އިނގިރޭސި ޕްރިމިއާ ލީގުގައި ހޯމަ ދުވަހުގެރޭ ވުލްވްސް ބަލިކޮށް، ތާވަލުގެ ހަވަނައަށް އެންމެ ފަހުގެ ޗެމްޕިއަން ލިވަޕޫލް ޖެހިލައިފިއެވެ.

ރަށުން ބޭރުގައި ކުޅުނު މެޗުން ލިވަޕޫލް މޮޅުވީ 1-0 ގެ ނަތީޖާއަކުންނެވެ.

ދެ ޓީމުގެ ފަރާތުންވެސް މި މެޗުގައި ހަމަހަމަ ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި ދެ ޓީމަށްވެސް ވަނީ ލީޑު ނަގަން ރަނގަޅު ފުރުސަތުތަކެއް ލިބިފައެވެ. އެގޮތުން މެޗުގައި ފެނިގެންދިޔަ ހަމައެކަނި ލަނޑު ލިވަޕޫލުން ކާމިޔާބުކޮށްފައިވަނީ ފުރަތަމަ ހާފުގެ އިތުރު ވަގުތުގައެވެ. ސަޑިއޯ މާނޭ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ވުލްވްސްގެ ކުރީގެ ފޯވާޑް ޑިއޯގޯ ޔޮޓާއެވެ. މިއީ މިދިޔަ އަހަރުގެ ޑިސެމްބަރު މަހު ލިބުނު އަނިޔާއިން ރަނގަޅު، ކުޅުމުގެ ތެރެއަށް އައިސް ޔޮޓާ ކާމިޔާބުކުރި ފުރަތަމަ ލަނޑެވެ.

މި މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ގިނަ ހަމަލާތަކެއް ފެނިގެންދިޔައިރު، ވުލްވްސްގެ އެޑަމާ ޓްރައޮރޭ އާއި ފަބިއޯ ސިލްވާ ފޮނުވާލި ހަމަލާތައް ލިވަޕޫލުގެ ގޯލްކީޕަރު އެލިސަން ބެކާ ވަނީ މަތަކޮށްފައެވެ. އަދި މެޗު ނިމެން ގާތްވެފައި ވަނިކޮށް ލިވަޕޫލުގެ މުޙައްމަދު ސަލާހު ލަނޑެއް ޖެހި ނަމަވެސް، އޭނާ އޮފްސައިޑުގައި ހުރުމުން، އެ ލަނޑު ބަލައިގެންފައެއް ނުވެއެވެ.

މި މެޗުގައި ވުލްވްސްއިން ރަނގަޅު ކުޅުމެއް ދައްކަމުން ދަނިކޮށް އެ ޓީމަށް މައްސަލަތަކެއް ކުރިމަތިވީ މެޗު ނިމެން ގާތް ވެފައި ވަނިކޮށް ގޯލްކީޕަރު ރުއީ ޕެޓްރީޝިއޯގެ ބޮލަށް ލިބުނު ސީރިއަސް އަނިޔާއަކާ ގުޅިގެން އޭނާ ބަދަލުކުރަން ޖެހުމުންނެވެ. ރުއީ ޕެޓްރީޝިއޯގެ ބޮލަށް އަނިޔާވީ އެ ޓީމުގެ ކޯނޯ ކޯޑީގެ ފައިގައި ޖެހިފައެވެ. އެއާއެކު ދަނޑު މަތީގައި ރުއީ ޕެޓްރީޝިއޯއަށް ގިނަ އިރުތަކެއް ވަންދެން ފަރުވާދިންއިރު، އޭނާ ދަނޑުން ބާލާފައިވަނީ އަށިގަނޑުގައެވެ.

މި މެޗުގައި ރުއީ ޕެޓްރީޝިއޯގެ ބޮލަށް ސީރިއަސް އަނިޔާއެއްވިއިރު، މިދިޔަ އަހަރުގެ ނޮވެމްބަރު މަހުގެ ތެރޭގައި ވުލްވްސްއަށް ކުޅެމުން އަންނަ މެކްސިކޯގެ ފޯވާޑް ރައުލް ހިމެނޭޒްގެ ބޮލަށްވެސް ވަނީ ސީރިއަސް އަނިޔާއެއް ވެފައެވެ. އެގޮތުން ހިމެނޭޒްގެ ބޮލުގެ ނާށިގަނޑުގައި ރެނދުލުމާ ގުޅިގެން ކުއްލި އޮޕަރޭޝަނެއްވެސް ކުރަން ޖެހުނެވެ. އަދި އެ އަނިޔާއާ ގުޅިގެން އަދި މިހާތަނަށްވެސް ހިމެނޭޒް ކުޅުމުގެ ތެރެއަށް އަނބުރާ އައިސްފައެއް ނުވެއެވެ.

ހޯމަ ދުވަހުގެރޭ ކުޅުނު މެޗުން ވުލްވްސް އަތުން ލިވަޕޫލް މޮޅުވިއިރު، ތާވަލުގެ ހަވަނައަށް ލިވަޕޫލް ޖެހިލީ ކުޅުނު 29 މެޗުން ލިބުނު 46 ޕޮއިންޓާއެކުއެވެ. އަދި ލިވަޕޫލް އަތުން ބަލިވި ވުލްވްސް އޮތީ ތާވަލުގެ 13 ވަނައިގައި 29 މެޗުން 35 ޕޮއިންޓާއެކުއެވެ.