ބްރޯޑްކޮމް އަށް ކުރިމަތިލެއްވި ބޭފުޅުންގެ ނަންތައް ދިރާސާކުރުމަށް ކޮމިޓީއަށް
ނަންތައް ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
މޯލްޑިވްސް ބްރޯޑްކާސްޓިންގ ކޮމިޝަނަށް މެމްބަރަކު އައްޔަނުކުރުމަށް ރައީސުލްޖުމްހޫރިއްޔާ ފޮނުއްވި ތިން ނަން ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ފޮނުވައިފިއެވެ.
ބްރޯޑްކޮމްގެ މެމްބަރުގެ މަގާމުގައި ހުންނެވި އަލްއުސްތާޛާ އައިމިނަތު ސަރާހަތު އިއްޒަތުގެ މެމްބަރުކަމުގެ މުއްދަތު އޭޕްރީލް މަހުގެ 4 ވަނަ ދުވަހަށް ހަމަވާތީ އެމަގާމަށް ކުރިމަތިލުމުގެ ފުރުސަތު ވަނީ ހުޅުވާލާފައެވެ. އެކަމަށް ކުރިމަތިލީ މީހުންގެ ތެރެއިން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިސްކަންދެއްވާ ތަރުތީބުން ރައްޔިތުންގެ މަޖިލީހަށް ވަނީ ފޮނުއްވާފައެެވެ. އެކަމާއިގުޅިގެން ރައީސް ފޮނުއްވި ސިޓީފުޅު އަމީން އާންމު ފާތުމަތު ނިއުޝާ ވަނީ އިއްވަވާދެއްވާފައެވެ.
ބްރޯޑްކޮމް އަށް އައްޔަންކުރުމަށް ރައީސް ފޮނުއްވި ނަންތަކަކީ:
1- އަލްއުސްތާޛާ ފާތުމަތު ސައުޝަން / މ.ވެންޓްކޫވަރ
2- ޝިފްލާ އިބްރާހީމް / ގ.މަސްއޮޑިގެ
3- ޑރ މުހައްމަދު އިބްރާހީމް/ ޖަވާހިރު އައްސޭރި/ އދ.މާމިގިލި
ބްރޯޑްކޮމްގައި ހަތް މެމްބަރުން ތިބެންޖެހެއެވެ. އެގޮތުން މި ވަގުތު ކޮމިޝަންގައި ތިއްބެވީ ކޮމިޝަންގެ ރައީސް މަރިޔަމް ވަހީދާ، ނައިބު ރައީސް އަހުމަދު ގައިސް، ކޮމިޝަނަރ އަމްޖަދު ވަހީދު، ކޮމިޝަނަރ އަލީ ޔޫސުފް، ކޮމިޝަނަރ އާމިނަތު އަމީނާ އަދި ކޮމިޝަނަރ އާމިނަތު ސަރާހަތު އިއްޒަތު އަދި ދާދިފަހުން ކޮމިޝަނަށް އައްޔަނުކުރި މުހައްމަދު ފަޒީނެވެ.
