ލައިސަންސް ދޫކުރުމާއި ވެހިކަލް ރަޖިސްޓްރީ ކުރުމުގެ ކަންކަމުގައި ކޮރަޕްޝަނުގެ ވަރަށް ބޮޑެތި އަމަލުތަކެއް!
18 ފެބުރުއަރީ 2021 | ބުރާސްފަތި 16:14ނެޝަނަލް އެންޓި ކޮރަޕްޝަން ޕޮލިސީ އެކުލަވާލުމާ ގުޅޭ ގޮތުން ވަރަށް ގިނަ ފަރާތްތަކާ އެކު މަޝްވަރާކޮށްފައިވޭ
މާލޭގައި ޕާކުކޮށްފައި ހުރި ވެހިކަލްތަކެއް،
ރާއްޖޭގައި ލައިސަންސް ދޫކުރުމާއި ވެހިކަލް ރަޖިސްޓްރީ ކުރުމުގެ ކަންކަމުގައި ވަރަށް ބޮޑެތި ކޮރަޕްޝަނުގެ އަމަލުތައް ފާހަގަކުރެވިފައިވާ ކަމަށް އެންޓި ކޮރަޕްޝަން ކޮމިޝަނުން ބުނެފި އެވެ.
ބުދަ ދުވަހު ބޭއްވި މިނިވަން މުއައްސަސާތަކާ ބެހޭ ކޮމިޓީގެ ބައްދަލުވުމުގައި އޭސީސީގެ ކޮންސަލްޓެންޓް ޑރ. ސިމާދު ސައީދު ވިދާޅުވީ ނެޝަނަލް އެންޓި ކޮރަޕްޝަން ޕޮލިސީ އެކުލަވާލުމާ ގުޅޭ ގޮތުން ވަރަށް ގިނަ ފަރާތްތަކާ އެކު މަޝްވަރާކޮށްފައިވާ ކަމަށެވެ.
އެހެން މުއައްސާސާތަކުން އެއްކޮށްފައި ހުރި މައުލޫމާތުތަކަށް ބަލާއިރު އެންމެ ބޮޑަށް ކޮރަޕްޝަން އެކުލެވޭ މައްސަލައެއްގެ ގޮތުގައި ފާހަގަ ކުރެވުނީ ލައިސަންސް ދިނުމުގެ އުސޫލު ކަމަށް ޑރ ސިމާދު ވިދާޅުވިއެވެ. އަދި ވިދާޅުވީ އެއްގަމު އުޅަނދު ދުއްވުމުގެ ލައިސަންސްގެ ކަންކަމުގެ އިތުރުން ޕްރޮޕަޓީ ރެޖިސްޓްރޭޝަން އަދި ވިސާ ދޫކުރުމުގެ ކަންކަމުގައި ކޮރަޕްޝަނުގެ އަމަލުތައް ގިނަ ކަމަށެވެ.
މީގެ އިތުރުން ޑރ ސިމާދު ވިދާޅުވީ ކޮރަޕްޝަނުގެ މި މައްސަލަތަކަކީ ވަރަށް ދުވަސްވީ މައްސަލަތަކެއް ކަމަށާއި، ހައްލު ކުރުމަށް ވެސް ގިނަ މަސައްކަތްތަކެއް ކުރަން ޖެހޭ ކަމަށެވެ. އެގޮތުން ލައިސަންސް ދިނުމުގެ މުޅި ސިސްޓަމް ޑިޖިޓައިޒް ކުރަން ޖެހޭ ކަމަށް ފާހަގަކުރެއްވިއެވެ.
ޑރ ސިމާދު ވިދާޅުވީ މިހާރު ޓްރާންސްޕޯޓް އޮތޯރިޓީގައި ބޭނުން ކުރާ ސިސްޓަމަކީ ރަނގަޅު ސިސްޓަމެއް ނޫން ކަމަށާއި، ސިސްޓަމްގެ ތެރެއިން ގިނަ ބަޔަކަށް މައުލޫމާތު އޮޅުވާލުމުގެ ފުރުސަތު ލިބޭ ކަމަށެވެ. އަދި ކޮރަޕްޝަން ހުއްޓުމުގެ ގޮތުން ޑިސެންޓްރަލައިޒް ކޮށްގެން ވެސް އެޚިދުމަތް ދިނުމަކީ ކޮރަޕްޝަން ހުއްޓުވޭނެ އެއްގޮތް ކަމަށެވެ.
ލައިސަންސް ދޫކުރުމާއި ވެހިކަލް ރަޖިސްޓްރީ ކުރުމުގައި ބޮޑު ކޮރަޕްޝަނެއް އެކުލެވޭކަން އޭސީސީން ހާމަކޮށްފައިވާއިރު، ޓެސްޓު ނުހަދާ ލައިސަންސް ނެގުމާއި، އޮޅުވާލައިގެން ރަޖިސްޓްރީކުރާ މައްސަލައަކީ ޒަމާނުއްސުރެ ދައްކަމުންދާ ވާހަކަތަކަކެވެ. މިހާތަނަށް އެއްވެސް ސަރުކާރެއްގައި މި މައްސަލަތަކަށް ހައްލު ގެނައުމަށް އަމަލީ ސިފައެއްގައި އެއްވެސް މަސައްކަތެއް ކޮށްފައި ނުވެއެވެ.
