ކަސްރަތުކޮށް ނިމިގެން ދާއިރު މާސްކް އަޅައިގެން ދިއުމަށް ފުލުހުން އިލްތިމާސްކޮށްފި
13 މާރިޗު 2021 | ހޮނިހިރު 07:07ޚާއްސަ އޮޕަރޭޝަނެއް ކުރިއަށްދޭ
ހެނދުނު ކަސްރަތު ކުރަން ނުކުމެ އުޅޭ މީހުން،
ކޮވިޑް-19ގެ ނުރައްކާތެރި ހާލަތުގައި ކަސްރަތު ކުރުމަށް ބޭރަށް ނުކުންނަ ފަރާތްތަކުން ކަސްރަތުކޮށް ނިންމުމަށްފަހު ގެއަށްދާއިރު މާސްކް އަޅައިގެން ދިއުމަށް ފުލުހުން އިލްތިމާސްކޮށްފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޗީފް އިންސްޕެކްޓަރ އޮފް ޕޮލިސް ފަތުހުﷲ ވަހީދު ވިދާޅުވީ ސިއްހީ ކުއްލި ނުރައްކަލުގެ ހާލަތުގައި އަޅަމުންދާ ފިޔަވަޅުތަކާއެކު ފުލުހުން ވެސް ޚާއްސަ އޮޕަރޭޝަނެއް ކުރިއަށް ގެންދާ ކަމަށެވެ. ޚާއްސަ ގޮތެއްގައި މާލެ ސަރަހައްދުގެ ކަންކަން ބަލަހައްޓަމުންދާ ކަމަށް ފަތުހުﷲ ވިދާޅުވިއެވެ. އެގޮތުން އަޅާފައިވާ ފިޔަވަޅުތައް ތަންފީޒު ކުރުމަށާއި، އާއްމު ރައްޔިތުންނަށް އަމާންވެއްޓެއް ގާއިމްކޮށް ދިނުމަށް ކުރަން ޖެހޭ ހުރިހާ މަސައްކަތްތަކެއް ކުރަމުންދާކަން އޭނާ ފާހަގަކުރެއްވިއެވެ.
މިހާރުގެ ހާލަތާއި ގުޅިގެން އަޅާފައިވާ ފިޔަވަޅުތައް ތަންފީޒު ކުރުމަށް މަސައްކަތް ކުރަމުންްދާއިރު، ބައެއް ގޮންޖެހުންތައް ކުރިމަތިވާކަން ފާހަގަކުރައްވައި ފަތުހުﷲ ވިދާޅުވީ އިރުއޮއްސި 6:00ގައި ވެހިކަލް ދުއްވުން މަނާވާއިރު، އެވަގުތަށް މަގުތައް ހުސްނުވާ ކަމަށާއި، އެގަޑިއަށް މާބޮޑު ސަމާލުކަމެއް ނުދީ ގިނަ އަދަދެއްގެ ބަޔަކު ބޭރުގައި އުޅޭ ކަމަށެވެ. އަދި އިރުއޮއްސި 6:00ށް ހެނދުނު 6:00ށް ވެހިކަަލް ދުއްވުން މަނާވާއިރު ގަވާއިދާ ހިލާފަށް އަދި ހުއްދަ ނެތި ބައެއް ފަރާތްތަކުން ވެހިކަލް ދުއްވާ މައްސަލަ ބޮޑު ކަމަށް ފަތުހުﷲ ވިދާޅުވިއެވެ.
އާއްމު ޚިދުމަތްދޭ ތަންތަނަށް އަލިއަޅުއްވާލައްވާ ފަތުހުﷲ ވިދާޅުވީ ގިނަ ކެފޭ/ރެސްޓޯރަންޓްތަކުން ބަންދުކުރުމަށް ކަނޑައަޅާފައިވާ ވަގުތުގައި ބަންދު ކުރާ ކަމަށެވެ. ނަމަވެސް އެއާ ހިލާފަށް ޓޭކް އަވޭގެ ޚިދުމަތްދޭ ތަންތަނުން ގަވާއިދާ ހިލާފަށް އަމަލުކުރަމުންދާކަން ފާހަގަކުރެވިފައިވާ ކަމަށް ފަތުހުﷲ ވިދާޅުވިއެވެ. އަދި ވިދާޅުވީ ޓޭކްއަވޭ ތަންތަނުގެ ކައިރީގައި ތިބެ ބައެއް ފަރާތްތަކުން މާސްކް ނަގައިގެން ކައިބޮއެ ހަދާ ކަމަށެވެ. ނަމަވެސް މިހާލަތުގައި އެގޮތަށް އަމަލުކުރުމުގެ ފުރުސަތު ނުދެވޭނެ ކަމަށް ފަތުހުﷲ ވިދާޅުވިއެވެ.
މާސްކް ނާޅާނަމަ ފިޔަވަޅުއަޅާނެކަން ފާހަގަކުރައްވައި ފަތުހުﷲ ވިދާޅުވީ ބައެއް ފަރާތްތަކުން ކަސްރަތުކޮށް ނިންމާލުމަށްފަހު މާސްކް ނާޅާ އުޅޭކަން ފާހަގަކުރެފައިވާ ކަމަށެވެ. ކަސްރަތުކޮށް ނިންމުމަށްފަހު ގެއަށް އަންނައިރު މާސްކް އަޅަން ޖެހޭ ކަމަށާއި، މޫދަށް ދިޔަކަމުގައި ވީ ނަމަވެސް މާސްއަޅަަން ޖެހޭ ކަމަށް ފަތުހުﷲ ވިދާޅުވިއެވެ.
ފަތުހުﷲ ވިދާޅުވީ ރޭގަނޑު 11:00ން 4:30ށް ކާފިއުގެ ވަގުތަށްވާއިރު އެވަގުތުތަކުގައި ފުލުހުން ހަރަކާތްތެރިވަމުންދާނެ ކަމަށެވެ. އަދި މަގުތަކުގައި އުޅޭ މީހުން ހުއްޓުވައި ސުވާލުކުރާނެ ކަމަށާއި، ގަވާއިދާ ހިލާފަށް މީހަކު އުޅޭނަމަ ފިޔަވަޅުއަޅާނެ ކަމަށް އޭނާ ވިދާޅުވިއެވެ.
