ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2020ގެ ވޯޓު ކަރުދާހުގައި ފާހަގަޖެހުމަށް އަމިއްލަ ގަލަމެއް ބޭނުންކުރުމަށް އިލެކްޝަންސް ކޮމިޝަން (އީސީ) އިން އެދިއްޖެއެވެ.

އީސީން ބުނީ "ކޮވިޑް-19 ގެ ހާލަތުގައި ރައްކާތެރިކަމާއެކު ލޯކަލް ކައުންސިލްތަކުގެ އިންތިޚާބު ކުރިޔަށް ގެންދިއުމުގައި ޢަމަލުކުރަންވީ ގޮތުގެ އުސޫލު" ގެ 4 ވަނަ މާއްދާގެ (އ) ގައި ބަޔާންކޮށްފައިވާ ގޮތަށް، ވޯޓުލާން ވަޑައިގަންނަވާއިރު ރައްކާތެރިކަމުގެ ފިޔަވަޅެއްގެ ގޮތުން އަމިއްލަ ގަލަމަކުން ވޯޓުކަރުދާހުގައި ފާހަގަޖެހުމަށް ކޮމިޝަނުން ބާރުއަޅާ ކަމަށެވެ. އަދި މިގޮތުން ވޯޓުކަރުދާހުގައި ފާހަގަ ޖެހުމަށް ބޭނުން ކުރަންވާނީ ކަޅު ނުވަތަ ނޫ ކުލައިގެ ގަލަމެއް ކަމަށް ކޮމިޝަނުން ނިންމާފައިވާ ކަމަށެވެ.

ކޮވިޑް-19 ގެ ހާލަތުގައި ރައްކާތެރިކަމާއެކު ލޯކަލް ކައުންސިލްތަކުގެ އިންތިޚާބު ކުރިޔަށް ގެންދިއުމުގައި ޢަމަލުކުރަންވީ ގޮތުގެ އުސޫލުގެ 4 ވަނަ މާއްދާއަކީ ވޯޓުލާ މަރުކަޒުތަކުގައި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ހިމެނޭ ބަޔެވެ. އެގޮތުން 4 ވަނަ މާއްދާގައި ބުނެފައިވާ ކަންތައްތަކަށް ބަލާ އިރު، ތަނަށް ވަންނަ/ނުކުންނަ ދޮރު ކައިރީގައާއި އެތެރޭގެ އެކި ހިސާބުތަކުގައި ކޮވިޑް-19 އިން ރައްކާތެރިވުމުގެ ގޮތުން އަޅަންޖެހޭ ފިޔަވަޅުތަކާ ގުޅޭ މަޢުލޫމާތު (މާސްކު އެޅުން، މަދުވެގެން 3 ފޫޓުގެ ގައިދުރުމިން ބެހެއްޓުން، އަތުގެ ސާފުތާހިރުކަން، ދުންފަތުގެ އިސްތިޢުމާލު ނުކުރުން ފަދަ ކަންކަން) އާންމުކޮށް ފެންނާނެހެން ބަހައްޓަން ޖެހެއެވެ. އަދި މަދުވެގެން 3 ފޫޓުގެ ގައިދުރުމިން ބެހެއްޓޭގޮތަށް އެ ތަންތަނަށް މީހުން ވަނުމާއި ނުކުތުމުގެ އިންތިޒާމުތައް ހަމަޖެއްސުން ހިމެނެއެވެ.

މީގެ އިތުރުން ވޯޓުލާން ދާ މީހުން ކިޔުގައި ތިބޭއިރު، 3 ފޫޓުގެ ގައިދުރުމިން ބެހެއްޓޭގޮތަށް އިންތިޒާމުތައް ހަމަޖެއްސުމާއި، މި މަޢުލޫމާތު އެ ފަރާތްތަކާ ހިއްސާ ކުރުމާއި، މިކަން ކަށަވަރުކުރުމަށް ސުޕަވައިޒަރުން ކަނޑައެޅުން ހިމެނެއެވެ. އަދި ވޯޓުލާން ދާ މީހާއާއެކު އެހީތެރިޔަކު ދާންޖެހޭ ހާލަތްތަކުގައި އެހީތެރިއެއްގެ ގޮތުގައި ދާ މީހަކު ފިޔަވައި އިތުރު މީހުން ވޯޓުލާ މަރުކަޒަށް ނުވެއްދުން/ނުދިއުން ހިމެނެއެވެ. މި މާއްދާގައި އިތުރަށް ބުނެފައިވަނީ ތަނުގައި މަސައްކަތްކުރާ މީހުންނާއި އެހެނިހެން މީހުން ސައިބޯނިލައިގެން އަތްދޮވެވޭނެ ނުވަތަ ސެނިޓައިޒަރއިން އަތް ސާފުކުރެވޭނެ އިންތިޒާމް ހަމަޖައްސައިފައި ހުރުމާއި، ތަނަށް ވަންނަ މީހުންނާ 3 ފޫޓަށްވުރެ ގާތުން މުޢާމަލާތު ކުރަންޖެހޭ ހުރިހާ އޮފިޝަލުން، މޮނިޓަރުން، މަންދޫބުން އަދި ސުޕަވައިޒަރުން ފަދަ މީހުން މާސްކުގެ އިތުރުން ފޭސް ޝީލްޑް ބޭނުންކުރުން ހިމެނެއެވެ. އަދި ތަނަށް ވަންނަ މީހުން މާސްކު އެޅުމުގެ އުސޫލާ އެއްގޮތަށް މާސްކު އަޅައިގެން ތިބޭކަން ކަށަވަރުކުރުން މި އުސޫލުގައި ހިމެނެއެވެ.

މިދިޔަ އަހަރު ބާއްވަން ތާވަލުކުރި ލޯކަލް ކައުންސިލް އިންތިހާބު ފަސްކުރީ ކޮވިޑް-19ގެ ސަބަބުންނެވެ. އަންނަ އޭޕްރިލް މަހުގެ 10 ވަނަ ދުވަހަށް އިންތިހާބު ތާވަލުކޮށްފައިވާއިރު ކޮވިޑް-19ގެ ސަބަބުން އަޅަން ޖެހޭ ސަލާމަތީ ފިޔަވަޅުތަކާއެކު އިންތިހާބު ބާއްވާތީ އިންތިހާބަށް ބޮޑު ހަރަދެއް ކުރަން ޖެހެއެވެ. އެގޮތުން އިންތިހާބަށް މީގެ ކުރިން ކަނޑައަޅާފައިވާ 51 މިލިއަން ރުފިޔާގެ އިތުރަށް 42 މިލިއަން ރުފިޔާ ބޭނުންވާނެކަމަށް އިލެކްޝަންސް ކޮމިޝަނުން ލަފާކުރި ނަމަވެސް ރައްޔިތުންގެ މަޖިލީހާއެކު ބޭއްވި މަޝްވަރާތަކަށް ފަހު ކޮމިޝަނުން ވަނީ އެ އަދަދު 29.8ށް ތިރިކޮށްފައެވެ.