ވެމްކޯ އެމްޑީގެ ޔަޤީންކަން: 2024 އަންނައިރު ތަފާތު ތިލަފުއްޓެއް ފެންނާނެ
އެކަށީގެންވާ ނިޒާމެއް ޤާއިމު ކުރެވޭނީވެސް ރަށްރަށުން ކުނިތައް ނަގައި ސާފުކޮށްގެން
ވެމްކޯގެ އެމްޑީ އާދަމް މުހައްމަދު- އާދަމް ވަނީ ވެމްކޯގެ މުވައްޒަފުންގެ މަސައްކަތްތައްވެސް ފާހަގަ ކުރައްވާފައި
2024 ވަނަ އަހަރު އަންނައިރު ތިލަފުށި ތަފާތު ބޮޑު ބަދަލަކާއެކު ރައްޔިތުންނަށް ފެންނާނެކަމުގެ ޔަޤީންކަން ދެއްވާކަމަށް ވޭސްޓް މެނޭޖްމަންޓް ކޯޕަރޭޝަން ވެމްކޯގެ މެނޭޖިންގ ޑިރެކްޓަރ އާދަމް މުޙައްމަދު ވިދާޅުވެއްޖެއެވެ.
ބުދަ ދުވަހުގެރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން އާދަމް މުޙައްމަދު ވިދާޅުވީ، އަތޮޅުތެރޭގެ ބައެއް ރަށްރަށުގައި ކުނި އެއްކޮށްފައި ހުރިއިރު، ތަފާތު އެކި ބާވަތުގެ ކުނި ވަކި ކުރެވިފައި ނެތް ކަމަށެވެ. އެގޮތުން ގިނައިން ކުނި ޖަމާކޮށްފައިވާ ރަށްރަށުން ކުނި ނައްތާލުމުގެ މަޝްރޫއާ ވެމްކޯއިން ޙަވާލުވެފައިވާއިރު، މިހާރުވެސް 20 ރަށަކަށް އިސްކަންދީގެން އެ މަސައްކަތް ވެމްކޯއިން ކުރަމުންދާކަމަށް ވިދާޅުވިއެވެ. އާދަމް ވިދާޅުވީ، ކުނި ނައްތާލުމުގެ އެކަށީގެންވާ ނިޒާމެއް ޤާއިމު ކުރެވޭނީވެސް ގިނައިން ކުނި ޖަމާވެފައި ހުރި ރަށްރަށުން ކުނިތައް ނަގައި ސާފުކޮށްގެން ކަމަށެވެ. ތިލަފުށީގައިވެސް ދިމާވެފައިވަނީ އެފަދަ މައްސަލަތަކެއްކަން އާދަމް ފާހަގަ ކުރެއްވިއެވެ.
އާދަމް ވިދާޅުވީ، 2024 ވަނަ އަހަރު އަންނަންވާއިރު، ތިލަފުށި ތަފާތު ބޮޑު ބަދަލަކާއެކު ރައްޔިތުންނަށް ފެންނާނެކަމުގެ ޔަޤީންކަން ދެއްވާ ކަމަށެވެ.
1997 ވަނަ އަހަރުން ފެށިގެން ކުނި ގެންގޮސް ޖަމާކޮށް ހާމަޔަށް ކުނި އަންދަމުންދާ އެންމެ ބޮޑު އެއް ކުނިގޮނޑު އޮންނަނީ ތިލަފުށީގައެވެ. އެ ތަނަކީ ބަޔޯޑިގްރޭޑަބަލް ކުނި ޖަމާކުރަމުން ދާ ތަނަކަށްވާއިރު، މިފަދަ ތަކެތި ކުނިވެ ފަނާވެ އުފެދޭ ފުޅައިގެ ސަބަބުން މެހި އާލާވުމާއި، އަށަގަންނަ ބެކްޓީރިއާގެ ސަބަބުން ގޮނޑުގެ އެކި ދިމަދިމާލުގައި މީތޭން ގޭސް އުފެދުން ފަދަ ކަންކަން ދިމާވެއެވެ. އެގޮތުން ތިލަފުށީގެ ގޮނޑުގައި މެހި އާލާވުން ހުއްޓުވުމާއި ދުން އެރުން ހުއްޓުވުމަށް 2020 ވަނަ އަހަރު އެންވަޔަރމަންޓް މިނިސްޓްރީންވެސް ޕްލޭންކޮށްފައި ވީނަމަވެސް އެކަން ނުކުރެވުނީ ކޮވިޑް-19ގެ ގްލޯބަލް ޕެންޑެމިކްގެ ސަބަބުންކަން އެ މިނިސްޓްރީންވެސް ފާހަގަކުރެއެވެ.
އޭގެ އިތުރުން، ތިލަފުށީގެ ފަޅުން 15 ހެކްޓަރުގެ ބިން ހިއްކާ ކުރިންސުރެ އޮތް ކުނިގޮނޑު ހިމެނޭ ސަރަހައްދާއެކު ޖުމްލަ 25 ހެކްޓަރު ބިމުގައި ޒޯން 2 ގެ ކުނި މެނޭޖްކުރާ ސަރަހައްދީ ފެސިލިޓީއެއް ގާއިމްކުރުމުގެ މަސައްކަތް މިނިސްޓްރީން ފަށާފައިވާކަމަށް އެ މިނިސްޓްރީން މައުލޫމާތު ދެއެވެ.
އަތޮޅުތެރޭގައި ކުނި އެންމެ ގިނައިން ޖަމާވެފައިވާ 20 ރަށުގެ ކުނީގެ މައްސަލައަށް ކުރިއަށް އޮތް 7 މަސް ދުވަހުގެ ތެރޭގައި ހައްލު ލިބޭނެކަމަށް ސަރުކާރުން ވަނީ ބުނެފައެވެ. މިމަސައްކަތް ވޭސްޓް މެނޭޖްމަންޓް ކޯޕަރޭޝަން، ވެމްކޯއާއި މާރޗް 1 ވަނަ ދުވަހު ވަނީ ހަވާލުކޮށްފައެވެ. ކުނީގެ މައްސަލަ ހައްލުކުރުމުގެ މަސައްކަތް ބާރު ސްޕީޑެއްގައި ކުރިއަށްދާކަން ވެމްކޯގެ ޓުވިޓަރ މެދުވެރިކޮށް ދޭތެރެ ދޭތެރެއިން ދަނީ ހާމަކުރަމުންނެވެ.
މިއަހަރަށް ރައްޔިތުންގެ މަޖިލީސް ހުޅުވުމުގެ ޖަލްސާގައި އިއްވެވި ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވީ ކުނީގެ މައްސަލަ ހައްލުކުރުމަށް މަސައްކަތް ކުރައްވަމުން ގެންދަވާކަމަށެވެ. މިއީ ބުރަ ބޮޑު މައްސަލައެއްނަމަވެސް ކުރިއަށް އޮތް 7 މަސްދުވަހުގެ ތެރޭގައި 20 ރަށަކަށް ޖަމާވެފައިވާ ކުނިތައް އެއްކޮށް ރަށުން ބޭރުކޮށް ސާފުކުރުމުގެ މަޝްރޫއު މިހާރު ވެމްކޯއާއި ހަވާލުކުރައްވާފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މިކަން ކުރުމުގައި އެންމެ ގިނައިން މިވަގުތު ކުނި ޖަމާކޮށްފައި ހުރި ރަށްރަށުގެ ތެރެއިން ކުނީގެ މައްސަލަ ބޮޑުވެފައިވާ ރަށްރަށަށް އިސްކަން ދެއްވުމަށްވަނީ ނިންމަވާފައެވެ.
