ޔޫރޮޕާ ލީގު: ރަޝްފަޑްގެ ލަނޑުން ސެލްޓަވިގޯ ބަލިކޮށް ޔުނައިޓެޑުން ސެމީގެ އުއްމީދު އާކޮށްފި

ޔޫރޮޕާ ލީގުގައި މާކަސް ރަޝްފަޑްގެ ލަނޑުން ސެލްޓަވިގޯ ބަލިކޮށް މެންޗެސްޓާ ޔުނައިޓެޑުން މުބާރާތުގެ ސެމީގެ އުއްމީދު އާކޮށްފިއެވެ.

ބުރާސްފަތި ދުވަހުގެ ރޭ ކުޅުނު މި މެޗު ސެލްޓަވިގޯއާ ވާދަކޮށް ޔުނައިޓެޑުން މެޗު ކާމިޔާބުކުރީ 0-1 ގެ ނަތީޖާއަކުންނެވެ.

ސެލްޓަވިގޯ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ އެޓީމުންނެވެ. އެގޮތުން އެޓީމުން ވަނީ ޔުނައިޓެޑްގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުވެސް ތަނަވަސްކޮށްފައެވެ.

އެހެންނަމަވެސް ފުރަތަމަ ހާފްގެ ވަކި ހިސާބަކުން ޔުނައިޓެޑުން ވަނީ މެޗުގެ ކޮންޓްރޯލް ހޯދާ ސެލްޓަވިގޯގެ ގޯލަށް ނުރައްކާކޮށްފައެވެ. އެގޮތުން 20 ވަނަ މިނެޓުގައި ރަޝްފަޑްއަށް ލިބުނު ފުރުސަތު ހިމެނެއެވެ. ރަޝްފަޑް ފޮނުވާލި މި ބޯޅަ ކީޕަރު ވަނީ ދިފާއުކޮށްފައެވެ.

މީގެއިތުރުންވެސް ޔުނައިޓެޑަށްވަނީ ލީޑު ނެގުމަށް ހުސް ގިނަ ފުރުސަތުތައް ލިބި ބޭކާރުވެފައެވެ. ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ޔުނައިޓެޑުން ވަނީ އެޓީމުގެ ކުޅުން ވަރުގަދަކޮށް ސެލްޓަވިގޯގެ ހާފަށް ބާރުބޮޑުކޮށްފައެވެ. އެގޮތުން އެޓީމުގެ ގޯލަށް ނުރައްކާކޮށް ޔުނައިޓެޑުން ވަނީ ފުލުފުލުގައި ގިނަ ހަމަލާތައް އުފައްދާފައެވެ.

ޔުނައިޓެޑުން މެޗުގެ ލީޑު ނެގީ 67 ވަނަ މިނެޓުގައި ރަޝްފަޑް ކާމިޔާބުކުރި ލަނޑުންނެވެ. މި ލަނޑު އޭނާ ކާމިޔާބުކުރީ އެޓީމަށް ލިބުނު ހިލޭ ޖެހުމަކުންނެވެ. މިއީ ރަޝްފަޑް މި ސީޒަނުގައި ޔުނައިޓެޑަށް ކާމިޔާބުކޮށްދިން 19 ވަނަ ލަނޑެވެ.

މި ނަތީޖާއާއެކު ޔުނައިޓެޑުން ސެމީގެ އުއްމީދު އާކޮށްފައިވާއިރު، މި ދެޓީމު ބައްދަލުކުރާ ދެވަނަ ލެގު މި މަހުގެ 11 ވަނަ ދުވަހު އޮންނާނީ ޔުނައިޓެޑްގެ ދަނޑުގައެވެ. އެ މެޗު އެއްވަރުކޮށްގެންވެސް ޔުނައިޓެޑަށް ސެމީއަށް ދެވޭނެއެވެ.