ރައީސް ޔާމީނުގެ ދައުރުގައި ބޯހިޔާވަހިކަމުގެ މަޝްރޫއުގެ މަސައްކަތުގެ ތެރެއިން ނިންމާފައިވަނީ 2 އިންސައްތަ- މިނިސްޓަރ އަސްލަމް
އެ ސަރުކާރުގެ ދައުރު ނިމުނުއިރު އޭގެ ތެރެއިން 9،120 ހައުސިންގ ޔުނިޓް ބާތިލް ކޮށްފައިވޭ
މިނިސްޓަރ އަސްލަމް ވާހަކަ ދައްކަވަނީ
ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ދައުރުގައި ބޯހިޔާވަހިކަމުގެ މަޝްރޫއުގެ މަސައްކަތުގެ ތެރެއިން ނިންމާފައިވަނީ 2 އިންސައްތަކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރ އަސްލަމް މިހެން ވިދާޅުވީ ހޯރަފުށީ ދާއިރާގެ މެންބަރު އަހުމަދު ސަލީމު ކުރީގެ ރައީސް ޔާމީންގެ ސަރުކާރުން 21،828 ހައުސިންގ ޔުނިޓް އަޅުއްވާނެ ކަމަށް ބުނެ އެ ސަރުކާރުގެ ދައުރު ނިމުނުއިރު އޭގެ ތެރެއިން 9،120 ހައުސިންގ ޔުނިޓް ބާތިލް ކޮށްފައި ވާކަމަށް ހޯދިހޯދުމުން އެނގިފައިވާތީ މި އަދަދުތައް ސާފު ކޮށްލަން ބޭނުންވާކަމަށް ވިދާޅުވުމުންނެވެ.
މިނިސްޓަރ ވިދާޅުވީ 21،828 ހައުސިންގ ޔުނިޓް އެޅުމުގެ މަސައްކަތް 37 ކޮންޓްރެކްޓަރުންނާ ހަވާލު ކުުރެއްވި ކަމަށެވެ. އަދި އެއީ ސަރުކާރުން ސީދާ ބައިވެރިވެގެން ހިންގި މަޝްރޫއުތަކާއި ސަރުކާރުން ބިން ދީގެން ހިންގި މަޝްރޫއުތައް ކަމަށެވެ. މިނިސްޓަރ ވިދާޅުވީ އެ ސަރުކާރަށް ނިންމުނީ، ނިންމަން ސޮއި ކުރެވުނު މަޝްރޫއުތަކުގެ 2 އިންސައްތަ ކަމަށެވެ.
މީގެ އިތުރުން މިނިސްޓަރ ވިދާޅުވީ މެންބަރު ވިދާޅުވި އަދަދުތައް ސައްހަ ކަމަށާއި އެގޮތުން ހިޔާ މަޝްރޫއުގެ ދަށުން ކުރީ ސަރުކާރުގެ ދައުރު ނިމުނުއިރު ނިމިފައިވަނީ 44 އިންސައްތަ. ކަމަށެވެ. އަދި އެ މަޝްރޫއުގެ 66 އިންސައްތަ ނިންމީ މި ސަރުކާރުން ކަމަށް މިނިސްޓަރ ވިދާޅުވިއެވެ. އަދި 21،828 ހައުސިންގ ޔުނިޓް އެޅުމަށް ބުނި ނަމަވެސް 9120 ހައުސިންގ ޔުނިޓްގެ މަސައްކަތް އޭރު ބާތިލުކޮށްފައިވާ ކަމަށާއި ދަޢުރު ނިމުނުއިރު ނިންމާފައިވަނީ 395 ޔުނިޓްކަމަށެވެ.
