ކޮވިޑް-19ށް ފަރުވާ ހޯދަމުންދިޔަ އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ދަރުމަވަންތަ ހޮސްޕިޓަލްގެ ޑީއެޗް-11ގައި ފަރުވާ ދެމުންދިޔަ އުމުރުން ދުވަސްވީ އަންހެނެއް ހުކުރު ދުވަހުގެ ރޭ 1:04 ހާއިރު ނިޔާވެފައިވާ ކަމަށެވެ. އެއީ 63 އަަހަރުގެ އަންހެނެއް ކަމަށް އެޗްޕީއޭއިން ބުނެއެވެ.
ކޮވިޑް-19ގެ ކޭސްތައް އިތުރުވަމުންދާ ދަނޑިވަޅުގައި، އުމުރުން ދުވަސްވީ މީހުން މިބަލީގައި ނިޔާވާ މިންވަރު މިވަނީ އިތުރުވާން ފަށާފައެވެ. މިއީ މިހާތަނަށް މިބަލީގައި ރާއްޖެއިން ނިޔާވި 59 ވަނަ މީހާއެވެ. ހާލު ބޮޑުވެ 159 މީހަކަށް މިހާރުވެސް ދަނީ އެޑްމިޓްކޮށް ފަރުވާ ދެމުންނެވެ.
ރާއްޖެއަށް ކޮވިޑް-19ގެ ތިން ވަނަ ރާޅު އައިސްފައިވާއިރު، ހާލަތު ވަރަށް ގޯސްކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) ބުނެއެވެ. އެހެންކަމުން ބަލިން ރައްކާތެރިވުމަށް އަޅާފައިވާ ފިޔަވަޅުތަކަށް ޚާއްސަ ސަމާލުކަމެއް ދިނުމަށް އިލްތިމާސްކޮށްފައިވެއެވެ.
