ވޯޓު ކިއު ބަންދު ކުރުމުގައި އޮޅުންތަކެއް އެރި ކަމަށާއި، އެ މައްސަލަ މިހާރު ހައްލު ކޮށްފައިވާ ކަމަށް އިލެކްޝަންސް ކޮމިޝަނުގެ ނާއިބުރައީސް އިސްމާއިލް ހަބީބު ވިދާޅުވެއްޖެއެވެ.

ކިއު ބަންދުކުރުމުގައި ޖެހުނު މައްސަލަތަކާއި ގުޅިގެން "ރާއްޖެއެމްވީ" އަށް މައުލޫމާތު ދެއްވަމުން ހަބީބު ވިދާޅުވީ ބައެއް މަރުކަޒުތަކުގައި ގަޑިއަށް ވޯޓްލާން ނުފެށުމާއި، ކަރަންޓީން އަދި ޕޮޒިޓިވް މީހުންގެ ލިސްޓެއް އެޗްޕީއޭއިން ހިއްސާ ކޮށްފައި ނުވާތީ ވޯޓު ނެގުން ބަންދުކުރުމަށް ނިންމީ ހަވީރު 6:00 ކަމަށެވެ.

ހަބީބު ވިދާޅުވީ ގަޑިއަށް ބަދަލު ގެނައީ ޕޮޒިޓިވް އަދި ކަރަންޓީން މީހުންނަކީ ކޮބައިކަމެއް ދެނެނުގަނެވޭތީ ކަމަށެވެ. އަދި އެ މައުލޫމާތު ހޯދުމަށް އެޗްޕީއޭއާއި މަޝްވަރާކުރުމުން އަލިމަގެއް ނުފެނުނު ކަމަށާއި، އެ މަސައްކަތް ނާކާމިޔާބުވި ކަމަށެވެ.

މީގެ އިތުރުން 5:00 ގައި ކިއު ބަންދު ކުރި މަރުކަޒުތަކަށް ގުޅައި އެ މައްސަލަތައް ހައްލުކޮށްފައިވާ ކަމަށާއި، މާފަންނު ސްޓޭޑިއަމްގައި ހުރި މަރުކަޒުގައި ދިމާވި މައްސަލަ ވެސް މިހާރު ހައްލުކޮށްފައިވާ ކަމަށެވެ. ވޯޓުލާން ގޮސް މައްސަލަ ޖެހުނު މީހުންގެ މައްސަލަތައް ވެސް ހައްލުކޮށްފައިވާ ކަމަށް ހަބީބު ވިދާޅުވިއެވެ.

މީގެ އިތުރުން 6:00 އާއި ހަމައަށް ވޯޓުލާން ކިއުއަށް އަރައި ތިބި އެންމެނަށް ވޯޓު ލެވޭނެ ކަމަށާއި ވޯޓު ނުލެވޭނީ 6:00 ގެ ފަހުން ކިއުއަށް އެރި މީހުންނަށް ކަމަށް ވެސް ހަބީބު ވިދާޅުވިއެވެ. ހަބީބު ވިދާޅުވީ 6:00 ގައި ބަންދު ކުރަނީ ހެނދުނު 7:00 ގައި ވޯޓުލާން ފެށުނު ވޯޓު ފޮށިތަކުގައި ކަމަށާއި، 8:00ގެ ފަހުން ވޯޓުލާން ފެށި ވޯޓު ފޮށިތައް ބަންދުކުރާނީ ދީފައިވާ ވަކި ގަޑިތަކަކަށް ކަމަށެވެ.