ޖަޒީރާ ސައްލާ- މަސްތުވާތަކެތިން އަރައިގަތުމާ ގުޅޭ ޚިޔާލުތައް ހިއްސާ ކުރުމުގެ ފުރުސަތު ހުޅުވާލައިފި
2 މާރިޗު 2021 | އަންގާރަ 02:12މިފަހަރުގެ މައުޟޫއަކީ "މަސްތުވާތަކެތީގެ ވަބާއިން އަރައިގަތުން"
ޖަޒީރާ ސައްލާގެ ފުރަތަމަ މަޝްވަރާ ބައްދަލުވުމުގެ ތެރެއިން
ރައްޔިތުންގެ ކަންބޮޑުވުންތައް އަޑުއެހުމަށް "ޖަޒީރާ ސައްލާ" ގެ ނަމުގައި ސަރުކާރުން ކުރިއަށްގެންދާ ޚާއްސަ މަޝްވަރާ ބައްދަލުވުމުގެ ދެވަނަ މައުޟޫއަށް ޚިޔާލު ހުށަހެޅުމުގެ ފުރުސަތު ހުޅުވާލައިފިއެވެ.
އެކަމާ ގުޅޭގޮތުން ހޯމަ ދުވަހު ސަރުކާރުގެ ރަސްމީ ޓްވިޓަރ އެކައުންޓުން ކުރި ޓްވީޓެއްގައި ބުނީ، ޖަޒީރާ ސައްލާގެ ދެވަނަ މަޝްވަރާ ބައްދަލުވުމަށް ޚިޔާލު ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. އަދި މިފަހަރުގެ މައުޟޫއަކީ "މަސްތުވާތަކެތީގެ ވަބާއިން އަރައިގަތުން" ކަމަށް ހާމަ ކޮށްފައިވެއެވެ. މި މަޢުޟޫއާ ގުޅޭގޮތުން ކުރަން ބޭނުންވާ ސުވާލެއް އޮތްނަމަ، 03 މާޗު 2021 ވާ ބުދަ ދުވަހުގެ މެންދުރު ފަހު 2:30 ގެ ކުރިން ސުވާލު ފޮނުވުމަށް ވަނީ އެދިފައެވެ. ޓްވިޓަރ މެދުވެރިކޮށް ސުވާލު ފޮނުވުމުގެ ފުރުސަތު ހުޅުވާލާފައިވާއިރު، އެކަމަށް ޚާއްސަ ހޭޝްޓެގް (JazeeraSalla#) ބޭނުން ކުރުމަށް ވެސް ވަނީ އެދިފައެވެ.
މި ޙަރަކާތަކީ ސަރުކާރުގެ ސިޔާސަތުތައް ތަންފީޒުކުރާ ފަރާތްތަކަށް ރައްޔިތުންގެ ޚިޔާލާއި ކަންބޮޑުވުންތައް އަދި ޝުޢޫރުތައް ޙިއްޞާކުރުމަށް ފުރުޞަތުދިނުމުގެ ގޮތުން ބާއްވާ ޙަރަކާތެކެވެ.
މި ސަރުކާރުން ވެރިކަމަށް އައުމަށްފަހުވަނީ ރައްޔިތުންގެ ޚިޔާލު ހޯދުމަށް ތަފާތު އެކި ފަހަރު މަތިން ރައްޔިތުންނާ ބައްދަލުކޮށްފައެވެ. އެގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްވެރިކަމަށް ވަޑައިގެން ވަނީ "ޖަޒީރާ ހޮޅުއަށި" ނަމުގައި ރާއްޖޭގެ އެކި ޞަރަޙައްދުތަކުގައި މަޝްވަރާ ފޯރަމުތައް ބާއްވަން ފަށްޓަވާފައެވެ. މި ބައްދަލުވުންތަކުގައި ރައީސުލްޖުމްހޫރިއްޔާއާއި ސަރުކާރުގެ އިސްވެރިންގެ އިތުރުން އެކި މުއައްސަސާތައް ޒިންމާދާރުކުރުވުމަށްޓަކައި މުއައްސަސާތަކުގެ އިސްވެރިން ވެސް ވަނީ ބައިވެރިވެފައެވެ.
މީގެ އިތުރުން މުޖުތަމަޢުގައި ޒުވާނުންނަށް ކުރިމަތިވެފައިވާ ދަތިތަކާ ބެހޭގޮތުން މަޝްވަރާކުރުމަށް "ޒުވާނުންގެ ހޮޅުއަށީ"ގެ ނަމުގައިވެސް ޚާއްޞަ ހަރަކާތްތަކެއް ވަނީ ފަށާފައެވެ. ކޮވިޑް-19ގެ ސަބަބުން ބައްދަލުވުންތައް ބޭއްވުން ހުއްޓުމަކަށް އައުމުން މި ސިލްސިލާ މެދުކެނޑިފައިވާއިރު، އައު ނަމެއްގައި ރައްޔިތުންގެ ކަންބޮޑުވުންތައް އަޑުއެހުމަށް "ޖަޒީރާ ސައްލާ" ބާއްވަން ނިންމުމުން މިކަމަށް ތަޢުރީފްކޮށް ސޯޝަލް މީޑިއާގައި ދަނީ ޝުޢޫރު ފާޅުކުރަމުންނެވެ.
