މާކުރަތުގައި ފެނުގެ ކަނެކްޝަން އެޅުމަށް ފޯމު ހުށަހެޅުމުގެ ފުރުސަތު ހުޅުވާލައިފި
މިމަޝްރޫއު 20 މަސް ދުވަހުގެ ތެރޭގައި ނިންމަން ޖެހޭ
ރ.މާކުރަތު، ފެނުގެ ނިޒާމު މަޝްރޫއުގެ އަމަލީ ބައެއް މަސައްކަތްތައް މިހާރު ވަނީ ފަށާފައި
ރ.މާކުރަތުގައި ގާއިމްކުރާ ފެނުގެ ނިޒާމުގެ މަޝްރޫއުގެ ދަށުން ފެނުގެ ކަނެކްޝަން އެޅުމަށް ފޯމު ހުށަހެޅުމުގެ ފުރުސަތު ހުޅުވާލައިފިއެވެ.
މާކުރަތު ކައުންސިލުން ބުނީ ޑިޒައިން އެންޑް ބިލްޑް އުސޫލުން އެރަށުގައި ފެނުގެ ނިޒާމު ގާއިމުކުރުމުގެ މަސައްކަތް ކުރުމަށް 25 ފެބްރުއަރީ 2021 ގައި މާރކެޓެކް މޯލްޑިވްސް ޕްރައިވެޓް ލިމިޓެޑް އާއި ވިހި މަސްދުވަހުގެ ތެރޭގައި މަސައްކަތް ނިންމުމަށް ވަނީ ހަވާލުކުރެވިފައިވާ ކަމަށެވެ. މި މަޝްރޫއަކީ މުޅި ރަށުގެ ހުރިހާ ރައްޔިިތުންނަށް އަމާޒުކުރެވިގެން ފެނުގެ އަސާސީ ޚިދުމަތް ފޯރުކޮށް ދިނުމުގެ ގޮތުން ކުރެވޭ މަސައްކަތަކަށްވެފައި، މި މަޝްރޫއުގެ މަސައްކަތް ހަލުވިކަމާއެކު ކަނޑައެޅިފައިވާ މުއްދަތަށް ނިންމުމަށް މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ އިން ބޭނުންވާ ކަމަށެވެ.
މި މަޝްރޫއުގެ އަމަލީ ބައެއް މަސައްކަތްތައް ފަށާފައިވާކަން ފާހަގަކޮށް ކައުންސިލުން ބުނީ މި މަޝްރޫއުގެ ދަށުން ފެނުގެ ކަނެކްޝަން ގޭގެއަށް ގުޅުމަށް އެދި ގޭގެ ވެރިފަރާތުން އެޕްލިކޭޝަން ފޯމު ހުށަހަޅަންޖެހޭ ކަމަށެވެ.
ކައުންސިލުން ބުނީ އެޕްލިކޭޝަން ފޯމު ހުށަހެޅުމުގެ ފުރުސަތު 29 މާރޗުން 60 ދުވަހުގެ މުއްދަތަށް 31 މެއިގެ ނިޔަލަށް ހުޅުވާލެވިފައިވާ ކަމަށެވެ. މި މުއްދަތުގެ ތެރޭގައި ފޯމު ހުށަހެޅުމަށް ގޭގޭގެ ވެރިފަރާތުން ސަމާލުވުމަށް ކައުންސިލުން އިލްތިމާސްކޮށްފައިވެއެވެ. އެޕްލިކޭޝަން ފޯމު ކައުންސިލް އިދާރާއިންނާއި، ވެބްސައިޓުން ލިބޭނެކަމަށް ވެސް ބުނެއެވެ.
