އިނގިރޭސި ޕްރިމިއާ ލީގުގައި ބުދަ ދުވަހުގެރޭ އެސްޓަން ވިލާ ބަލިކޮށް ލީގު ޗެމްޕިއަންކަން ހޯދުމާ ގާތަށް މެންޗެސްޓާ ސިޓީ ޖެހިލައިފިއެވެ.

ރަށުން ބޭރުގައި ކުޅުނު މެޗުން ސިޓީ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ވަރަށް ކުރީކޮޅު ވިލާއިން ވަނީ ލީޑު ނަގާފައެވެ. މެޗު ފަށައިގެން 20 ސިކުންތު ތެރޭގައި މި ލަނޑު އެ ޓީމަށް ކާމިޔާބުކޮށްދިނީ އޮލީ ވަޓްކިންސްއެވެ. އެކަމަކު އޭގެ ފަހުން ސިޓީން ކުޅުން ރަނގަޅުކުރިއިރު، މެޗުގެ 22 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ފިލް ފޯޑެންނެވެ. އަދި މެޗުގެ 39 ވަނަ މިނެޓުގައި ރޮޑްރީ ވަނީ ލަނޑެއް ޖަހައި، ސިޓީ ކޮޅަށް ނަތީޖާ އަނބުރާލާފައެވެ.

އޭގެ ފަހުން ފުރަތަމަ ހާފު ނިމެން މިނެޓަކަށް ވެފައި ވަނިކޮށް ވިލާގެ ޖޭކަބް މާފީއަށް ކުރި ނުރައްކާތެރި ފައުލަކާ ގުޅިގެން ސިޓީގެ ޖޯން ސްޓޯންސްއަށް ވަނީ ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ސީދާ ރަތް ކާޑެއް ދައްކާފައެވެ. އަދި ދެވަނަ ހާފު ފަށައިގެން 12 ވަނަ މިނެޓުގައި ވިލާގެ މެޓީ ކޭޝްއަށް ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ. އެހެންކަމުން ދެ ޓީމުންވެސް މި މެޗު ނިންމާލަން ޖެހުނީ އެއް ކުޅުންތެރިއަކު މަދުކޮށެވެ.

މި މޮޅާއެކު ލީގު ހޯދުމާ ގާތަށް ސިޓީ ޖެހިލިއިރު، އެ ޓީމު އެއްވަނައިގައި އޮތީ ކުޅުނު 33 މެޗުން ލިބުނު 77 ޕޮއިންޓާއެކުއެވެ. ދެވަނައިގައި އޮތް މެންޗެސްޓާ ޔުނައިޓެޑަށް 32 މެޗުން 66 ޕޮއިންޓް ލިބިފައިވާއިރު، ލީގުގެ ޗެމްޕިއަންކަން ހޯދަން ސިޓީއަށް ބާކީ އޮތް ފަސް މެޗުން ބޭނުންވަނީ އަށް ޕޮއިންޓެވެ.

މީގެ އިތުރުން ދާދި ފަހުން ޓޮޓެންހަމުގެ ކޯޗަކަށް ހަމަޖެއްސި އުމުރުން 29 އަހަރުގެ ރަޔާން މޭސަން ރިކޯޑެއް ހެދީ ބުދަ ދުވަހުގެރޭ ސަައުތެމްޓަން އަތުން ފަހަތުން އަރައި 2-1 ގެ ނަތީޖާއަކުން މޮޅުވެގެންނެވެ.

މި ސީޒަނުގެ ނިޔަލަށް ޓޮޓެންހަމުގެ ކޯޗަކަށް މޭސަން ހަމަޖެއްސީ، މިދިޔަ ހޯމަ ދުވަހު އެ ޓީމުގެ ކޯޗުގެ މަގާމުން ހޯސޭ މޮރީނިއޯ ވަކިކުރުމަށްފަހުއެވެ. އެއާއެކު މޭސަންގެ އިރުޝާދުގެ ދަށުން ކުޅުނު ފުރަތަމަ މެޗުން ޓޮޓެންހަމް މޮޅުވިއިރު، މޭސަން ވެފައިވަނީ ޕްރިމިއާ ލީގުގައި މޮޅެއް ހޯދި އެންމެ ޒުވާން ކޯޗަށެވެ.

ޓޮޓެންހަމުގައި ދަނޑުގައި ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ސަައުތެމްޓަނުންނެވެ. މެޗުގެ 30 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޑެނީ އިންގްސްއެވެ. އެކަމަކު މެޗުގެ 60 ވަނަ މިނެޓުގައި ގެރެތު ބޭލް ވަނީ ޓޮޓެންހަމަށް ނަތީޖާ އެއްވަރުކޮށްދީފައެވެ،

އޭގެ ފަހުން މެޗުގެ 75 ވަނަ މިނެޓުގައި ސޮން ހުއެން-މިން ޓޮޓެންހަމަށް ލަނޑެއް ޖަހައިދިން ނަމަވެސް، އޭގެ ކުރިން ބޭލް އޮފްސައިޑުގައި ހުރުމުން ވީއޭއާރުން އެ ލަނޑު ބަލައިގެންފައެއް ނުވެއެވެ. އެކަމަކު މެޗުގެ އިތުރު ވަގުތުގައި ލިބުނު ޕެނަލްޓީއަކުން ސޮން ވަނީ ޓޮޓެމްހަމަށް ލީޑު ނަގައިދީފައެވެ. މިއީ އޭރިއާ ތެރެއިން ޓޮޓެންހަމުގެ ސާޖިއޯ ރެގީލޯނަށް ސައުތެމްޓަނުގެ މޫސާ ޖެނެޕޯ ކުރި ފައުލަކަށް ދިން ޕެނަލްޓީއެކެވެ.

މި މޮޅާއެކު ތާވަލުގެ ހަވަނައަށް ޓޮޓެންހަމް ޖެހިލިއިރު، އެ ޓީމަށް ކުޅުނު 33 މެޗުން ވަނީ 53 ޕޮއިންޓް ލިބިފައެވެ. އަދި ތާވަލުގެ ހަތްވަނައަށް ވެއްޓުނު ލިވަޕޫލަށްވެސް 53 ޕޮއިންޓް ލިބިފައިވާއިރު، އެ ޓީމު ކުޅެފައިވަނީ 32 މެޗެވެ.