އެމް.ޑީ.ޕީގެ ލޯގޯ އާއި ކުލަ އިދިކޮޅުން ކެމްޕޭންގައި ބޭނުންކުރަމުންދާތީ ފިޔަވަޅު އަޅައިދިނުމަށް އެދިއްޖެ
އެމްޑީޕީއިން ވަނީ މިފަހަރު އިންތިޚާބުގައި އެމް.ޑީ.ޕީ އިން ވާދަކުރަނީ ކޯލިޝަނަކާ ނުލައި، އެމްޑީޕީގެ ނަމުގައި އެކަނިކަމަށް ބުނެފައި
އެމްޑީޕީގެ 169 ވަނަ ގައުމީ މަޖިލިސް
ޤާނޫނާ ޚިލާފަށް އެމް.ޑީ.ޕީގެ ލޯގޯއާއި ކުލަ ޕީ.ޕީ.އެމްގެ ކެމްޕޭނުގައި ބޭނުންކުރަމުންދާ މައްސަލާގައި ފިޔަވަޅުއަޅައިދިނުމަށް އެދިއްޖެއެވެ.
ކުރިއަށް އޮތް ލޯކަލް ކައުންސިލް އިންތިޚާބުގައި ދިވެހިރައްޔިތުންގެ ޑިމޮކްރެޓިކް ޕާޓީ (އެމް.ޑީ.ޕީ) ގެ ލޯގޯ އާއި ކުލަ، ޕްރޮގްރެސިވް ޕާރޓީ އޮފް ދަ މޯލްޑިވްސް (ޕީ.ޕީ.އެމް) އިން ހިންގާ ކެމްޕޭނުގައި ބޭނުންކުރަމުން ގެންދާ ގެންދިއުން އެމްޑީޕީއިން ވަނީ އެންމެ ހަރު އަޑުން ކުށްވެރިކޮށްފައެވެ. މިކަމާ ގުޅޭގޮތުން ނެރުނު ބަޔާނެއްގައިވަނީ، ޕީ.ޕީ.އެމް. ގެ ކެމްޕޭން ޙަރަކާތްތަކުގައި، އެމް.ޑީ.ޕީގެ ލޯގޯއާއި ކުލަ ޕީ.ޕީ.އެމް ގެ ލޯގޯއާ އެއްކޮށްގެން ބޭނުންކުރަމުންދާކަން ފާހަގަކުރެވޭކަމަށް ބުނެފައެވެ. އެގޮތަށް ވޯޓު ހޯދުމަށް މަސައްކަތްކުރާކުރުމަކީ އެ ޕާޓީން ހިންގާ ޣައިރު ޤާނޫނީ އަދި ދަށުދަރަޖައިގެ ޢަމަލެއްކަމަށް އެމްޑިޕީއިން ސިފަކޮށްފައިވެއެވެ.
އެމްޑީޕީއިން ވަނީ، އެންމެ ފަހުން ބޭއްވުނު ރައްޔިތުންގެ މަޖިލީހުގެ އިންތިޚާބެކޭ އެއްފަދައިން، ކުރިއަށް މި އޮތް ލޯކަލް ކައުންސިލް އިންތިޚާބުގައި ވެސް އެމް.ޑީ.ޕީ އިން ވާދަކުރަނީ ކޯލިޝަނަކާ ނުލައި، އެމްޑީޕީގެ ނަމުގައި އެކަނިކަމަށް ބުނެފައެވެ. އަދި ޕީ.ޕީ.އެމް އާއި ޕީ.އެން.ސީ އަކީ ކައުންސިލް އިންތިޚާބުގައި އެމް.ޑީ.ޕީގެ ވާދަވެރި ފަރާތްތައްކަމަށް އެމްޑީޕީއިން ވަނީ ބުނެފައެވެ. އެހެންކަމުން އެމް.ޑީ.ޕީގެ ލޯގޯއާއި ކުލަ ޕީ.ޕީ.އެމް ގެ ލޯގޯއާ އެއްކޮށްގެން ޕީ.ޕީ.އެމް އިން ކެމްޕޭންކުރަމުންދާ ދިއުން ވަގުތުން ހުއްޓައިލުމަށް އެ ފަރާތްތަކަށް ވަނީ ގޮވާލާފައެވެ، އަދި ޤާނޫނާ ޚިލާފަށް އެމް.ޑީ.ޕީގެ ލޯގޯއާއި ކުލަ ޕީ.ޕީ.އެމްއިން ބޭނުންކުރާ މައްސަލަ ބައްލަވައި ފިޔަވަޅުއަޅުއްވައިދެއްވުމަށް އިލެކްޝަންސް ކޮމިޝަނަށް ވަނީ ގޮވާލާފައެވެ.
