އިސްރާއީލް ސަރުކާރުގެ އެހީއާއެކު ގުދުސްގައި ޗެކް ރިޕަބްލިކްގެ އޮފީސް ހުޅުވި މައްސަލަ ފަލަސްތީނުންނާއި އަރަބި ލީގުން ކުށްވެރި ކޮށްފިއެވެ.

ޗެކް ރިޕަބްލިކުން ގުދުސްގައި އެގައުމުގެ ޑިޕްލޮމެޓް އޮފީހެއް ހުޅުވާފައިވަނީ އިސްރާއީލުން، ކޮވިޑް ވެކްސިންގެ 5،000 ޑޯޒު އެގައުމަށް ހަދިޔާކުރިތާ ހަފްތާއެއް ފަހުންނެވެ. އަދި ރިޕޯޓްތައް ބުނާ ގޮތުން ޗެކް ރިޕަބްލިކްގެ އޮފީހެއް ގުދުސްގައި ހުޅުވުމަށް އިސްރާއީލުން ވަނީ މީގެ ދެމަސް ކުރިން އެގައުމަށް ހުއްދަދީފައެވެ.

ފަލަސްތީނުގެ ހާރިޖިއްޔާއިން ބުނީ ޗެކް ރިޕަބްލިކްގެ އޮފީހެއް ގުދުސްގައި ހުޅުވާފައިވަނީ ފަލަސްތީނުގެ ހުއްދައާ ނުލާ ކަމަށެވެ. އަދި އެއީ ފަލަސްތީނު ރައްޔިތުންގެ ހައްގުތަކަށް އަރައިގަތުން ކަމަށް އެގައުމުގެ ހާރިޖިއްޔާއިން ވަނީ ސިފަ ކުރައްވާފައެވެ.

އަރަބި ލީގުގެ ސެކެޓްރީ ޖެނެރަލް އަހްމަދު އަބްދުލް ޚެއިތް ނެރުއްވި ބަޔާނެއްގައި ވިދާޅުވީ އިސްރާއީލް އަދި ޗެކް ރިޕަބްލިކުން ވަނީ ބައިނަލްއަގްވާމީ ގާނޫނާ ހިލާފުވެފައި ކަމަށާއި، އެކަން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ. އަދި ގުދުސްއަކީ ފަލަސްތީނު ބިމެއް ކަމަށާއި، އެކަން އިސްރާއީލަށް ބަދަލު ނުކުރެވޭނެ ކަމަށް ވަނީ ވިދާޅުވެފައެވެ. މީގެ އިތުރުން ގުދުސްގެ ބިން އިސްރާއިލުން ހިފައިގެން އުޅޭ މައްސަލަ ސީރިއަސް މައްސަލައެއްގެ ގޮތުގައި އަރަބި ލީގުން ބަލަމުން އަންނަ ކަމަށް އަހުމަދު އަބްދުލް ޚެއިތް ނެރުއްވި ބަޔާނުގައި ވިދާޅުވެފައިވެއެވެ.

ޗެކް ރިޕަބްލިކްގެ ހަރިޖިއްޔާއިން ބުނީ ގުދުސްގައި އެގައުމުން ހުޅުވި އޮފީހަކީ އެގައުމުގެ އެމްބަސީއެއް ނޫން ކަމަށާއި، އެއީ އިސްރާއީލާއި ޗެކް ރިޕަބްލިކާއި ދެމެދު އޮންނަ ގުޅުން އިތުރަށް ބަދަހި ކުރުމަށާއި، އިސްރާއީލުގައި ދިރިއުޅޭ ޗެކް ރިޕަބްލިކްގެ ރައްޔިތުންނަށް ހިދުމަތް ދިނުމަށް ހުޅުވި އޮފީހެއް ކަމަށެވެ.

ގުދުސްއަކީ މެދުއިރުމަތީގެ އަރަބި ގައުމުތަކުގެ "ހިތެވެ". އެކަމަކު އިސްރާއީލުން ވަނީ 1967 ން ފެށިގެން ގުދުސްގެ އެކި ސަރަހައްދުކަށް ގާނޫނާ ހިލާފަށް ވެރިވެގަނެފައެވެ. އެހެންނަމަވެސް މުސްލިމު ގައުމުތަކުން އަންނަނީ އެއީ ފަލަސްތީނުގެ ބިމެއް ކަމަށް ދައުވާ ކުރަމުންނެވެ.