ފްލެޓް ދޭނެ ކަމަށްބުނެ، އެޑްވާންސަށް ފައިސާ ނެގުމަށްފަހު ރާއްޖެއިން ބޭރަށްގޮސް ފިލި އައްމަޓީ ރާއްޖެ ގެނެސްފި
ފުލުހުންގެ ބެލުމުގެ ދަށުން އައްމަޓީ ރާއްޖެ ގެެނެސްފައިވަނީ ބުދަ ދުވަހު
ސީލައިފްގެ ވެރިޔާ އަހުމަދު މޫސާ މުހައްމަދު (އައްމަޓީ)
ހުޅުމާލޭގައި 3،000 ފްލެޓް އަޅަން ބުކިން ފީގެ ގޮތުގައި ގިނަ ބައެއްގެ އަތުން އެޑްވާންސްކޮށް ފައިސާނެގުމަށްފަހު، ސީލައިފް މޯލްޑިވްސް ޕްރައިވެޓް ލިމިޓެޑްގެ ވެރިޔާ ޑިރެކްޓަރ އަހުމަދު މޫސާ މުހައްމަދު (އައްމަޓީ) ރާއްޖެއިން ބޭރަށް ގޮސް ފިލައިގެން އުޅެނިކޮށް ރާއްޖެ ގެނެސް ހައްޔަރުކޮށްފިއެވެ.
ރާއްޖެއެމްވީއަށް ފުލުހުންގެ މީޑިއާ އޮފިޝަލް ވިދާޅުވީ ފުލުހުންގެ ބެލުމުގެ ދަށުން އައްމަޓީ ރާއްޖެ ގެެނެސްފައިވަނީ ބުދަ ދުވަހު ކަމަށެވެ. އަދި މިހާރު އޭނާ ހުރީ ހައްޔަރުކޮށްފައި ކަމަށް އޮފިޝަލް ވިދާޅުވިއެވެ.
އައްމަޓީ ހޯދުމަށް އިންޓަޕޯލްއިން ރެޑް ނޯޓިސް ނެރުނީ 2019 ވަނަ އަހަރުއެވެ. އަދި 22 ފެބްރުއަރީ 2021 ގައި އޭނާ ހައްޔަރުކުރީ ސްރީލަންކާއިންނެވެ.
ސީލައިފްގެ ފަރާތުން 180 އަށް ވުރެ ގިނަ މީހުންގެ އަތުން ބޮޑެތި އަދަދުތަކުން ފައިސާ ނަގާފައިވާ އިރު ސީލައިފްއިން ފައިސާ ނެގި އެކި ފަރާތްތަކާ އެގްރީމެންޓް ވެސް ކުރެވިފައި ވަނީ އެކި ގޮތްގޮތަށެވެ. އެގޮތުން ތިން ރޫމް އެޕާޓްމެންޓް 3 މިލިއަން ރުފިޔާއަށް ވިއްކުމަށް ބައެއް ފަރާތްތަކާ އެގްރީމެންޓް ކުރެވިފައިވާ އިރު އަނެއްބައި ފަރާތްތަކާ ތިން ރޫމް އެޕާޓްމެންޓް އެއް މިލިއަން ރުފިޔާއަށް ވެސް ވިއްކުމަށް އެގްރީމެންޓް ކުރެވިފައިވެއެވެ.
ސީލައިފް ގްލޯބަލްއިން ހުޅުމާލޭގައި ހިންގަން އުޅުނު މަޝްރޫއުގެ ބިންގާ އަޅުއްވައި ދެއްވާފައި ވަނީ ކުރީގެ ރައީސް އަބްދުﷲ ޔާމީނެވެ. އެހެންނަމަވެސް ކުންފުނީގެ ފަރާތުން ހުޅުމާލޭގައި އިމާރާތްކުރަން ހަވާލުކުރެވުނު 3000 ހައުސިންގ ޔުނިޓްގެ މަޝްރޫޢު އެއްވެސް ވަރަކަށް ކުރިއަށް ގެންގޮސްފައިނުވާއިރު އެކުންފުނީގެ މެނޭޖިންގ ޑިރެކްޓަރ އައްމަޓީއަކީ ރައީސް ޔާމީންއާ ވެސް ގާތް ގުޅުމެއް އޮންނަ މީހެކެވެ.
ސީ ލައިފަށް ފައިސާ ދެއްކި ފަރާތްތަކަށް ހައްލެއް ހޯދައިދިނުމަށް މި ސަރުކާރުން މަސައްކަތް ކުރަމުންދާއިރު، މި މައްސަލައާ ގުޅުހުންހުރި މައްސަލަތަކެއް ސިވިލް ކޯޓަށް ވެސް ހުށަހެޅުނެވެ. ސީލައިފްގެ ފަރާތުން ވެސް ސިވިލް ކޯޓަށް މައްސަލައެއް ހުށަހެޅިއެވެ. އެގޮތުން، ސީލައިފް މޯލްޑިވްސް ޕްރައިވެޓް ލިމިޓެޑާއެކު 2018 ވަނަ އަހަރުގެ ފެބްރުއަރީ މަހު ދައުލަތުން ވެފައިވާ ސެޓްލްމަންޓް އެގްރީމަންޓު ބާތިލުކުރުމުން އެ ކުންފުންޏަށް ލިބުނު ގެއްލުމުގެ ބަދަލު ހޯދުމަށް އެދި ސިވިލް ކޯޓަށް ހުށަހެޅި މައްސަލަ އެ ކުންފުންޏާ ދެކޮޅަށް ވަނީ ނިމިފައެވެ.
