ރާއްޖޭގެ ކޮވިޑް-19 ވެކްސިނޭޝަން ޕްރޮގްރާމްގެ ދަށުން ހޯމަ ދުވަހު 6،000ށް ވުރެ ގިނަ މީހުން ވެކްސިން ޖަހާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން އާންމުކޮށްފައިވާ ތަފާސްހިސާބުތައް ދައްކާގޮތުން ހޯމަ ދުވަހު ވެކްސިން ޖަހާފައި ވަނީ 6،170 މީހުންނެވެ. އެއީ މާލެ ސަރަހައްދުން ވެކްސިން ޖެހި 2،186 މީހުންނާއި އަތޮޅުތެރެއިން ވެކްސިން ޖެހި 3،984 މީހުންނެވެ.

މިއާއި އެކު ރާއްޖެއިން ކޮވިޑް-19 ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 157،813ށް އަރާފައެވެ. އެއީ މާލެ ސަރަހައްދުން ވެކްސިން ޖެހި 91،279 މީހުންނާއި އަތޮޅުތެރެއިން ވެކްސިން ޖެހި 66،534 މީހުންނެވެ.

ފެބްރުއަރީ މަހުގެ އެއް ވަނަ ދުވަހުން ފެށިގެން ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ކުރިއަށް ގެންދާއިރު، އަދިވެސް އެންމެ އެކަށޭނަ ވަރަށް މީހުން ވެކްސިން ޖަހަން ނުދާކަމަށް ހެލްތު އެމަޖެންސީ އޮޕަރޭޝަން ސެންޓަރުން ފާހަގަކުރެއެވެ. ވީހާވެސް ގިނަ މީހުން ވެކްސިން ޖެހުމަށް ތަކުރާރުކޮށް އިލްތިމާސްކުރަމުންދާއިރު، އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވަނީ ވެކްސިންގެ ރައްކާތެރިކަން ދެނެގަތުމަށް ދިރާސާތައް ހެދޭނީ އާބާދީގެ ބޮޑު ބައެއް ވެކްސިން ޖެހުމުންކަން ފާހަގަކުރައްވާފައެވެ.

މާލެ ސަރަހައްދުގައި 8 ވެކްސިނޭޝަން ސެންޓަރާއި 2 މޮބައިލް ސެންޓަރު ހިމެނޭއިރު އަތޮޅުތަކުގައި 169 ވެކްސިން ސެންޓަރުން ވެކްސިން ދިނުމުގެ ކަންކަން ކުރިއަށްދާނެ ކަމަށް އެޗްޕީއޭއިން ބުނެއެވެ. ރާއްޖޭގައި ބޭނުން ކުރުމުގެ ހުއްދަ ދީފައިވަނީ ކޮވިޝީލްޑް ވެކްސިނެވެ.

ހޯމަ ދުވަހު ހެލްތު މިނިސްޓަރ އަހުމަދު ނަސީމް ވަނީ މާލެ ސަރަހައްދުގައި ކޮވިޝީލްޑް ވެކްސިންގެ ފުރަތަމަ ޑޯޒު ޖަހައިދެނީ މަރޗް މަހުގެ 15 ވަނަ ދުވަހާ ހަމައަށްކަމަށް ވިދާޅުވެފައެވެ. މިނިސްޓަރ ވަނީ ކޮންމެވެސް އެއް ހިސާބަކުން ދެވަނަ ޑޯޒު ޖަހަން ފަށަން ޖެހޭނެކަން ފާހަގަކުރައްވައި ބަލި ހަލުވިކަމާއެކު ފެތުރެމުންދާއިރު ބަލިން ފުރިހަމަ ރައްކާތެރިކަން ލިބޭނީ ވެކްސިންގެ ދެ ޑޯޒުވެސް ފުރިހަމަކޮށްގެން ކަމަށް ވިދާޅުވެފައެވެ.

މިނިސްޓަރ ނަސީމް މިހެން ވިދާޅުވިއިރު، ރާއްޖޭގައި ވެކްސިންގެ ދެވަނަ ޑޯޒު ޖަހަން ނިންމާފައި ވަނީ ފުރަތަމަ ޑޯޒު ޖަހާތާ އަށް ހަފްތާ ފަހުންނެވެ.