ފެނުގެ ނިޒާމުގައި ކްރޮސް-ކަނެކްޝަން ހެދުމަކީ ފެން ފޯރުކޮށްދޭ ނިޒާމުތަކުން ދޫކުރާ ފެން ތަޣައްޔަރުވުމުގެ ފުރުސަތު ބޮޑު ކަމެއް ކަމަށާއި، ނަމަވެސް ބައެއް ގެތަކުގައި ކްރޮސް-ކަނެކްޝަން ހަދާ ކަމަށް މާލެ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ޝާހު ވިދާޅުވީ ކްރޮސް ކަނެކްޝަން ހެދުމަކީ ގަވާއިދާ ހިލާފު ކަމެއް ނަމަވެސް ބައެއް ގެތަކުގައި ކްރޮސް-ކަނެކްޝަން ހަދާފައިވާ މައްސަލަތައް ފެންމަތިވާ ކަމަށެވެ. ޝާހު ވިދާޅުވީ ކްރޮސް-ކަނެކްޝަން ހެދުމަކީ ވަރަށް ދެރަ ކަމެއް ކަމަށާއި، އެކަމުގެ ސަބަބުން ވަރަށް ބޮޑެތި ގެއްލުންތަކާ ކުރިމަތިލާން ޖެހިދާނެ ކަމަށެވެ. އަދި ވިދާޅުވީ ފެނުގެ ރައްކާތެރިކަން ކަށަވަރުކުރުމުގެ ގޮތުން ވެސް އެއީ ކޮއްގެންވާނެ ކަމެއް ނޫން ކަމަށެވެ.
މީގެ އިތުރުން ޝާހު ވިދާޅުވީ އެމްޑަބްލިޔުއެސްސީން ދޫކުރާ ފެން ގެތަކުގެ މީޓަރާ ހިސާބަށް ދާއިރު ރައްކާތެރިވާނެ ކަމަށެވެ. ނަމަވެސް ބައެއްފަހަރު އަމިއްލައަށް ބޫސްޓަރ ޕަމްޕުތައް ބޭނުން ކުރުމުގެ ސަބަބުން ބެކް ފްލޯރއެއް ނެޓްވޯކްއަށް އައުމަކީ އެކަށީގެންވާ ކަމެއް ކަމަށް ޝާހު ވިދާޅުވިއެވެ. އެހެންކަމުން އެމްޑަބްލިޔުއެސްސީން ދޫކުރާ ބޫސްޓަރ ޕަމްޕު ބޭނުން ކުރުމަށް ޝާހު ވަނީ އިލްތިމާސްކުރައްވާފައެވެ.
ފެން ބިލް ބޮޑުވާ މައްސަލައަށް އަލިއަޅުއްވާލައްވައި ޝާހު ވިދާޅުވީ ފެން އިސްކުރަކުން ނޭނގި ފެން ލީކުވުމާއި ފާހާނާގެ ފެލެޝް ޓޭންކްއަށް ނުހުއްޓި ފެން އެޅުމުގެ ސަބަބުން ވެސް ފެން ބިލް ބޮޑުވާ ކަމަށެވެ. ޝާހު ވިދާޅުވީ ގޭގެ ފެންވައިރުކޮށްފައި ހުންނަ ހޮޅިތަކާއި ފިޓިންގސްތައް އެއީ ކޮލެޓީ ރަނގަޅު އެއްޗިއްސަށްވާންޖެހޭ ކަމަށާއި، އޭގެ ފިޓިންސްތައް ހަދާފައި ހުންނައިރު ޖޮއިންޓްތައް ގުޅުވާފައި ހުންނަނީ ރަނގަޅަށް ތެރެސްލާފަތޯ ބަލަން ޖެހޭ ކަމަށެވެ. އަދި ބައެއް ހާލަތުގައި ފެންވައިރު ކުރުމުގެ ތެރޭގައި ލީކެއް ދިމާވުމުގެ ސަބަބުން ވެސް ފެން ބިލް ބޮޑުވުމުގެ މައްސަލަތައް ކުރިމަތިވެފައިވާ ކަމަށް ޝާހު ވިދާޅުވިއެވެ.
ޝާހު ވިދާޅުވީ ދިގު މުއްދަތަކަށް ރަށުން ބޭރަށް ދާކަމަށްވާނަމަ އެމްޑަބްލިޔުއެސްސީގެ ސަމާލުކަމަށް އެކަން ގެނެސް، އެގޭގެ މީޓަރެއް ވަގުތީގޮތުން ބަންދުކޮށްލެވޭނެ އިންތިޒާމް ހަމަޖައްސާފައި ދިއުމަށް އެދޭ ކަމަށެވެ. އަދި ބައެއް ހާލަތުގައި ގޭގައި މީހަކު ނެތިސް ފެން އިސްކުރެއް ލުއްސައިގެން ގޮސް އެގެއެއްގައި ފެން ބޮޑުވެ މުދާތައް ހަލާކުވުމާއި ބިލް ބޮޑުވުމުގެ މައްސަލަތައް ދިމާވެފައިވާ ކަމަށް ޝާހު ވިދާޅުވިއެވެ. އެހެންކަމުން ރައްކާތެރިކަމުގެ ފިޔަވަޅުތައް އެޅުމަށް ޝާހު ވަނީ އިލްތިމާސް ކުރައްވާފައެވެ.
