މިސްޓަރ މޯލްޑިވްސްގެ މަޤާމު ޔާމްބެއަށް

ބޮޑީބިލްޑިންގ އެސޯސިއޭޝަން އޮފް މޯލްޑިވްސް (ބީބީއޭއެމް) އިން ހޮވާ މި އަހަރުގެ މިސްޓަރ މޯލްޑިވްސްގެ މަޤާމު މުޙައްމަދު ޔާމީން (ޔާމްބެ) އަށް ލިބިއްޖެއެވެ.

މި އަހަރުގެ މިސްޓަރ މޯލްޑިވްސް ހޮވުން އޮތީ ހުކުރު ދުވަހުގެރޭ އޮލިމްޕަސް ސިނަމާގައި ބޭއްވި 19 ވަނަ ޤައުމީ ބޮޑީބިލްޑިން އެންޑް ފިޒީކްސް ސްޕޯޓްސް ޗެމްޕިއަންޝިޕުގައެވެ. ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ޝަރަފުވެރިކޮށްދެއްވި މި އިވެންޓް ބާއްވާފައިވަނީ ހުއްދަ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އެކުލަވާލި ހާއްސަ އުސޫލުތަކެއްގެ ދަށުންނެވެ.

މި އަހަރުގެ މިސްޓަރ މޯލްޑިވްސްގެ މަޤާމު ޔާމްބެ ހޯދިއިރު، އޭނާ ވަނީ 2017 ވަނަ އަހަރުވެސް މި މަޤާމު ހޯދާފައެވެ. މި އަހަރުގެ މިސްޓަރ މޯލްޑިވްސްއަކަށް ޔާމްބެ ހޮވުނުއިރު، އޭނާ ވަނީ މި ފަހަރުގެ މުބާރާތުގެ ބޮޑީބިލްޑިންގެ 90 ކިލޯ ކެޓެގަރީން އެއްވަނަވެސް ހޯދާފައެވެ. ދެން ބޮޑީބިލްޑިންގައި ހިމެނުނު 60 ކިލޯގެ އެއްވަނަ މުޙައްމަދު މޫސާ ހޯދިއިރު، 70 ކިލޯގެ އެއްވަނަ ހޯދީ މީގެ ކުރިން ތިން ފަހަރު މިސްޓަރ މޯލްޑިވްސް ކާމިޔާބުކޮށްފައިވާ މުޙައްމަދު ރަޝީދެވެ.

މީގެ އިތުރުން މި އަހަރުގެ މުބާރާތުގެ އެތުލެޓިކް ފިޒީކުގެ އެއްވަނަ ހޯދީ އަޙްމަދު މައުޒެވެ. މި ބައިގެ އެއްވަނަ އޭނާއަށް ލިބުނުއިރު، މައުޒް ވަނީ އެތުލެޓިކް ފިޒީކުގެ 180 ސެންޓިމީޓަރު ބައިންވެސް އެއްވަނަ ހޯދާފައެވެ. ދެން ބޭއްވި 170 ސެންޓިމީޓަރު ބައިން އެއްވަނަ ލިބުނީ ފަތުހުﷲ މުޙައްމަދަށެވެ.

ދެން ޤައުމީ ބޮޑީބިލްޑިން އެންޑް ފިޒީކްސް ސްޕޯޓްސް ޗެމްޕިއަންޝިޕުގައި ކުރިއަށްދިޔަ ސްޕޯޓްސް ފިޒީކުގެ އެއްވަނަ ހޯދީ އަޒްނީން ރަޝާދެވެ. މި ބައިގެ އެއްވަނަ އޭނާއަށް ލިބުނުއިރު، އަޒްނީން ވަނީ ސްޕޯޓްސް ފިޒީކުގެ 165 ސެންޓިމީޓަރު ބައިންވެސް އެއްވަނަ ހޯދާފައެވެ. ދެން މި ބައިގައި ހިމެނުނު 170 ސެންޓިމީޓަރު ބައިން އެއްވަނަ ފާލިހު މުޙައްމަދު ޒާހިރަށް ލިބުނުއިރު، 175 ސެންޓިމީޓަރު ބައިން އެއްވަނަ ލިބުނީ އަލީ ސަލީމް އިބްރާހީމަށެވެ. އަދި 180 ސެންޓިމީޓަރު ބައިން އެއްވަނަ ލިބިފައިވަނީ އަތީޤުއް ރަޙްމާނަށެވެ.

ކާމިޔާބުކަމާއެކު މި އަހަރުގެ މިސްޓަރ މޯލްޑިވްސް ބޭއްވިއިރު، މި މުބާރާތުގައި 30 ށްވުރެ ގިނަ ބޮޑީބިލްޑަރުން ވަނީ ވާދަކޮށްފައެވެ. މި އިވެންޓް ރާއްޖެޓީވީން ލައިވްކޮށް ދެއްކިއިރު، ފެބްރުއަރީ މަހުގެ އެއްވަނަ ދުވަހު ބީބީއެމުން ވަނީ މިސްޓަރ މޯލްޑިވްސްގެ އެކްސްކުލޫސިވް ރައިޓްސް ކުރިއަށް އޮތް ތިން އަހަރަށް ރާއްޖެޓީވީއަށް ދީފައެވެ.