އައްޑޫ ސިޓީ ލިންކް ރޯޑުގައި ހިނގި ނުރައްކާތެރި އެކްސިޑެންޓެއްގައި އަންހެނަކު ނިޔާވެއްޖެ
މައުލޫމާތު ލިބޭ ގޮތުގައި އޭނާގެ ބޮލަށް ސީރިއަސް އަނިޔާތަކެއް ލިބިފައިވޭ
އައްޑޫ އެކުއެޓޯރިއަލް ހޮސްޕިޓަލް - އަނިޔާވި މީހާ ނިޔާވީ ފަރުވާދެމުންދަނިކޮށް
އައްޑޫ ސިޓީ ލިންކް ރޯޑުގައި ހިނގި ނުރައްކާތެރި އެކްސިޑެންޓެއްގައި އަންހެނަކު ނިޔާވެއްޖެއެވެ.
އެ މީހާ ނިޔާވިކަން އައްޑޫ އިކުއަޓޯރަލް ހޮސްޕިޓަލުން ވަނީ ކަށަވަރުކޮށްދީފައެވެ.
މި އެކްސިޑެންޓުގައި އަނިޔާވީ ސ. ހިތަދޫ، ސަންރީފު، ފާތިމަތު އަސްމާއެވެ. އަސްމާ ނިޔާވެފައިވަނީ ލިބުނު އަނިޔާތަކަށް އިކުއަޓޯރިއަލް ހޮސްޕިޓަލުގައި ފަރުވާދެމުން ދަނިކޮށެވެ. މައުލޫމާތު ލިބޭ ގޮތުގައި އޭނާގެ ބޮލަށް ސީރިއަސް އަނިޔާތަކެއް ލިބިފައިވެއެވެ. އަދި މޭކަށިގަނޑު ބިންދައިގެން ގޮސް، ވާއަތު ކޮޑު ކަށިގަނޑުވެސް ބިނދިފައިވެއެވެ.
މި އެކްސިޑެންޓް ހިނގާފައިވަނީ ބުރާސްފަތި ދުވަހުގެ ހެނދުނުގެ ވަގުތެއްގައި ސައިކަލުގައި އޭނާގެ ދަރިފުޅު އައްޑޫ ހައި ސްކޫލަށް ގެންދިއުމަށްފަހު އެނބުރި ގެއަށްދިޔަ މަގުމަތީގައެވެ.
"އައްޑޫ ލައިވް" ގައި ރިޕޯޓުކޮށްފައިވާ ގޮތުގައި މި އެކްސިޑެންޓް ހިނގަން މެދުވެރި ސަބަބު މިހާތަނަށް އެނގިފައިނުވެއެވެ. އަދި އަސްމާ ފެނިފައިވަނީ ލިންކް ރޯޑް ހަންކެޑެ ސަރަހައްދުގައި ވެއްޓި، ވަރަށް ބޮޑަށް ޒަހަމްވެފައިވަނިކޮށް ކަމަށް މަންޒަރު ދުށް މީހުންނާ ހަވާލާދީ ރިޕޯޓުކޮށްފައިވެއެވެ.
މި މައްސަލަ ހިތަދޫ ޕޮލިސް ސްޓޭޝަނުން މިހާރު އަންނަނީ އިތުރަށް ތަހުގީގުކުރަމުންނެވެ.
