ގދ. ތިނަދޫ ޕޮލިސް ސްޓޭޝަންގެ ބެލުމުގެ ދަށުގައި ހުރި ގިނަ ބަނގުރާ ނައްތާލައިފިއެވެ.
ފުލުހުން ބުނީ އެކި މައްސަލަތަކާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ މިތަކެތި ނައްތާލާފައި ވަނީ މިމަހުގެ 23 ވަނަ ދުވަހު ގދ. ތިނަދޫ ޕޮލިސް ސްޓޭޝަންގައި ކަމަށެވެ.
އެގޮތުން ނައްތާލާފައިވަނީ 2020 ވަނަ އަހަރުގެ އޮކްޓޯބަރ 19 ވަނަ ދުވަހުން ފެށިގެން 2021 ފެބްރުއަރީ 1 ވަނަ ދުވަހުގެ ނިޔަލަށް ކާޑެއްދޫ ޑޮމެސްޓިކް އެއަރޕޯޓަށް ފުރަންދާ ފަތުރުވެރިންގެ އަތުން ފުލުހުންގެ ބެލުމުގެ ދަށަށް ގެނެސްފައިވާ، އެކި ބްރޭންޑްތަކުގެ 47 ބަނގުރާ ފުޅިއާއި 11 ބިޔަރު ދަޅެވެ. އަދި 2020 އޮކްޓޯބަރ 11 ވަނަ ދުވަހުން ފެށިގެން 2021 މާރިޗު 11 ވަނަ ދުވަހުގެ ނިޔަލަށް މާވަރުލު އެއަރޕޯޓަށް ފުރަންދިޔަ ފަތުރުވެރިންގެ އަތުން ފުލުހުންގެ ބެލުމުގެ ދަށަށް ގެނެސްފައިވާ 17 ފުޅި ބަނގުރާ ކަަމަށް ފުލުހުން ބުނެއެވެ.
ބަނގުރާ ނައްތާލުން ކުރިއަށް ގެންގޮސްފައިވަނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާ ގޮތުގެ ގަވާއިދުގެ ދަށުންނެވެ.
