ސޫކީއާ ދެކޮޅަށް އިތުރު ދައުވާތަކެއް ކޮށްފި
2 މާރިޗު 2021 | އަންގާރަ 02:01ސޫކީގެ މައްޗަށް އިތުރު ދައުވާތަކެއް ކޮށްފައިވާކަން އޭނާގެ ވަކީލުން ވަނީ ކަށަވަރު ކޮށްދީފައި
މިޔަންމާގެ ލީޑަރު އަންގ ސަން ސޫކީ
އަސްކަރީ ބަޣާވާތެއްކޮށް މިޔަންމާގެ ލީޑަރު ކަމުން ދުރުކުރި، އަންގް ސަން ސޫކީއާ ދެކޮޅަށް އިތުރު ދައުވާތަކެއް ކޮށްފިއެވެ.
ވީޑިއޯ ކޮންފަރެންސް މެދުވެރިކޮށް މިޔަންމާގެ ވެރިރަށް ނޭޕިޑޯގެ ކޯޓެއްގައި ކުރިޔަށްދިޔަ، އަޑުއެހުމުގައި ސޫކީގެ މައްޗަށް އިތުރު ދައުވާތަކެއް ކޮށްފައިވާކަން އޭނާގެ ވަކީލުންގެ ޓީމުން ވަނީ ކަށަވަރު ކޮށްދީފައެވެ. ނަމަވެސް އޭނާގެ ވަކީލުންގެ ޓީމުން އޭނާގެ މައްޗަށް އުފުލި އައު ދައުވާތައް ހާމަކޮށްފައެއް ނުވެއެވެ.
ސޫކީގެ މައްޗަށް އެންމެ ފުރަތަމަ އުފުލި ދައުވާތަކަކީ ޤަވާއިދާ ޚިލާފަށް ކޮމިއުނިކޭޝަން ރޭޑިއޯތަކެއް އެތެރެކޮށް ގެންގުޅުއްވިކަމުގެ ދައުވާއާއި، އެ ޤައުމުގެ އިމްޕޯޓް އެކްސްޕޯޓް ޤާނޫނުތަކާ ޚިލާފަށް އަމަލު ކުރެއްވިކަމުގެ ކުށުގެ ދައުވާއެވެ.
މިޔަމަންމާގެ އަސްކަރިއްޔާއިން ބަޣާވާތްކޮށް ސޫކީއާއި ސަރުކާރުގެ އިސްވެރިން ބަންދުކުރީ މިޔަންމާގެ ޤާނޫނު ހަދާ މަޖިލީހުގެ އިންތިޚާބުގެ ސޫކީ ނިސްބަތްވާ މިޔަންމާގެ ވެރިކަން ކުރާ ނެޝަނަލް ލީގް ފޯ ޑިމޮކްރަސީ (އެންއެލްޑީ) ޕާޓީން ބޮޑު އަޣްލަބިއްޔަތަކުން ކާމިޔާބު ކޮށްފައިވާކަން އިއުލާން ކޮށްފައިވަނިކޮށެވެ.
ސޫކީގެ އަޑުއެހުން ކުރިޔަށްދިޔަ ވަގުތު މިޔަންމާގެ އެކި ސަރަހައްދުތަކުގައި މުޒާހަރާ ކޮށްފައިވާއިރު މި މުޒާހަރާތަކުގައި 18 މީހެއްގެ ގަޔަށް ފުލުހުން ބަޑި ޖަހާ ވަނީ މަރާލައިފައެވެ.
މިޔަންމާގައި އަސްކަރިއްޔާއިން ބަޣާވާތްކޮށް ސޫކީ ބަންދުކޮށްފައިވާ ކަމުގެ ރިޕޯޓުތައް ފެތުރެމުންދާއިރު، އެޤައުމުގެ ދައުލަތުގެ މީޑިއާ ވެސް ވަނީ އަސްކަރިއްޔާ އިން ހިސާރުކޮށްފައި ކަމަށް ރިޕޯޓުތައް ބުނެއެވެ. އަދި އިންޓަރނެޓްގެ ޚިދުމަތާއި ފޯނުގެ ޚިދުމަތަށް ބުރޫ އަރާފައިވާ ކަމަށްވެސް ރިޕޯޓުތައް ބުނެއެވެ. ޚަބަރުތައް ބުނާގޮތުން މިހާރުވަނީ ރައްޔިތުންގެ މެދުގައި ޚިޔާލު ތަފާތުވެ މުޒާހަރާތައް ފެށުމުން އެ ޤައުމުގައި ސޯޝަލް މީޑިއާ އެޕްތައް ބޭނުންކުރުން މަނާކޮށްފައެވެ. އެގޮތުން މިޔަންމާގައި ވަނީ ފޭސްބުކް، ޓްވިޓަރ އިންސްޓަގްރާމް އަދި ވަޓްސްއެޕް ބޭނުންކުރުން މަނާކޮށްފައެވެ.
