ލައިޕްޒީގް ބަލިކޮށް ލިވަޕޫލް ކުއާޓާއާ ގާތަށް

ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ރަށުން ބޭރުގައި އާރްބީ ލައިޕްޒީގް ބަލިކޮށް، މުބާރާތުގެ ކުއާޓާ ފައިނަލާ ގާތަށް ލިވަޕޫލް ޖެހިލައިފިއެވެ.

އަންގާރަ ދުވަހުގެރޭ ކުޅުނު މެޗުން ލިވަޕޫލް މޮޅުވީ 2-0 ގެ ނަތީޖާއަކުންނެވެ.

މީގެ ކުރިން ޖަރުމަނުގައި ކުޅެން ތާވަލުކުރި މި މެޗު ކުޅެފައިވަނީ ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގައެވެ. މި މެޗު ހަންގޭރީއަށް ބަދަލުކުރީ ކޮވިޑް-19 އާ ގުޅިގެން ޖަރުމަނުން ދާދި ފަހުން ކަނޑައެޅި އުސޫލުތަކާ ގުޅިގެން، ލައިޕްޒީގުގެ އަމިއްލަ ދަނޑުގައި މި މެޗު ކުޅެވޭ ގޮތް ނުވުމުންނެވެ.

އަންގާރަ ދުވަހުގެރޭ ކުޅުނު މެޗުގައި ލިވަޕޫލުން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ޓީމަށް ވަނީ ލީޑު ނަގަން ރަނގަޅު ފުރުސަތުތަކެއް ލިބި ބޭކާރުވެފައެވެ. މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން އަށްވަނަ މިނެޓުގައި ލިވަޕޫލުން ވަނީ ލީޑު ނަގާފައެވެ. ލައިޕްޒީގުގެ މާސެލް ސަބިޓްޒާ ހެދި ގޯހެއްގެ ފައިދާ ނަގައި މި ލަނޑު ލިވަޕޫލަށް ކާމިޔާބުކޮށްދިނީ މުޙައްމަދު ސަލާހެވެ.

އަދި އޭގެ ފަސް މިނެޓު ފަހުން ސަޑިއޯ މާނޭ ވަނީ އިތުރު ލަނޑެއް ޖަހައި ލިވަޕޫލަށް ލީޑު ފުޅާކޮށްދީފައެވެ. އޭނާ މި ލަނޑު ކާމިޔާބުކުރީ ލައިޕްޒީގުގެ ނޯޑީ މަކިއޭލީ ހެދި ގޯހެއްގެ ފައިދާ ނަގައިގެންނެވެ.

ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ރަށުން ބޭރުގައި ކުޅުނު މެޗުން ލިވަޕޫލް މޮޅުވިއިރު، ދެވަނަ ލެގުގައި މި ދެ ޓީމު ބައްދަލުކުރާ މެޗު އޮންނާނީ ލިވަޕޫލުގެ ދަނޑުގައި އަންނަ މާޗު މަހުގެ 11 ވަނަ ދުވަހުއެވެ.