އެމްޑީޕީއަކީ އަބަދުވެސް އިންތިޚާބުތަކަށް ތައްޔާރަށް އޮންނަ ޕާޓީއެއް ކަމަށާއި، ލާމަރުކަޒީ ނިޒާމު ފުރިހަމައަށް ހިނގައިގަތުމަށް، ފުރަތަމަ މަރުޙަލާގައި އެކަން ދަންނަ ބަޔަކު ހަވާލުވާން ޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީ ޤައުމީ މަޖިލީހުގެ 172 ވަނަ ބައްދަލުވުމުގައި ރައީސް ސޯލިހު ވިދާޅުވީ ކުރިއަށް އޮތް އިންތިޚާބު ކާމިޔާބު ކުރުމަކީ ވަރަށް މުހިންމުކަމެއް ކަމަށެވެ. ލާމަރުކަޒީ ގާނޫނަށް ބޮޑެތި ބަދަލުތަކެއް ގެނެވިފައިވާކަން ފާހަގަކުރައްވައި ރައީސް ސޯލިހު ވިދާޅުވީ ލާމަރުކަޒީ ނިޒާމު ފުރިހަމައަށް ހިނގައިގަތުމަށް، ފުރަތަމަ މަރުޙަލާގައި އެކަން ދަންނަ ބަޔަކު ޙަވާލުވާން ޖެހޭ ކަމަށާއި، އެކަން ކުރެވޭނީ އެމްޑީޕީއަށް ކަމަށެވެ.
ރައީސް ސޯލިހު ވިދާޅުވީ ލާމަރުކަޒީ ގާނޫނަށް މިގެނައި ބަދަލުތަކާއެކު ލިބުނު އިދާރީ ބާރުވެރިކަމާއި މާލީ ބާރުވެރިކަމުގެ ފުރިހަމަ ފޮނި މޭވާ ރައްޔިތުންނާއި ހިސާބަށް ގެނެސްދެވޭނީ ކުރިއަށް މިއޮތް ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތީޚާބު (ޑަބްލިޔުޑީސީ) އިންތިޚާބު އެމްޑީޕީއަށް ކާމިޔާބު ކުރެވިގެން ކަމަށެވެ. އަދި 80 އިންސައްތަ ގޮނޑި ކާމިޔާބު ކުރެވޭނެކަމުގެ ޔަގީންކަން އެމަނިކުފާނު ދެއްވިއެވެ.
އެމްޑީޕީއަކީ އަބަދުވެސް އިންތިޚާބުތަކަށް ތައްޔާރަށް އޮންނަ ޕާޓީއެއްކަން ފާހަގަކުރައްވައި ރައީސް ސޯލިހު ވިދާޅުވީ އެމްޑީޕީއަކީ ކެންޕެއިންތައް ކުރުމާއި އިންތިޚާބުތަކަށް ފަރިތަ ޕާޓީއެއް ކަމަށެވެ.
މީގެ އިތުރުން ރައީސް ސޯލިހު ވިދާޅުވީ، ވެރިކަމުގައި ތިބެ ކެމްޕެއިން ކުރަންޖެހޭ ގޮތާއި، އިދިކޮޅުގައި ތިބެ ކެމްޕެއިން ކުރަންޖެހޭ ގޮތް ތަފާތުވާ ކަމަށެވެ. އެގޮތުން ވެރިކަމުގައި ތިބޭއިރު ކުރިމަތިވާ ސުވާލުތައް ތަފާތުވާނެ ކަމަށް އެމަނިކުފާނު ވިދާޅުވިއެވެ. ކޮށްދިނީ ކޮންކަމެއްތޯ އެއީ ކުރިމަތިވާނެ އެއްސުވާލުކަން ފާހަގަކުރައްވައި ރައީސް ސޯލިހު ވިދާޅުވީ މިސުވާލުތަކަށް ދޭނެ ފުރިހަމަ ޖަވާބު އެބަހުރި ކަމަށެވެ.
ވޭތުވެދިޔަ ދެއަހަރުގެ ތެރޭގައި ކޮވިޑް-19ގެ ދަތި އުދަނގުލުގެ ތެރޭގައި ވެސް ރާއްޖޭގެ އެކި ސަރަހައްދުތަކުގައި އެކި ދާއިރާގައި ގިނަ މަސައްކަތްތަކެއް ކުރެވިފައި. އިންތިޚާބުގެ ތެރޭގައި ކެންޕޭންގެ ތެރޭގައި އަޅުގަނޑުމެންގެ އެއްއަމާޒަކަށްވާންވީ ދާއިރާތަކަށް ކޮށްދެވިފައިހުރި މިކަންތައްތައް ހާމަކުރުން. މިހާތަނަށް ކުރެވުނު މަސައްކަތުން އިތުރު މަސައްކަތްތަކެއް އަޅުގަނޑުމެން މިކަމުގައި ކުރަންޖެހޭ ކަމަށް އަޅުގަނޑު ދެކެން. އަޅުގަނޑު މިހުރީ ތިބޭފުޅުންނާއެކު ކެންޕޭނަށް ވަގުތު ހުސްކުރަން ތައްޔާރަށް. އަދި ވަޒީރުންނާއި، ސަރުކާރު މިއޮތީ އިންތިޚާބު ކާމިޔާބު ކުރުމަށް ކުރެވެން ހުރި ހުރިހާ މަސައްކަތެއް ކުރަން ތައްުޔާރަށް.ރައީސް އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ ކޮވިޑް-19އާ ގުޅިގެން ދަތިތައް ކުރިމަތިވިކަމުގައިވީ ނަމަވެސް ކަނޑައަޅާފައިވާ އުސޫލުތަކާއި އެއްގޮތަށް އަމަލުކޮށްފިކަމުގައިވާނަމަ އަންނަ މަހުގެ މެދެއްހާ ހިސާބުގައި ކޭސްތައް ކޮންޓްރޯލް ކުރެވޭނެކަމުގެ އުންމީދު އެބަ އޮތް ކަމަށެވެ. އެހިސާބުގައި އަތޮޅުތެރޭގައި ވެސް މާލޭގައި ފުޅާ ދާއިރާއެއްގައި އުސޫލުގެ ތެރެއިން ކެންޕޭންގެ ހަރާކާތްތައް ކުރިއަށް ގެންދެވޭނެ ކަމަށް އެމަނިކުފާނު ވިދާޅުވިއެވެ.
