އަހަރުގެ މިހާތަނަށް މަސްވެރިންނަށް 172 މިލިއަން ރުފިޔާ ދޫކޮށްފި
ފެބްރުއަރީ މަހު މަސްވެރިންނަށް 79 މިލިއަން ރުފިޔާ ދޫކޮށްފައިވޭ
ފެލިވަރު މަސް ފެކްޓަރީ
އަހަރުގެ މިހާތަނަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސްވެރިންނަށް 172 މިލިއަން ރުފިޔާ ދޫކޮށްފިއެވެ.
މިފްކޯ އިން ބުނީ މިއަހަރުގެ ޖަނަވަރީ މަހުގެ ތެރޭގައި މަސްވެރިންގެ އަތުން 6179 މެޓްރިކް ޓަނުގެ މަސް ގަނެފައިވާ ކަމަށާއި، އަދި މަސްވެރިންނަށް 93 މިލިއަން ރުފިޔާ ދޫކޮށްފައިވާ ކަމަށެވެ. އަދި ފެބްރުއަރީ މަހު 5106 މެޓްރިކް ޓަނުގެ މަސްގަނެފައިވާއިރު މަސްވެރިންނަށް 79 މިލިއަން ރުފިޔާ ދޫކޮށްފައިވެއެވެ. އެހެންކަމުން އަހަރުގެ މިހާތަނަށް މިފްކޯއިން ވަނީ 11285 މެޓްރިކް ޓަނުގެ މަސްގަނެ މަސްވެރިންނަށް 172 މިލިއަން ރުފިޔާ ދޫކޮށްފައެވެ. މިފްކޯ އިން މިހާރު މަސްވެރިންގެ އަތުން މަސް ގަންނަމުންދަނީ ކިލޯއެއް 16 ރުފިޔާއަށެވެ.
މިފްކޯއިން މަސްވެރިންނަށް 172 މިލިއަން ރުފިޔާ ދޫކޮށްފައިވާއިރު މި ސަރުކާރުން މިފްކޯއާ ހަވާލުވިއިރު މަސްވެރިންނަށް ދަރާފައިވާ ކަމަށާއި، އެހުރިހާ ދަރަނި މިހާރުވާނީ ދައްކާފައި ކަމަށް މިފްކޯގެ ސީއީއޯ އިސްމާއިލް ފައުޒީ ވަނީ ވިދާޅުވެފައެވެ.
މިފްކޯ އިން ގިނަ މަސައްކަތްތަކެއް ކުރަމުން އަންނައިރު ރީ ސްޓްރަކްޗަރ ޕްލޭންތައް ވެސް ވަނީ ހަދާފައެވެ. އެގޮތުން މި ޕްލޭން ނިމޭއިރު ސްޓޯރޭޖް ކެޕޭސިޓީ 10500 ޓަނަށް އިތުރު ކުރެވޭނެ ކަމަށް މިފްކޯއިން ބުންޏެވެ. މީގެ އިތުރުން ބައިން ކެޕޭސިޓީ ވެސް ދުވާލެއްގެ މައްޗަށް 700 ޓަނާއި ހަމައަށް ގަނެވޭނެ ވަރަށް އިތުރުވެގެންދާނެއެވެ.
މިފްކޯގެ ވަސީލަތްތައް ތަރައްޤީކުރުމަށް ކުރިއަށްގެންދާ މަޝްރޫއުގެ ދަށުން ސްޓޯރޭޖް އިތުރު ކުރުމުގެ އިތުރުން، ކޫއްޑޫ އާއި ފެލިވަރުގެ ބަނދަރު ތަރައްގީކުރެވިގެންދާނެ ކަމަށާއި ކޯލްޑް ސްޓޯރޭޖާއި ކޭނިންގ ކެޕޭސިޓީ ވެސް އިތުރު ކުރެވޭނެއެވެ.
