ހުޅުމާލެ އެއާޕޯޓު ބަސް ދަތުރުކުރާ މަގުތަކަށް ބަދަލު ގެނެސްފި

ހުޅުމާލެއިން އެއާޕޯޓަށް، އެމްޓީސީސީގެ ބަސް ދަތުރުކުރާ މަގުތަކަށް ބަދަލު ގެނެސްފިއެވެ.

މި ބަދަލާއެކު އޭޕްރީލް 4 ވަނަ ދުވަހުން ފެށިގެން އެއާޕޯޓް ބަސް މަޑުކުރާނީ، ނިރޮޅުމަގުގައި ހުންނަ ދި-ކަލާސް ބަސްހުއްޓިއަށާއި އަމީން އެވެނިއު ބަސްހުއްޓިއަށް ކަމަށް އެމްޓީސީސީން ބުނެއެވެ.

ހުޅުމާލެ އެއާޕޯޓް ބަސް މީގެ ކުރިން މަޑުކުރަމުން އައިސްފައިވަނީ ރުއްގަނޑު 1 އަދި ރުއްގަނޑު 2 ބަސްހުއްޓިއަށެވެ.

އެއާޕޯޓް ބަސް ދަތުރުކުރާ މަގުތަކަށް، އެމްޓީސީސީން ބަދަލު ގެނައުމަށް ނިންމީ، ހުޅުމާލޭގެ މަގުތަކުގެ ތޮއްޖެހުން އިތުރުވެފައިވާތީ، ކަމާބެހޭ ފަރާތްތަކާއެކު މަޝްވަރާކުރުމަށް ފަހުގައި ކަމަށް އެކުންފުނިން މައުލޫމާތުދެއެވެ.

ސިނަމާލެ ބްރިޖް ހުޅުވުމާގުޅިގެން، ހުޅުމާލޭގެ ގިނަ މަގުތަކުގެ ޓްރެފިކް ބާރު ވަނީ ކުރިއަށްވުރެ ބޮޑުވެފައެވެ. އަދި ހުޅުމާލޭގައި ދިރިއުޅޭ މީހުންގެ އާބާދީ އިތުރުވުމުގެ ސަބަބުން، އާންމުކޮށް ހުޅުމާލެގައި ދުއްވާ ވެހިކަލްތަކުގެ އަދަދު ވެސް ވަނީ އިތުރުވެފައެވެ.