ދެ ދުވަސްތެރޭގައި 33 ޤައުމެއްގެ މަންދޫބުންނާ މިނިސްޓަރ ޝާހިދު ބައްދަލުކުރައްވައިފި
މި 33 ބޭފުޅުންނާ އެމަނިކުފާނު ބައްދަލުކުރައްވާފައިވަނީ އޭޕްރީލް 15 އަދި 16 ވަނަ ދުވަހު
ފޮރިން މިނިސްޓަރ ޝާހިދު އިންޑިއާއަށް ކުރައްވާ ދަތުރުފުޅުގެ ތެރެއިން
މިނިސްޓަރ އޮފް ފޮރިން އެފެއަރޒް ޢަބްދުﷲ ޝާހިދު އިންޑިއާގެ ވެރިރަށް ނިއުދިއްލީއަށް ކުރައްވަމުން ގެންދަވާ ދަތުރުފުޅުގެ ތެރެއިން، 33 ޤައުމެއްގެ މަންދޫބުންނާ ބައްދަލުކުރައްވައިފިއެވެ.
މި 33 ބޭފުޅުންނާ އެމަނިކުފާނު ބައްދަލުކުރައްވާފައިވަނީ އޭޕްރީލް 15 އަދި 16 ވަނަ ދުވަހު ބޭއްވި އެކި ބައްދަލުވުންތަކުގައެވެ. އެގޮތުން މިނިސްޓަރ ޝާހިދު އޭޕްރީލް 15 ވަނަ ދުވަހު ވަނީ، އޮސްޓްރިއާ، ބެލްޖިއަމް، ސައިޕްރަސް، އަޔަލޭންޑް، މާލްޓާ، ސްވިޑަންގެ މަންދޫބުންނާއި ބައްދަލުކުރައްވާފައެވެ. މީގެ އިތުރުން ޑެންމާކް، އައިސްލޭންޑް އަދި ޕޯޗްގަލްގެ ސަފީރުންނާވެސް މިނިސްޓަރ ޝާހިދު ބުރާސްފަތި ދުވަހު ބައްދަލުކުރެއްވިއެވެ. މިނިސްޓަރ ޝާހިދު އޭޕްރީލް 16 ވަނަ ދުވަހު ވަނީ، ބަހްރެއިން، ތުރުކީ، އާޖެންޓީނާ، އަޒަރްބައިޖާން، މެކްސިކޯ، ޕެރޫ، އަދި އޮމާންގެ ސަފީރުންނާ ބައްދަލުކުރައްވާފައެވެ.
ދިއްލީގައި ތިއްބަވާ 33 ޤައުމެއްގެ ސަފީރުންނާއި މަންދޫބުންނާއެކު ބޭއްވެވި މި ބައްދަލުވުންތަކުގައި މިނިސްޓަރ ޝާހިދު ވަނީ ކޮވިޑް-19ން ރައްކާތެރިވުމަށް ކުރެވޭ މަސައްކަތްތަކާއި، ވެކްސިނޭޝަންގެ އިތުރުން ދޭދޭ ޤައުމުތަކާއެކު އޮންނަ ގުޅުމާ ބެހޭ ގޮތުން މަޝްވަރާކުރައްވާފައެވެ. މީގެ އިތުރުން ބައިނަލްއަޤްވާމީ މަސްރަހުގައި އެކުގައި މަސައްކަތްކުރުމާ ގުޅޭގޮތުން މަންދޫބުންނާއެކު މަޝްވަރާކުރެއްވިއެވެ. މީގެ އިތުރުން ދިއްލީގައި ހުންނަވައިގެން ފަރަންސޭސިވިލާތާއި ސްރީލަންކާގެ ޚާރިޖީ ވަޒިރުންނާ ފޯނުން ގުޅުއްވައި، މިނިސްޓަރ ޝާހިދު ވަނީ މަޝްވަރާކުރައްވާފައެވެ. އަދި ދިއްލީގެ ހައިދަރްއާބާދު ހައުސްގައި މިއަދު އިންޑިއާގެ ޚާރިޖީ ވަޒީރު ޑރ އެސް ޖައިޝަންކަރާއެކު ވަނީ ބައްދަލުކުރައްވާފައެވެ.
މިނިސްޓަރ ޝާހިދުގެ މި ދަތުރުފުޅަކީ އިންޑިއާއައި ރާއްޖޭގެ ގުޅުން އިތުރަށް ބަދަހިކޮށް، އިންޑިއާ ސަރުކާރުގެ އެހީގައި ދިވެހިރާއްޖޭގައި ކުރިއަށްގެންދާ މަޝްރޫޢުތަކާ ގުޅޭގޮތުން މަޝްވަރާކުރެއްވުމަށް ކުރައްވާ ދަތުރުފުޅެއްކަމަށް ފޮރިން މިނިސްޓްރީން ބުނެއެވެ. މިނިސްޓަރ ޝާހިދުގެ މި ދަތުރުފުޅުގައި އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ. އެސް ޖައިޝަންކަރާވެސް ވަނީ ބައްދަލުކުރައްވާފައެވެ. މީގެ އިތުރުން މިނިސްޓަރ ޝާހިދު ވަނީ އިންޑިއާގެ ވިއޯންއަށް ޚާއްސަ ބަސްދީގަތުމެއްވެސް ދެއްވާފައެވެ.
މިނިސްޓަރ ޝާހިދު ދެ ދުވަހުގެ ތެރޭގައި 33 ޤައުމެއްގެ މަންދޫބުންނާއި ބައްދަލުކުރައްވާފައިމިވަނީ، އަންނަ ޖޫން މަހު އދ. ގެ 76 ވަނަ އާންމު މަޖިލީހުގެ ރައީސް ހޮވުމަށް ބާއްވާ އިންތިޚާބުގައި ރާއްޖޭގެ ފޮރިން މިނިސްޓަރު އަބްދުﷲ ޝާހިދާ ވާދަކުރައްވަން ނިންމަވާފައިވާ ދަނޑިވަޅެއްގައެވެ. އދ. ގެ އާންމު މަޖިލީހުގެ އިންތިޚާބު ކާމިޔާބުވާނެކަމުގެ ޔަގީންކަން އެބައޮތްކަމަށް މިނިސްޓަރ ޝާހިދު ވަނީ ވިދާޅުވެފައެވެ. މި އިންތިޚާބުގައި މިނިސްޓަރު އަބްދުﷲ ޝާހިދާ ވާދަކުރައްވަނީ އަފްޣާނިސްތާނުގެ ކުރީގެ ފޮރިން މިނިސްޓަރު ޑރ. ޒަލްމާއި ރަސޫލެވެ.
ޑރ. ރަސޫލަކީ 2010 އިން 2013 އަފްޣާނިސްތާނުގެ ފޮރިން މިނިސްޓަރުކަން ކުރައްވާފައިވާ ތަޖުރިބާކާރު ބޭފުޅެކެވެ. އަފްޣާނިސްތާނާއި ބައިނަލްއަގުވާމީ ދުނިޔެއާ އޮންނަ ގުޅުން ވަރުގަދަކުރުމަށް ޑރ. ރަސޫލް ވަނީ ގިނަ މަސައްކަތްތަކެއް ކުރައްވާފައެވެ. އޭގެ ކުރިން ނެޝަނަލް ސެކިޔުރިޓީ އެޑްވައިޒަރުގެ މަގާމުގެ އިތުރުން ސިވިލް އޭވިއޭޝަން މިނިސްޓަރުކަންވެސް ޑރ. ރަސޫލް ވަނީ އަދާކުރައްވައިފައެވެ.
އދ.ގެ އާންމު މަޖިލީހުގެ ރައީސުންގެ އިންތިޚާބު ރޮޓޭޝަން އުސޫލުން އޮންނައިރު ކޮންމެ އަހަރަކުވެސް އިންތިޚާބުކުރަނީ އެފްރިކާ، އޭޝިއާ ޕެސިފިކް، އިރުމަތީ ޔޫރަޕު، ލެޓިން އެމެރިކާ، ކެރީބިއަންގެ އިތުރުން ހުޅަނގު ޔޫރަޕުގެ ގައުމުތަކުގެ ބޭފުޅެކެވެ.
އެހެންނަމަވެސް މިފަހަރު ފުރުސަތު ލިބުނީ އޭޝިއާ ޕެސިފިކް ގައުމުތަކަށެވެ. މި ސަރަހައްދަށް ބަލާއިރު، މީގެ ކުރިން އިންޑިއާ، ސްރީލަންކާ، ބަންގްލަދޭޝްގެ އިތުރުން އަފްޣާނިސްތާނުން ވަނީ އދ. ގެ އާންމު މަޖިލީހުގެ ރިޔާސަތު ބަލަހައްޓާފައެވެ. އިންތިޚާބުގެ ކުރިން ކެންޑިޑޭޓުން އެބޭފުޅުންގެ "ވިޝަން ސްޓޭޓްމަންޓް" އދ. ގެ އާންމު މަޖިލީހަށް ހުށަހަޅަންޖެހެއެވެ.
އދ. އާންމު މަޖިލީހުގައި މެންބަރު 193 ގައުމު ބައިވެރިވެއެވެ. މި މަޖިލީހަކީ އދ. ގެ ސިޔާސަތުތައް މައިގަނޑު ގޮތެއްގައި ކަނޑައަޅާ މަޖިލީހެވެ. އަދި މި މަޖިލީހުގައި މެންބަރު ހުރިހާ ގައުމެއްގެ މަސްލަހަތު ހިމާޔަތް ކުރުމަށްވެސް މަސައްކަތްތައް ކުރެއެވެ.
