ފަޅު ނުހިއްކާ ބޯހިޔަވަހިކަން ހޯދުމުގެ ހުވަފެނުގައި ކުލަ ޖެހުން: އާންމުން ދިރިއުޅެން ރާއްޖޭގައި ފްލޯޓިންގ ސިޓީއެއް!

އާންމުންނަށް ދިރިއުޅެވޭނެ ރަށެެއް ގޮތަށް ރާއްޖޭގައި އަލަށް ފްލޯޓިން ސިޓީއެއް ގާއިމްކުރަން ނިންމައި އެ މަޝްރޫ އިފްތިތާހުކޮށްފިއެވެ.

ޓޫރިޒަމް މިނިސްޓްރީގައި އާދިއްތަ ދުވަހު ބޭއްވި ރަސްމިއްޔާތުގައި އެ މަޝްރޫ އިފްތިތާހުކޮށްދެއްވީ ޓޫރިޒަމް މިނިސްޓަރ، ޑރ. އަބްދުﷲ މައުސޫމް އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. "މޯލްޑިވްސް ފްލޯޓިން ސިޓީ" ގެ ނަމުގައި ކުރިއަށް ގެންދާ މި މަޝްރޫއަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2009 ވަނަ އަހަރު ހޮލެންޑުގެ ޑަޗް ޑޮކްލޭންޑް ކުންފުނިން ލޯންޗު ކުރި މަޝްރޫއެކެވެ. ނަމަވެސް އޭގެ ފަހުން މިކަން ހުއްޓިފައި އޮތުމަށް ފަހު އަލުން މަޝްރޫގެ މަޝްވަރާތައް ފަށައި ކުރިއަށް ގެންގޮސްފައި ވަނީ 2019 ވަނަ އަހަރުގައެވެ.

މި މަޝްރޫއާ ގުޅޭގޮތުން "ރާއްޖެ އެމްވީ" އަށް މައުލޫމާތު ހިއްސާކުރައްވަމުން މި ޕްރޮޖެކްޓްގެ ލޯކަލް ކޮންސަލްޓަންޓް އިބްރާހިމް ރިޔާޒް ވިދާޅުވީ މި ސިޓީ އަކީ އަތޮޅުތެރޭގެ ރަށެއް ގޮތަށް އާންމުންނަށް ދިރިއުޅެވޭނެ ހެން ސްކޫލާއި، ހޮސްޕިޓަލް ފަދަ ހުރިހާ މުނިސިޕަލް ހިދުމަތެއް ވެސް ލިބޭ ގޮތަށް ހަދާ ސިޓީއެއް ކަމަށެވެ. އާރަށް ކައިރީގައި އޮންނަ 200 ހެކްޓަރުގެ ފަޅެއްގައި ހަދާ މި ސިޓީގައި އަޅާ ގެތަކަކީ އާންމުންނަށް ވިއްކާނެ ތަންތަން ކަމަށައި، އެތަނުން ބިންތަކުގައި އަމިއްލައަށް ގެ އެޅުމުގެ ފުރުސަތު ނޯންނާނެ ކަމަށެވެ.

އޭނާ ވިދާޅުވީ ސިޓީގައި ދެ ބުރީގެ ފަސްހާސް ގެ އަޅަން ނިންމާފައިވާއިރު، ކޮންމެ ގެއެއްގެ ބޮޑުމިނުގައި 900 އަކަފޫޓާއި 1500 އަކަފޫޓު ހުންނާނެ ކަމަށެވެ. އަދި ކޮންމެ ގެއެއް ވެސް ދެބުރިއަށް ނަގާއިރު މަތީގައި ޓެރަސް ހުންނާނެ ކަމަށާއި، ގެތައް ހުންނާނީ ވޯޓަރ ފްރަންޓަށް ވާގޮތަށް ކަމަށެވެ. ރިޔާޒް ވިދާޅުވީ އެތަނުން ގެތައް ދޫކުރަން ނިންމާފައި ވަނީ ހަމަ އާންމުން މިހާރު ވެސް ގެ ގަންނަ ގޮތަށް ބެންކު މެދުވެރިކޮށް ކަމަށެވެ. އެގޮތުން މޯގޭޖް ކޮށް ލޯނު ޒަރިއްޔާއިން ވެސް ގެ ގަތުމުގެ ފުރުސަތު އޮންނާނެ ކަމަށް ވިދާޅުވިއެވެ.

ސިޓީގައި ޔޮޓް މެރީނާއެއް އަޅަން ނިންމާފައިވާއިރު އެތާ ކައިރީގައި ފަސް ތަރީގެ ދެ ރިސޯޓު ގާއިމްކުރާނެ ކަމަށް ވެސް އޭނާ ވިދާޅުވިއެވެ. އޭރުން އެތަނުގައި ދިރިއުޅޭ ޒުވާނުންނަށްވޒީފާގެ ފުރުސަތު ލިބޭނެ ކަމަށާއި، އެތަންތަނުން ވަޒީފާ ދިނުމުގައި އިސްކަން ދޭނީ ވެސް އެގޮތަށް ކަމަށް އޭނާ ވިދާޅުވިއެވެ.

ރިޔާޒު ވިދާޅުވީ އެއީ ފްލޯޓިން ސިޓީއެއް ކަމުން އެތަނުގައި ބިން ނުހުންނާނެ ކަމަށެވެ. އެކަމަކު މަގުތައް ހަދާނީ ވެލި އަޅައިގެން ކަމަށާއި، މުޅި ރަށުގައި ވެސް އޮންނާނީ ވެލި ކަމަށް ވިދާޅުވިއެވެ. ދެން އެއް ބްލޮކް އަނެއް ބްލޮކް ދެމެދުގައި މޫދުގައި ދަތުރުކުރެވޭނެ ކަމަށާއި، އެއީ ސިޓީ އަށް އިތުރު ފުރިހަމަކަމަކާއި ހިތްގައިމުކަމެއް ގެނުވާނެ ކަމެއް ކަމަށް ވިދާޅުވިއެވެ.

މި އަހަރުގެ ސެޕްޓެމްބަރު މަހު މި މަޝްރޫގެ އަމަލީ މަސައްކަތް ފަށަން ނިންމާފައިވާއިރު، އޭނާ ވިދާޅުވީ މި މަޝްރޫއަށް ގާތްގަނޑަކަށް އެއް ބިލިއަން ޑޮލަރު ހަރަދުވާނެ ކަމަށް ބެލެވޭ ކަމަށެވެ. ފަސް އަހަރާއި އަށް އަހަރުގެ މުއްދަތެއްގެ ތެރޭގައި މުޅި ތަނުގެ މަސައްކަތް ނިމޭނެ ކަމަށް އަންދާޒާކޮށްފައިވާއިރު ތިން އަހަރު ތެރޭގައި ތަން ބޭނުންކުރެވޭ ވަރު ވާނެ ކަމަށް އޭނާ ވިދާޅުވިއެވެ.

ރާއްޖޭގެ ގުދުރަތީ ރީތިކަމާއި ޖަޒީރާވަންތަކަމާ އެންމެ ގުޅިފައިވާ އެއް ކަމަކީ ރާއްޖޭގެ ފަޅުތައް ކަމަށްވާއިރު، ފަޅުތައް ހަލާކުވިޔަ ނުދީ މިފަދަ ސިޓީތައް ބިނާކުރުމަކީ ސަރުކާރުގެ ބައެއް އިސްވެރިންނާއި ވަކިން ހާއްސަކޮށް ޕްލޭނިން މިނިސްޓަރ މުހައްމަދު އަސްލަމް މީގެ ކުރިން ވެސް ދައްކަވާފައިވާ ވާހަކައެކެވެ. އެކަމަށް އެތައް ބައެއްގެ ފާޑުކިޔިން އަމާޒުވި ނަމަވެސް މި މަޝްރޫ ކާމިޔާބު ވެެއްޖެ ނަމަ މިއީ ރާއްޖެއަށް ލިބޭނެ ވަރަށް ބޮޑު ކުރިއެރުމެކެވެ.