ފަތުރުވެރިކަމުގެ ރަންޔޫބީލް ލޯގޯ ލޯންޗުކޮށްފި

ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމަށް ވާ ތައްޔާރީތަކުގެ ތެރެއިން، ފަތުރުވެރިކަމުގެ ރަންޔޫބީލް، ރަން އަހަރުގެ ގޮތުގައި ބްރޭންޑްކޮށް، ޕްރޮމޯޓް ކުރުމަށް ރަންޔޫބީލް އަހަރަށް ހާއްސަކޮށްގެން ފަރުވާ ކުރެވުނު ލޯގޯ އިފްތިތާހުކޮށްފިއެވެ.

ރާއްޖޭގެ ފަތުރުވެރިކަމުގެ ރަންޔޫބީލް އަހަރުގެ ލޯގޯ އިފްތިތާހްކޮށްދެއްވީ އެކަމަށް ހާއްސަކޮށް މިނިސްޓްރީ އޮފް ޓޫރިޒަމް އިން ބޭއްވި ހާއްސަ ވަރޗުއަލް ހަފްލާއެއްގައި، ރާއްޖޭގެ ފަތުރުވެރިކަން ފެއްޓުމަށް އެންމެ އިސްކޮށް ހަރަކާތްތެރިވި އެއް ބޭފުޅާ ކަމަށްވާ މޯލްޑިވްސް އެސޯސިއޭޝަން (މަޓީ) އޮފް ޓޫރިޒަމް އިންޑަސްޓްރީގެ ޗެއަރމަން މުހައްމަދު އުމަރު މަނިކެވެ.

ލޯގޯ އިފްތިތާހުކޮށްދެއްވައި ވާހަކަ ދައްކަވަމުން އުމަރު މަނިކު ވަނީ ރާއްޖޭގެ ފަތުރުވެރިކަން ފެށިގެން އައީ ވަރަށް ކުޑަކުޑަ އާދައިގެ ކަމެއްގެ ގޮތުގައި ކަމަށް ފާހަގަކުރައްވާފައެވެ. އަދި ރާއްޖޭގެ ރީތިކަން ދެކިލަން ބޭނުންވާ ފަތުރުވެރިން ރާއްޖެ އަންނަން ފަށައި، 50 އަހަރު ވެގެންދާއިރު، އަދިވެސް އެރީތިކަން އެގޮތުގައި ދެމި އެބައޮތްކަމަށް އުމަރު މަނިކު ވިދާޅުވިއެވެ.

މަޓީގެ ޗެއަރމަން އުމަރު މަނިކު ވަނީ އެންމެ ފުރަތަމަ ފެށިގެން އައިސް، މިހާ ހިސާބަށް ރާއްޖޭގެ ފަތުރުވެރިކަން ގެނައުމަށް ވަރަށް ގިނަ މަސައްކަތްތަކެއް ކުރެވިގެންދިޔަ ކަމަށާއި، ވަރަށް ގިނަ ގޮންޖެހުންތަކަކާއި ކުރިމަތިލާން ޖެހުނު ކަން ފާހަގަކުރައްވާފައެވެ.

މި ހަފްލާގައި ރާއްޖޭގެ ފަތުރުވެރިކަން ފެށުމުގައި ހަރަކާތްތެރިވި އަދި މަޓީގެ ވައިސް ޗެއަރމަން ހުސައިން އަފީފްގެ އިތުރުން ރާއްޖެއަށް އައި އެންމެ ފަތުރުވެރިން ގެނައުމުގައި ހަރަކާތްތެރިވި މިހާރުގެ މިނިސްޓަރ އޮފް ހެލްތު އަހްމަދު ނަސީމްގެ އިތުރުން ރާއްޖޭގެ ފުރަތަމަ މިނިސްޓަރ އޮފް ޓޫރިޒަމް އަހްމަދު މުޖްތަބާ އާއި މިހާރުގެ މިނިސްޓަރ އޮފް ޓޫރިޒަމް އަބްދުﷲ މައުސޫމް އަދި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ މެނޭޖިންގ ޑިރެކްޓަރ ތޮއްޔިބު މުހައްމަދާއި ގެސްޓްހައުސް އެސޯސިއޭޝަންގެ ރައީސް އަބްދުﷲ ނަޝީދު ވަނީ ބައިވެރިވެވަޑައިގެންފައެވެ.

ބުދަ ދުވަހު ލޯންޗުކުރެވިގެން މިދިޔަ ރަންޔޫބީލްގެ ލޯގޯ އަކީ ރާއްޖޭގެ ސަގާފަތާއި ދިވެހިވަންތައްކަން ދައްކައިދޭނެ ލޯގޯއެއް ކަމަށް ޓޫރިޒަމް މިނިސްޓްރީން ފާހަގަކުރެއެވެ.