ޓީމު ދެނެގަތުމުގައި ގޯސްތަކެއް ހެދުނު: މޯހަން

އެންމެ ފަހުން ޔުނައިޓެޑް ވިކްޓަރީ (ޔޫވީ) އަތުން ބަލިވި މެޗުގައި، އޭނާއަށް ޓީމު ދެނެގަތުމުގައި ގޯސްތަކެއް ހެދުނު ކަމަށް ސުޕަ ޔުނައިޓެޑް ސްޕޯޓްސް (ސަސް) ގެ ކޯޗު މުޙައްމަދު ޝިޔާޒް (މޯހަން) ބުނެފިއެވެ.

ދިރާގު ދިވެހި ޕްރިމިއާ ލީގުގައި އެންމެ ފަހުން ކުޅުނު މެޗުން އޭރު ލީގު ތާވަލުގެ ފުލުގައި އޮތް ޔޫވީ އަތުން 5-1 ގެ ނަތީޖާއަކުން ސަސް ވަނީ ބަލިވެފައެވެ. އެ މެޗަށްފަހު މޯހަން ވަނީ ސަސްގެ ކުޅުންތެރިންގެ އެޓިޓިއުޑް ބަދަލުނުވެއްޖެނަމަ، މި ސީޒަނުގެ ރެލިގޭޝަނުގައި އެ ޓީމު ކުޅެން ޖެހޭނެ ކަމަށް ބުނެފައެވެ.

ލީގުގައި ހުކުރު ދުވަހުގެރޭ ދަ ގްރާންޑޭ ސްޕޯޓްސް ކުލަބާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މޯހަން ބުނީ ޔޫވީ މެޗުގައި ޓީމު ރޭވުމުގައި އޭނާއަށް ގޯސްތަކެއް ހެދުނު ކަމަށެވެ. އަދި އެ ކަމަށް ވިސްނައިގެން ދެން ހުރި މެޗުތަކުގައި ކުރިއަށްދާނެ ކަމަށް މޯހަން ބުންޏެވެ. މޯހަން ބުނީ އޭނާއަށް ދިމާވި އަނެއް މައްސަލައަކީ މީގެ ކުރިން އޭނާ ގެންގުޅެފައި ހުރި ޓީމުތަކާ އަޅާބަލާއިރު، ޓެކްނިކަލީ ސަސްގެ ހުރިހާ ކުޅުންތެރިން އެ ފެންވަރަށް ދިޔަ ކަމަށް މާ އަވަހަށް ހީކުރެވުން ކަމަށެވެ. އެހެންކަމުން ކުރިއަށް ހުރި މެޗުތަކުގައި އެންމެ ފަހުން ކުޅުނު މެޗުގައި ދިމާވި ކަންކަން ތަކުރާރު ނުވޭތޯ ކުރެވެން ހުރި މަސައްކަތެއް ކުރާނެ ކަމަށްވެސް ބުންޏެވެ.

ދަ ގްރާންޑޭ އޮތް ހާލަތާ ބެހޭ ގޮތުން މޯހަން ބުނީ މި މެޗަށް ސަސްއިން ނުކުންނާނީ ދަ ގްރާންޑޭ މި ވަގުތު އޮތް ފޯމަށް ބަލައިގެން ނޫން ކަމަށާއި، މި މެޗަށް ސަސް ނުކުންނާނީ ދަ ގްރާންޑޭގެ ފޯމު ރަނގަޅުވެފައިވާ ކަމަށް ބަލައި، އެ ކަމަށް ތައްޔާރުވެގެން ކަމަށެވެ.

ސަސްއާ ދެކޮޅަށް ދަ ގްރާންޑޭ ނުކުންނައިރު، ލީގުގައި އެންމެ ފަހުން ކުޅުނު ތިން މެޗުންވެސް ދަ ގްރާންޑޭ ވަނީ ބަލިވެފައެވެ. ސަސް މެޗުގެ ކުރިން ދަ ގްރާންޑޭގެ ކޯޗު އިސްމާޢީލް މަހަފޫޒް (އިންމަ) ބުނީ ދެވަނަ ބުރު ފަށައިގެން އެ ޓީމު ތެރޭގައި މައްސަލަތަކެއް ހުރި ކަމަށާއި، އެކަމަކު މި މެޗަށް ނުކުންނައިރު ޓީމުގެ އެތެރޭގައި ޖެހިފައި ހުރި މައްސަލަތައް ހައްލުކޮށްފައިވާ ކަމަށެވެ.

އިންމަ ބުނީ ކުރިން ކުޅުނު މެޗުތަކުގައި ޓީމުގެ ފަރާތުން ފެނިގެންދިޔަ ދަށް ކުޅުން ބަދަލުކުރަން މަސައްކަތްކުރާނެ ކަމަށާއި، ސަސް މެޗުން ތިން ޕޮއިންޓް ހޯދުން އެއީ މި ވަގުތައް ވަރަށް މުހިިންމު ކަމެއް ކަމަށެވެ. އަދި ސަސް މެޗުން މޮޅެއް ބޭނުންވަނީ ދެވަނަ ބުރު މޮޅަކާއެކު ނިންމާލައި، ކޮންފިޑެންސް އާކުރުމަށް ކަމަށްވެސް އިންމަ ބުންޏެވެ.

އިންމަ އިިތުރަށް ބުނީ ޓީމަށް މި ވަގުތު އެ ޓީމަށް ދިމާވެފައިވާ އެންމެ ބޮޑު މައްސަލައަކީ ލަނޑު ޖެހުމުގެ މައްސަލަ ކަމަށާއި، އެހެންނަމެވެސް ކުރިއަށް ހުރި މެޗުތަކުގައި އެކަން ރަނގަޅުކުރާނެ ކަމަށެވެ. އަދި ލީގުގެ ދެވަނަ ބުރުގައި ދަ ގްރާންޑޭއިން ދަށް ނަތީޖާތަކެއް ނެރުނުކަމުގައި ވިޔަސް، އެ ޓީމަށް އެއްވެސް ޕްރެޝަރެއް ނެތް ކަމަށްވެސް ބުންޏެވެ.

ސަސްއާ ދެކޮޅަށް ދަ ގްރާންޑޭ ނުކުންނައިރު، އެ ޓީމު އޮތީ ތާވަލުގެ ހަތަރުވަނައިގައި ކުޅުނު 13 މެޗުން 16 ޕޮއިންޓް ހޯދައިގެންނެވެ. އަދި މި މެޗަށް ނުކުންނައިރު ތާވަލުގެ ފުލަށް ސަސް ވަނީ ވެއްޓިފައެވެ. އެގޮތުން 13 މެޗުން ސަސްއަށް 12 ޕޮއިންޓް ލިބިފައިވާއިރު، ހަތްވަނައަށް ޖެހިލި ޔޫވީއަށް ވަނީ 14 މެޗުން 12 ޕޮއިންޓް ލިބިފައެވެ. އެހެންކަމުން ދަ ގްރާންޑޭ ބަލިކޮށްގެން ކޮށްގެން ތާވަލުގެ ފަސްވަނައަށް އެރުމުގެ ފުރުސަތު ސަސްއަށް އެބައޮތެވެ.

ދިރާގު ދިވެހި ޕްރިމިއާ ލީގުގައި ދަ ގްރާންޑޭ އާއި ސަސް ބައްދަލުކުރާ މެޗު ފަށާނީ ހުކުރު ދުވަހުގެރޭ 22:00 ގައެވެ.