ބުދަ ދުވަހުން ފެށިގެން ޔޫކޭގެ ރެޑް ލިސްޓުން ރާއްޖެ އުނިކުރަނީ
17 ސެޕްޓެމްބަރު 2021 | ހުކުރު 16:46ރެޑް ލިސްޓުން 8 ގައުމެއް އުނި ކުރުމަށް ނިންމާފައިވޭ
ރާއްޖެ އަންނަ ފަތުރުވެރިން- ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ 10 ގައުމުގެ ލިސްޓުގައި އިނގިރޭސިވިލާތް ހިމެނޭ
އިނގިރޭސިވިލާތުގެ ރެޑް ލިސްޓުން ރާއްޖެ އުނިކުރުމަށް ނިންމައިފިއެވެ.
އިނގިރޭސިވިލާތުން "ދަތުރުފަތުރުގެ ސަމާލު"ގެ ގޮތުގައި ކަނޑައަޅާ "ރެޑް ލިސްޓް"ގައި ރާއްޖެ ހިމަނާފައިވަނީ, އެ ގައުމެއްގައި ފެތުރެނީ ބަލީގެ ކޮން ވޭރިއެންޓެއްކަން ދެނެގަތުމަށް ހަދާ ޖިނޯމިކް ސީކުއެންސިން ޓެސްޓު ނުހަދާ އޮތުމުންކަމަށް އެޗްޕީއޭއިން މީގެ ކުރިން ވަނީ މީޑިއާތަަކަށް މައުލޫމާތު ދީފައެވެ. ނަމަވެސް އިނގިރޭސިވިލާތުން ބޭނުންވާ ޖީނޯމް ސީކުއެންސް ޑާޓާތައް ފަހުން ވަނީ ޖިސެއިޑް ވެބްސައިޓުގައި އަޕްޑޭޓް ކޮށްފައެވެ.
ހުކުރު ދުވަހު ޔޫކޭގެ ސެކެޓްރީ އޮފް ސްޓޭޓް ފޯރ ޓްރާންސްޕޯޓް ގްރާންޓް ޝެޕްސް ކުރެއްވި ޓްވީޓެއްގައި ވިދާޅުވީ، އެ ގައުމުގެ ރެޑް ލިސްޓުން 8 ގައުމެއް އުނި ކުރުމަށް ނިންމާފައިވާ ކަމަށެވެ. އޭގެ ތެރޭގައި ދިވެހިރާއްޖެ، ޕާކިސްތާން، ސްރީލަންކާ، އޮމާން، ބަންގްލަދޭޝް، ކެންޔާ އަދި އިޖިޕްޓް ހިމެނެއެވެ. މި ގައުމުތައް އުނިކުރާނީ 22 ސެޕްޓެމްބަރުވާ ބުދަ ދުވަހުން ފެށިގެން ކަމަށް އޭނާ ވިދާޅުވިއެވެ.
މާހިރުން މިގޮތަށް ބުނެފައިވާއިރު، އިނގިރޭސިވިލާތުގެ ރައްޔިތުންނަށް ކަރަންޓީނު ނުވެ ދަތުރުކުރެވޭ ގައުމުތަކުގެ ތެރެއިން, ރެޑް ލިސްޓުގައި ރާއްޖެ ހިމެނެންޖެހޭ އެއްވެސް ސަބަބެއް މިހާރު ނެތްކަމަށް ދިވެހިރާއްޖޭން އިނގިރޭސިވިލާތަށް ކަނޑައަޅާފައި ހުންނަވާ ސަފީރު ޑރ. ފަރަހަނާޒް ފައިސަލްވެސް ދާދި ފަހުން ވަނީ ވިދާޅުވެފައެވެ. އެކަމަނާ ވިދާޅުވީ، ޔޫކޭގެ ރެޑް ލިސްޓަށް ލުމުގެ ކުރިން ކޮވިޑް ކޭސްތައް ހުރި އަދަދަށް ވުރެ މާ ދަށަށް ރާއްޖޭގެ ކޭސްތައް މިހާރު ދަށްވެފައިވާ ކަމަށެވެ. މިހާރު ގަވާއިދުން ޖީނޯމް ސީކްއެންސް ހަދަމުން އަންނަ ކަމަށާއި، ޑޭޓާތައް ވެސް އަޕްޑޭޓް ކޮށްފައިވާ ކަމަށެވެ.
ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ 10 ގައުމުގެ ލިސްޓުގައި އިނގިރޭސިވިލާތް ހިމެނޭއިރު، އެ ގައުމުގެ ރެޑް ލިސްޓުން ރާއްޖެ އުނިކުރުމަކީ ރާއްޖޭގެ ފަތުރުވެރިކަމަށް އިތުރު ކުރިއެރުމެއް އަންނާނެ ކަމެކެވެ. އެގޮތުން މިހާރުވެސް ކޮވިޑް-19ގެ ހާލަތުގެ ކުރިން ރާއްޖެއަށް އަންނަ މިންވަރަށް ފަތުރުވެރިން އަންނަމުންދާކަމަށް ޓޫރިޒަމް މިނިސްޓްރީގެ ފަހުގެ ތަފާސްހިސާބުތަކުން ދައްކައެވެ.
