފައިވާ އިރު، މީގެ ކުރީގެ އިންތިހާބުތަކާއި ހިލާފަށް އެމްޑީޕީއަށް މިފަހަރު ވަނީ ސުޕަރމެޖޯރިޓީ ގެއްލިފައެވެ.
