ޤާސިމްގެ ދެކުންފުންޏަކާ ދެކޮޅަށް މީރާއިން ދައުވާ ކޮށްފި

ދައުލަތަށް ދައްކަންޖެހޭ ޓެކްސް ނުދައްކައިގެން 37 މިލިއަނަށްވުރެ ގިނަ ޑޮލަރު ހޯދުމަށް ކަމަށް ބުނެ ޖުމްހޫރީ ޕާޓީގެ ލީޑަރ އަދި ރައްޔިތުންގެ މަޖިލީހުގެ މާމިނގިލީ ދާއިރާގެ މެންބަރުގެ މަސްލަހަތު އޮންނަ ވިލާ ގްރޫޕްގެ ދެ ކުންފުންޏަކާއި ދެކޮޅަށް ދައުލަތުގެ ޓެކްސް އިދާރާއިން ސިވިލް ކޯޓަށް ހުށަހަޅައިފިއެވެ.

މައުލޫމާތު ލިބިފައިވާ ގޮތުގައި މޯލްޑިވްސް އިންލަންޑް ރެވެނިއު އޮތޯރިޓީ މީރާއިން، ސިވިލް ކޯޓުގައި ދަޢުވާކޮށްފައިވަނީ، ޤާސިމްގެ މަސްލަަހަތު އޮންނަ ވިލާ ހޮޓެލްސް އެންޑް ރިސޯޓްސް އާއި ވިލާ ޝިޕިންގ އެންޑް ޓްރޭޑިންގއާ ދެކޮޅަށެވެ. މީގެ ތެރެއިން ވިލާ ހޮޓެލްސް އެންޑް ރިސޯޓްސް އާއި ދެކޮޅަށް ދައުވާ ކުރަނީ، އެކުންފުންޏަށް ދޫކޮށްފައިވާ ބައެއް ރަށްތަކުން ކުއްޔާއި ޖޫރިމަނާ ފައިސާއަށްވާ 18.6 މިލިއަން ޑޮލަރު ހޯދުމަށެވެ.

މައުލޫމާތު ލިބިފައިވާގޮތުގައި ވިލާ ޝިޕިންގ އެންޑް ޓްރޭޑިންގ އާއި ދެކޮޅަށް މީރާއިން ދަޢުވާކޮށްފައިވަނީ، ތ.އަތޮޅު އެލާގެ ކުއްޔާއި ޖޫރިމަނާގެ ގޮތުގައި ދައުލަތަށް ދައްކަންޖެހޭ 18.9 މިލިއަނަށްވުރެ ގިނަ ރުފިޔާ ނުދައްކައިގެންނެވެ. ވިލާގެ ބައެއް ކުންފުނިތަކުން ދައުލަތަށް ދައްކަންޖެހޭ ފައިސާ ނުދައްކައިގެން މީރާއިން މީގެ ކުރިންވަނީ ވިލާ ޝިޕިންގގެ ބައެއް އެކައުންޓްތައްވެސް ފްރީޒްކޮށްފައެވެ.

ނަމަވެސް ވިލާ ކުންފުނިން ބުނަމުންދަނީ ސަރުކާރަށް ދައްކަން ޖެހޭ ފައިސާއެއް ނޯންނާނެ ކަމަށެވެ. އަދި ދައުލަތައް އެންމެގިނައިން ޓެކްސް ދައްކާ ފަރާތްކަށް ދޭ ރަން ލާރިވެސް ވަނީ އެކުންފުންޏަށް ލިބިފައެވެ.

މިކަމާ ގުޅޭގޮތުން ވިލާ ކުންފުނީގެ ބަހެއް އަދި ވަނީ ލިބޭގޮތް ނުވެފައެވެ.