ޓެލިކިލާސްއަށް އޭޝިޔާ ސަރަހައްދުގެ އެވޯޑެއް ލިބިއްޖެ
21 ފެބުރުއަރީ 2021 | އާދީއްތަ 14:57މިއީ ރާއްޖެއިން މި އެވޯޑް ހާސިލް ކުރި ފުރަތަމަ ފަހަރު
ދަރިވަރަކު ޓެލިކިލާހުން ކިޔަވަނީ، މިޕްރޮގްރާމް ފަށާފައިވަނީ ކޮވިޑް-19އާ ގުޅިގެން ދަރިވަރުންގެ ކިޔެވުން މެދުކަނޑާނުލާ ކުރިއަށް ގެންދިއުމުގެ މަގުސަދުގައި
ކޮވިޑް-19އާ ގުޅިގެން ސްކޫލުތައް ބަންދުކުރުމަށްފަހު އެޑިޔުކޭޝަން މިނިސްޓްރީން ކުރިއަށް ގެންދިޔަ ''ޓެލިކިލާސް'' އަށް އޭޝިޔާ ސަރަހައްދުގެ އެވޯޑެއް ލިބިއްޖެއެވެ.
ޝަރަފުވެރި މިއެވޯޑު ލިބުމާއެކު އެޑިޔުކޭޝަން މިނިސްޓަރު ޑރ.އައިޝަތު އަލީ ވަނީ ޓެލިކިލާސް ޕްރޮޖެކްޓް ކުރިއަށް ގެންދިއުމުގައި އެހީތެރިކަން ފޯރުކޮށްދިން ހުރިހާ ފަރާތްތަކަށް ޚާއްސަ ޝުކުރެއް އަދާކުރައްވާފައެވެ. މިއީ ރާއްޖެއިން މި އެވޯޑް ހާސިލް ކުރި ފުރަތަމަ ފަހަރެވެ.
އެޑިޔުކޭޝަން މިނިސްޓްރީން ބުނީ މި އެވޯޑަކީ އޭޝިއާ ޕެސިފިކް ސަރަހައްދުގެ 'ވެންހުއި އެވޯޑް ފޮރ އެޑިޔުކޭޝަނަލް އިނޮވޭޝަން 2020' އެވޯޑް ކަމަށެވެ. އަދި މިއެވޯޑާއެކު ރާއްޖެއަށް 20،000 ޑޮލަރު ލިބިފައިވާ ކަމަށް މިނިސްޓްރީން ބުނެއެވެ.
ވެންހުއި އެވޯޑަކީ ޔުނެސްކޯ އޭޝިއާ ޕެސިފިކް ޕްރޮގްރާމް އޮފް އެޑިޔުކޭޝަނަލް އިނޮވޭޝަން ފޮރ ޑިވެލޮޕްމެންޓާއި، ނޭޝަނަލް ކޮމިޝަން އޮފް ދަ ޕީޕަލްސް ރިޕަބްލިކް އޮފް ޗައިނާ ފޮރ ޔުނެސްކޯ ގުޅިގެން 2010 ވަނަ އަހަރުން ފެށިގެން ކޮންމެ އަހަރަކުވެސް ދެމުން އަންނަ އެވޯޑެކެވެ. މި އެވޯޑްގެ މަގުސަދަކީ އޭޝިއާ ޕެސިފިކް ސަރަހައްދުގައި ތައުލީމީ ދާއިރާ ކުރިއެރުވުމަށް އީޖާދީގޮތެއްގައި ފާހަގަކޮށްލެވޭ ޚިދުމަތްތަކެއް ކުރާ މީހުންނާއި އިދާރާތަކުގެ އަގު ވަޒަންކޮށް އެ ފަރާތްތަކަށް ހިތްވަރު ދިނުމެވެ.
ދަރިވަރުންގެ އުނގެނުން ހުއްޓާނުލައި ކުރިއަށް ގެންދިއުމުގެ ގޮތުން ޓެލިކިލާސް ފެށީ 15 މާރިޗު 2020ގައެވެ. މި ޕްރޮގްރާމް ދަރިވަރުންނާ ހަމައަށް ފޯރުކޮށް ދިނުމުގައި ޕީއެސްއެމްގެ މުންނާރު ޗެނަލާއި، ޔެސްޓީވީ އާއި ދިވެހި ޗެނަލްއިން ވެފައިވާ އެހީތެރިކަން މިނިސްޓްރީން ފާހަގަކުރެއެވެ. އަދި މިހާރުގެ ކޮވިޑް-19ގެ ހާލަތު ގޯސްވުމާއި ގުޅިގެން ބައެއް ގްރޭޑްތަކުގެ ކިޔެވުން މެދުކަނޑާލާފައިވާތީ ޓެލިކިލާސް އަލުން ދެއްކުމަށް ދަނީ ތައްޔާރުވަމުންނެވެ.
ސްކޫލްތަކުގެ މެނޭޖްމެންޓާއި ޓީޗަރުންގެ އުފެއްދުންތެރިކަމާއި، ބެލެނިވެރިންގެ އިތުރުން ދަރިވަރުންގެ ފަރާތުން ލިބުނު އެހީތެރިކަން މިނިސްޓްރީން ފާހަގަކޮށް ބުނެފައިވަނީ ކުރިއަށް އޮތްތަނުގައި ވެސް މިފަދަ މަސައްކަތްތަކުގައި އެންމެން ގުޅިގެން މަސައްކަތް ކުރުމަށް އެދޭ ކަމަށާއި، ގުޅިގެން މަސައްކަތް ކުރާނަމަ މަގުސަދު ހާސިލްވެ ރަނގަޅު ނަތީޖާތަކެއް ނެރެވޭނެ ކަމަށެވެ.
