ފަތުރުވެރިކަމުގެ ސިނާއަތްދަނީ ދިވެހިންގެ އަތުން ބީވަމުން، މިކަން ހައްލުކުރަން ޖެހޭ - މިނިސްޓަރ ނަސީމް
ސިނާއަތުގައި ދިވެހި ވިޔަފާރިވެރިންނަށް ލިބޭ ފުރުސަތުތައްވަނީ ކުޑަވާން ފަށާފައި
ރާއްޖޭގެ ފަތުރުވެރިކަން ފެށުމުގައި އިސްދައުރެއް އަދާކުރެއްވި މިހާރުގެ މިނިސްޓަރ އޮފް ހެލްތު އަހްމަދު ނަސީމް
ރާއްޖޭގެ ފަތުރުވެރިކަމުގެ ސިނާއަތުގައި ދިވެހި ވިޔަފާރިވެރިން ސެކަންޑްރީ ވިޔަފާރިވެރިންގެ ގޮތުގައި ތިބި ތިބުމަށް ނިމުން ގެންނަން ޖެހޭކަމަށް ރާއްޖޭގެ ފަތުރުވެރިކަން ފެއްޓުމުުގައި އިސްދައުރެއް އަދާކުރެއްވި މިހާރުގެ ހެލްތު މިނިސްޓަރ، އަހްމަދު ނަސީމް ވިދާޅުވެއްޖެއެވެ.
ދިވެހި ފަތުރުވެރިކަމުގެ ރަންޔޫބީލް ފާހަގަކުރުމަށް ކުރެވޭ މަސައްކަތްތަކުގެ ތެރެއިން ރަންޔޫބީލް އަހަރުގެ ލޯގޯ ލޯންޗުކުރަން ބޭއްވި ވަރޗުއަލް ހަފްލާގައި ވާހަކަދައްކަވަމުން މިނިސްޓަރ ނަސީމް ވަނީ ފަތުރުވެރިކަމުގެ ސިނާއަތް ދިވެހިންގެ އަތުން ބީވެގެންދާ މަންޒަރު ފެންނަމުންދާކަން ފާހަގަކުރައްވާ އެކަމުގެ ކަންބޮޑުވުން ފާޅުކުރައްވާފައެވެ.
ހަފްލާގައި ވާހަކަދައްކަވަމުން މިނިސްޓަރވަނީ ރާއްޖޭގެ ފަތުރުވެރިކަން ދުނިޔޭގައި މަޝްހޫރުވެ ފަތުރުވެރިކަމުގެ ސިނާއަތުގައި އިންވެސްޓްކުރާ ބޭރުގެ ފަރާތްތައް އިތުރުވެގެން ދިޔަ ނަމަވެސް، މި ސިނާއަތުގައި ދިވެހި ވިޔަފާރިވެރިންނަށް ލިބޭ ފުރުސަތުތައް ކުޑަވާން ފަށާފައިވާ ކަމަށް ވިދާޅުވެފައެވެ. އަދި މިހާހިސާބަށް ރާއްޖޭގެ ފަތުރުވެރިކަން އައިސްފައި މިވަނީ ވަރަށް ދިގު، ބުރަ ދަތުރަކަށްފަހުކަމަށާއި މިއީ މިސިނާއަތަށް ނުކުތް ފަރާތްތަކުން ވަރަށް ވިސްނައިގެން މިހާހިސާބަށް ގެނެސްފައިވާ ސިނާއަތެއްކަމަށް މިނިސްޓަރ ވިދާޅުވިއެވެ.
އެހެން ކަމުން މިކަން ހައްލުކުރުމަށް މިހާރުގެ ޓޫރިޒަމް މިނިސްޓަރ ހާއްސަ ސަމާލުކަމެއް ދޭންވާނެކަމަށާއި މިސިނާއަތުގައި ދިވެހި ވިޔަފާރިވެރިން ތިބެންޖެހޭނީ އެންމެ ކުރީސަފުގައިކަމަށް މިނިސްޓަރ ނަސީމް ވިދާޅުވިއެވެ. އަދި ފަތުރުވެރިކަމުގެ ހިއްސާ ދިވެހިންނަށް ލިބޭނެ ގޮތް މަގުފަހިކޮށްދެވޭނެ ގޮތެއް ވިސްނަން ޖެހޭކަމަށް މިނިސްޓަރ ވިދާޅުވިއެވެ.
މީގެ އިތުރުން ރާއްޖޭގެ ފަތުރުވެރިކަމަށް މިހާތަނަށް ލިބުނު އެންމެ ބޮޑު އެއް ކާމިޔާބީއަކީ ދިވެހި ސަރުކާރުތަކުން ފަތުރުވެރިކަމުގެ ސިނާއަތުގެ މަސައްކަތްތަކަށް ނުފޫޒު ފޯރުވުމުގެ ބަދަލުގައި ވިޔަފާރިވެރިންނަށް އަމިއްލައަށް މިމަސައްކަތުގައި ކުރިއަށް ދިއުމުގެ ފުރުސަތުދިނުން ކަމަށް މިނިސްޓަރ ނަސީމް ފާހަގަކުރެއްވިއެވެ.
މިހަފްލާގައި ވާހަކަދައްކަވަމުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރާއިރު، ރަން އަހަރު ފުރިހަމަ ވެގެންދާނީ މިނިސްޓަރ ނަސީމް ފަހާގަކުރެއްވިހެން ފަތުރުވެރިކަމުގައި ދިވެހިންގެ ރޯލް އިތުރުކުރެވިގެން ކަމަށް ވިދާޅުވެފައެވެ.
އެގޮތުން ރައީސް އިބްރާހިމް މުހައްމަދު ސޯލިހްގެ ފަތުރުވެރިކަމުގެ ސިޔާސަތުގައި އޮތީ ދިވެހިން ފަތުރުވެރިކަމުގެ ވެރިންނަށްހެދުންކަމަށާއި މިފަދަ ވެރިންނަށް ދިވެހިންވާނީ ރާއްޖޭގެ އަލްޓްރާ ލަގްޒަރީ ރިސޯޓްތަކާއި ގެސްޓްހައުސްތަކާއި، ސަފާރީ އުޅަނދުތަކުގެ ހިއްސާ ދިވެހިންގެ އަތުގައި އޮވެ ފަތުރުވެރިކަމުގެ ވިޔަފާރީގެ ވެރިންނަށްވެ ސިނާއަތުގައި ވަޒީފާ އަދާކުރާ ވެރިންނަކީވެސް ދިވެހިންނަށް ވެގެންކަމަށް މިނިސްޓަރ މައުސޫމް ވިދާޅުވިއެވެ.
އެހެންކަމުން މިއަމާޒަށް ވާސިލްވުމަށްޓަކައި ފަތުރުވެރިކަމުގެ ސިނާއަތުގައި ދިވެހިން އަދާކުރާހިތްވާ ބޮޑެތި ވަޒީފާތަކަށް ދިވެހިން ގެންދިއުމުގެ މަސައްކަތް ސަރުކާރުން ކުރާނެކަމަށް މިނިސްޓަރ ވިދާޅުވިއެވެ.
