ފެނަކަ ކޯޕަރޭޝަންއަކީ މިހާރު ސިޔާސީ އައްޑާއެއް ނޫން: ސައީދު
ފެނަކައިގެ މަސައްކަތްތައް ކުރަނީ މެންޑޭޓެއްގެ ތެރެއިން
ފެނަކަ ޒީރޯޓޮލަރެންސް ޓު ކޮރަޕްޝަންގައި ސޮއިކުރި ރަސްމިއްޔާތުގެ ތެރެއިން،
ފެނަކަ ކޯޕަރޭޝަންއަކީ މިހާރު ސިޔާސީ އައްޑާއެއް ނޫން ކަމަށާއި، އެ ކޯޕަރޭޝަނުން ރައްޔިތުންނަށް ދެމުންދަނީ ޚިދުމަތް ކަމަށް ފެނަކައިގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވެއްޖެއެވެ.
ރާއްޖެ ޓީވީގެ 'ފާށާއިރު' ޕްރޮގުރާމްގައި ވާހަކަ ދައްކަވަމުން ސައީދު ވިދާޅުވީ، ފެނަކައިގެ މަސައްކަތްތައް ކުރަނީ މެންޑޭޓެއްގެ ތެރެއިން ކަމަށެވެ. އެގޮތުން ރައްޔިތުންނަށް ފެންވަރު ރަނގަޅު ޚިދުމަތް ފޯރުކޮށްދިނުމަށް އަބަދުވެސް ޚާއްސަ އިސްކަމެއްދީގެން މަސައްކަތް ކުރަމުންދާ ކަމަށް ސައީދު ވިދާޅުވިއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ސިޔާސީ ހަރަކާތްތައް ހިންގުމަށް ފެނަކަ ބޭނުންކޮށްފައިވާތީ އެކަމަށް އިޝާރާތް ކުރައްވާ ސައީދު ވިދާޅުވީ މިއަދު ފެނަކައަކީ ސިޔާސީ އައްޑާއެއް ނޫން ކަމަށާއި، އެފަދަ ކަމެއް މިސަރުކާރުން ނުކުރާނެ ކަމަށެވެ. އަދި ފެނަކައިން ވެސް ސިޔާސީ ހަރަކާތްތައް ނުހިންގާނެ ކަމަށާއި، މުވައްޒަފުންނަށް ވެސް އެފަދަ ބިރެއް ނެތް ކަމަށެވެ.
މީގެ އިތުރުން ސައީދު ވިދާޅުވީ ސިޔާސީ ހަރަކާތްތަކާއި، ކެމްޕޭންގެ މަސައްކަތްތައް ކުރަމުންދާނީ ހަމަތަކާއި އުސޫލުގެ ތެރެއިން ކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ފެނަކަައިން އިސްވެ އޮވެ ސިޔާސީ ހަރަކާތްތައް ހިންގާފައިވާ ކަމަށް އެތަނުގެ ބައެއް މުވައްޒަފުން ތުހުމަތުކޮށްފައިވެއެވެ. އޭރު ސަރުކާރުން ބާއްވާ ޖަލްސާތަކަށް ދިއުމަށް މަޖުބޫރު ކުރާ ކަމަށާއި، ޖަލްސާތަކަށް ނުދާ ނަމަ ފިޔަވަޅު އަޅައި ދަތިކުރުމުގެ ގޮތުން އެތައް ގޮންޖެހުމަކާ މުވައްޒަފުން ކުރިމަތިލާން ޖެހުނު ކަމަށް ބައެއް ފަރާތްތަކުން ބުނެފައިވެއެވެ.
