ސަރުކާރު ދެމެހެއްޓުމާމެދު ރައްޔިތުންގެ ވޯޓެއް ނަގަން ފައްޔާޒް ގޮވާލައްވައިފި
ރައީސް މުޢިއްޒު ވެރިކަމަށް ވަޑައިގަތުމަށް ކުރެއްވި ހުރިހާ ވަޢުދުތަކާ ޚިލާފުވެ، އަމަލުތައް ބަހައްޓަވާފައިވަނީ އެ ވަޢުދުތަކާ އިދިކޮޅަށް
އެމްޑީޕީގެ ޗެއާޕާސަން އަދި ކުރީގެ އިކޮނަމިކް މިނިސްޓަރ ފައްޔާޒް އިސްމާއިލް
ފެންނަ ނުފެންނަ ވޯޓުގެ ގާނޫނުގެ ދަށުން އެންމެ ފުރަތަމަ ނަގަންވީ ވޯޓަކީ މިހާރުގެ ވެރިކަން ދެމެހެއްޓުމާމެދު ރައްޔިތުންގެ ޚިޔާލު ހޯދުމުގެ ވޯޓެއް ކަމަށް އެމްޑީޕީގެ ޗެއަރޕާސަން ފައްޔާޒް އިސްމާޢީލް ވިދާޅުވެއްޖެ އެވެ.
އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަފުޅު ދައްކަވަމުން ފައްޔާޒް މިފަދައިން ވިދާޅުވެފައިވަނީ، ދާދިފަހުން ރައީސް މުއިއްޒު ތަސްދީގު ކުރެއްވި ފެންނަ ނުފެންނަ ވޯޓުގެ ގާނޫނުގެ ދަށުން އައްޑޫގެ ކައުންސިލް އޮންނާނެ ގޮތަކާ މެދު އާންމުންގެ ޚިޔާލު ހޯދުމަށް ވޯޓު ނެގުމަށް ރައީސް މުޢިއްޒު ވިދާޅުވެފައިވާ ދަނޑިވަޅެއްގައެވެ.
ފައްޔާޒް ވިދާޅުވި ގޮތުގައި ރައީސް މުޢިއްޒު ވެރިކަމަށް ވަޑައިގަތުމަށް ކުރެއްވި ހުރިހާ ވަޢުދުތަކަކާ ޚިލާފުވެ، އަމަލުތައް ބަހައްޓަވާފައިވަނީ އެ ވަޢުދުތަކާ އިދިކޮޅަށެވެ. އަދި މިއީ ދިވެހި ރައްޔިތުންނަށް ރަނގަޅަށް އެނގޭ ހަގީގަތެއް ކަމަށްވެސް އޭނާ ވިދާޅުވި އެވެ.
އަޅުގަނޑު ދަންނަވާނީ ރައީސް މުއިއްޒު ވެރިކަމަށް ވަޑައިގަންނަވަން ދެއްކެވި ކޮންމެ ވާހަކައެއް ކޮންމެ ވައުދެއް ބޮލާ ޖަހައި އެއާ މުޅިން ޚިލާފަށް އަމަލުކުރައްވައިފި، މިއީ ދިވެހި ރައްޔިތުން ދަންނާނެ ހަގީގަތެއް، އެހެންވީމާ އަޅުގަނޑު ދަންނަވާނީ ރެފްރެންޑަމް ބިލު އުސޫލުތަކާ ޚިލާފަށް މަޖިލީހުން ފާސްކުރައްވައި ރައީސް މުއިއްޒު ގެޒެޓުކުރައްވައިގެން އެންމެ ފުރަތަމަ އަޅެ ކެރިވަޑައިގަންނަވަންޏާމުން ރެފްރެންޑަމެއް ނަގާށޭ، ވީ ވައުދުތަކާ ޚިލާފަށް އެއާ އިދިކޮޅަށް ތިމަންނާ މަސައްކަތްކުރީމާ ވެސް ރައްޔިތުން ތިމަންނާ ބޭނުންތޯ ނޫންތޯ. އެ ރެފްރެންޑަމް ނަގާފަ އިތުރު ރެފްރެންޑަމެއް ނަންގަވަން އުޅުއްވަންވާނީއެމްޑީޕީގެ ޗެއަރޕާސަން ފައްޔާޒް އިސްމާއިލް
މިހާރު ރައީސް މުއިއްޒު ކުރައްވަމުން ގެންދަވަނީ ހުދުމުޚުތާރު ވެރިކަމެއް ހޯދަން ހުވަފެން ދެކޭ ކޮންމެ ވެރިއަކު ކުރާ ކަންކަން ކަމަށް ފައްޔާޒް ވިދާޅުވިއެވެ. އަދި މި ސަރުކާރުން ވަނީ ރާއްޖޭގެ އިގްތިސާދު ފުނޑާލައި، އާންމު ވިޔަފާރިތައް ބަނގުރޫޓުކޮށްލާފަ ކަމަށްވެސް ފައްޔާޒް ވިދާޅުވިއެވެ.
ފައްޔާޒް ފާހަގަކުރެއްވި ގޮތުގައި މިހާރު ރާއްޖޭގެ އިގްތިސާދުގައި ކިރިޔާވެސް ހިނގަމުންދަނީ ހަމައެކަނި ފަތުރުވެރިކަމުގެ ދާއިރާއެވެ. ނަމަވެސް ގްރީން ޓެކްސް އާއި އެއަރޕޯޓް ޑިޕާޗަރ ފީ އަދި ޓީޖީއެސްޓީ ބޮޑުކުރުމާއި، ޑޮލަރުގެ އަގު މާރުކުރުމުގެ ސިޔާސަތަށް ގެނެވުނު ބަދަލުތަކުގެ ސަބަބުން ރިސޯޓު ވިޔަފާރިއަށްވެސް ވަނީ ނޭދެވޭ އަސަރު ކޮށްފައިވާކަމަށް ފައްޔާޒު ފާހަގަކުރެއްވި އެވެ.
އެމްޑީޕީގެ ޗެއަރޕާސަން އިތުރަށް ވިދާޅުވީ އެމްޑީޕީން އަލުން ވެރިކަމާ ހަވާލުވުމަށްފަހު، މި ސަރުކާރުން ގާނޫނުތަކަށް ގެނެސްފައިވާ ބަދަލުތައް އަނބުރާ ގެންދާނެ ކަމަށެވެ. ޚާއްސަކޮށް މީޑިއާ ކޮންޓްރޯލް ބިލަކީ އެންމެ ފުރަތަމަ ދުވަހު އުވާލާނެ ގާނޫނެއް ކަމަށާއި، ވޭޕް އަދި ސިނގިރޭޓު ޑިއުޓީ ފަދަ ކަންކަމަކީވެސް ރައްޔިތުންގެ މަޝްވަރާއާއެކު އަލުން މުރާޖަޢާކުރާނެ ކަންކަން ކަމުގައި ފައްޔާޒް ވިދާޅުވި އެވެ.
