އިޓާލިއަން ލީގުގައި އާދީއްތަ ދުވަހު ކުޅުނު މެޗުން ޖެނޯއާ އަތުން ހަނި ގޮތަކަށް އޭސީ މިލާން މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން މިލާން މޮޅުވީ 2-1 ގެ ނަތީޖާއަކުންނެވެ.

މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ މިލާނުންނެވެ. އެގޮތުން މެޗުގެ 13 ވަނަ މިނެޓުގައި އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ އަންޓެ ރެބިޗެވެ. އަދި އޭގެ ފަހުން ލީޑު ފުޅާކުރަން މިލާނުގެ ރަފައެލް ލެއާއޯ ވަނީ ރަނގަޅު ފުރުޞަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން އޭނާ ފޮނުވާލި ހަމަލާ ޖެނޯއާގެ ގޯލްކީޕަރު ވަނީ ދިފާއުކޮށްފައެވެ. އެއާއެކު މެޗުގެ ފުރަތަމަ ހާފު ނިމުމުގެ ކުރިން ޖެނޯއާއިން ވަނީ ނަތީޖާ އެއްވަރުކޮށްފައެވެ. މެޗުގެ 37 ވަނަ މިނެޓުގައި ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ މަޓިއާ ޑެސްޓްރޯއެވެ.

އޭގެ ފަހުން މެޗުގެ ދެވަނަ ހާފުގައި އަލުން ލީޑު ނަގަން މިލާނުގެ ރެބިޗަށް ވަނީ ހުސް ފުރުޞަތެއް ލިބި ބޭކާރުވެފައެވެ. އެގޮތުން އޭރިއާ ތެރެއިން އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. އެކަމަކު މެޗުގެ 68 ވަނަ މިނެޓުގައި މިލާނުން ވަނީ މި މެޗުގައި އަލުން ލީޑު ނަގާފައެވެ. މި ލަނޑަކީ ޖެނޯއާގެ ޖިއަންލޫކާ ސްކަމައްކާ އަތުން ބައިކޮޅަށް ވަން ލަނޑެކެވެ.

މި މޮޅާއެކު މިލާން އޮތީ ތާވަލުގެ ދެވަނައިގައި ކުޅުނު 31 މެޗުން ލިބުނު 66 ޕޮއިންޓާއެކުއެވެ. ތާވަލުގެ އެއްވަނައިގައި އޮތް އިންޓަ މިލާނަށް 30 މެޗުން 74 ޕޮއިންޓް ލިބިފައިވާއިރު، ތިންވަނައިގައި އޮތް އެންމެ ފަހުގެ ޗެމްޕިއަން ޔުވެންޓަސްއަށް 30 މެޗުން ލިބިފައިވަނީ 62 ޕޮއިންޓެވެ. މީގެ އިތުރުން މިލާން އަތުން ބަލިވި ޖެނޯއާ އޮތީ ތާވަލުގެ 13 ވަނައިގައި 31 މެޗުން 32 ޕޮއިންޓާއެކުއެވެ.