ކެނދިކުޅުދޫގައި 7.6 މިލިއަން ރުފިޔާގެ މަސް ޕްރޮސެސިން ޕްލާންޓެއް
24 ފެބުރުއަރީ 2021 | ބުދަ 07:19މަޝްރޫއުގެ ދަށުން 10 ޓަނުގެ މަސް ސްޓޮކް ކުރެވޭނެ ފިނި ކޮޓަރިއެއް ހުންނާނެ
ކެނދިކުޅުދޫގައި މަސް ޕްރޮސެސިން ޕްލާންޓެއް ގާއިމްކުރުމަށް އެއްބަސްވުމެއްގައި ސޮއިކުރަނީ
އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. އެސް. ޖެއިޝަންކަރު މި މަހު ދިވެހިރާއްޖެއަށް ކުރެއްވި ރަސްމީ ދަތުރުފުޅުގެ ތެރޭގައި، ނ. ކެނދިކުޅުދޫގައި ގޭދޮށު މަސް ޕްރޮސެސިން ޕްލާންޓެއް ގާއިމްކުރުމާ ބެހޭ އެއްބަސްވުމެއްގައި ވަނީ ސޮއިކޮށްފައެވެ. އިންޑިއާގެ ގްރާންޓް އެހީގެ 7.6 މިލިއަން ރުފިޔާގެ ދަށުން ހިންގުމަށް ހަމަޖެހިފައިވާ މި މަޝްރޫއުގެ އިމްޕްލިމެންޓިން އޭޖެންސީއަކީ ނ. ކެނދިކުޅުދޫ ކައުންސިލް އިދާރާއެވެ.
މި މަޝްރޫއުގެ ދަށުން ނ. ކެނދިކުޅުދޫގައި ކަންނެލި އަދި އެހެނިހެން މަސް ގަނެ، ޕްރޮސެސްކުރުމަށް ގާބިލު، އަދި ކުޑަ-ސްކޭލްގެ ގޭދޮށު މަސް ޕްލާންޓެއް ގާއިމްކުރެވޭނެއެވެ. މި ޕްލާންޓްގައި 20 ޓަނުގެ ގަނޑުފެން އުފެއްދުމުގެ ކެޕޭސިޓީގެ އިތުރުން، 10 ޓަނުގެ މަސް ސްޓޮކް ކުރެވޭނެ ފިނި ކޮޓަރިއެއް ހުންނާނެއެވެ. އަދި މި ޕްލާންޓްގައި އެކި ކަހަލަ މަސްކިރާ، ކަނޑައި، ސާފުކޮށް، ފިނިކޮށް، ވެކިއުމްކޮށް ބަންދުކޮށް، ކޮލިޓީ ޓެސްޓުކޮށް ޕްރޮސެސް ކުރުމަށް ބޭނުންވާ ފުރިހަމަ އާލާތްތައް ހުންނާނެއެވެ.
މި މަޝްރޫއުގެ ސަބަބުން ދިވެހި މަސްވެރިންނަށް ހެޔޮ އަގުގައި ހިދުމަތްތައް ލިބި، ވަޒީފާގެ ފުރުސަތުތައް އިތުރުވެ، މަހުގެ އުފެއްދުންތަކުގެ ޕޯޓްފޯލިއޯ އަދި ވެލިއު އިތުރުވެ، މަހުގެ އުފެއްދުންތައް އެކްސްޕޯޓް ކުރެވޭ އަދަދު އިތުރުވެ، ޕްލާންޓް ގާއިމު ކުރެވޭ ރަށާއި ކައިރީގައި ހުންނަ އެހެން ރަށްތަކުގެ ވެސް އިގްތިސާދު ވަރުގަދަވެގެން ދާނެކަމަށް ބެލެވެއެވެ. އަދި މިއީ ކަންނެލި މަހުގެ މާކެޓްގެ ޕްރޮސެސިންއަށް ދިމާވެފައިވާ ކެޕޭސިޓީގެ ދަތިކަން ހައްލުކުރުމަށްޓަކައި ދިވެހި ސަރުކާރުން ކުރާ މަސައްކަތަށް ވަރަށް ވެސް މުހިންމު މަޝްރޫއުއެކެވެ.
ނ. ކެނދިކުޅުދޫގެ މި މަޝްރޫއު އަކީ އިންޑިއާއިން ފޯރުކޮށްދީފައިވާ 200 މިލިއަން ރުފިޔާ (12.5 މިލިއަން ޑޮލަރު)ގެ ދަށުން އިންޑިއާ އާއި ދިވެހިރާއްޖެ ގުޅިގެން ހިންގުމަށް ހަމަޖެހިފައިވާ ކުދި އަދި މެދު ފަންތީގެ 30 ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓް (އެޗް.އައި.ސީ.ޑީ.ޕީ)ތަކުގެ ތެރެއިން އެއް މަޝްރޫއުއެވެ.
އެޗް.އައި.ސީ.ޑީ.ޕީ ތަކަކީ އިންޑިއާ އާއި ދިވެހިރާއްޖެއާ ދެމެދުގައިވާ ތަރައްގީގެ ޑައިނެމިކް ގުޅުމުގެ މުހިންމު އެއް ތަނބެވެ. މި ޕްރޮޖެކްޓްތަކަކީ ރަށްތަކުގެ ރައްޔިތުންގެ ބޭނުންތައް ދެނެގަނެ، އެ ބޭނުންތައް ފުއްދުމަށްޓަކައި ފަންޑްކުރެވި، ލޯކަލްކައުންސިލްތަކާއި މިނިސްޓްރީތަކުގެ ބެލުމުގެ ދަށުން ހިންގޭ ޕްރޮޖެކްޓްތަކެކެވެ.
