ހާލަތަށް ބެލުމަށްފަހު މިހާރު އަޅަމުން ދަނީ އެންމެ އެކަށީގެންވާ ފިޔަވަޅުތައް: އެޗްއީއޯސީ
13 ފެބުރުއަރީ 2021 | ހޮނިހިރު 07:50ލޮކްޑައުންއަށް ނުގޮސް އިތުރު ފިޔަވަޅުތަކާއެކު ކޮންޓްރޯލް ކުރެވޭނެ
މާލެސިޓީގެ ބޮޑުތަކުރުފާނު މަގު، ކާފިއު ވަގުތުގައި ފުލުހުން މަގުތައް މޮނިޓަރ ކުރަމުންދޭ
ކޮވިޑް-19 ހަލުވި މިނެއްގައި ފެތުރެމުންދާއިރު ރައްކާތެރިވުމުގެ ގޮތުން މިހާރު އަޅައިފައިވާ ފިޔަވަޅުތަކަކީ ހާލަތަށް ބެލުމަށްފަހު އެންމެ އެކަށީގެންވާ ބޭނުންތެރި ފިޔަވަޅުތައް ކަމަށް ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.
ހުކުރު ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫއްޕުގައި ހިމެނިވަޑައިގަންނަވާ ޑރ. އަލީ ލަތީފް ވިދާޅުވީ ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަޅަމުންދާ ފިޔަވަޅުތަކަކީ ހާލަތަށް ބެލުމަށްފަހު އަޅަމުންދާ އެންމެ އެކަށީގެންވާ ފިޔަވަޅުތައް ކަމަށާއި، އިތުރަށް ވެސް ފިޔަވަޅު އަޅަން ޖެހޭ ހާލަތްތަތަކުގައި ފިޔަވަޅު އަޅާނެ ކަމަށެވެ.
ލޮކްޑައުންއަށް އަލިއަޅުއްވާލައްވާ ޑރ. އަލީ ލަތީފް ވިދާޅުވީ ލޮކްޑައުންއަކަށް ވަރަށް ގިނަ ގައުމުތަކުންދާ ކަމަށާއި، ލޮކްޑައުންއާއެކު ރަނގަޅު ނަތީޖާތަކެއް ވެސް ނެރެވޭ ކަމަށެވެ. އަދި އެންމެ ފުރަތަމަ ކޭސްތައް ފެނުމާއެކު މާލެ ސިޓީ ލޮކްޑައުން ކުރުމާއެކު ކޮންޓްރޯލް ވެގެންދިޔަކަން ޑރ. އަލީ ލަތީފް ފާހަގަކުރެއްވިއެވެ. އޭރުގެ ހާލަތާއި މިހާރުގެ ހާލަތު އަޅާ ނުކިޔާނެކަން ފާހަގަކުރައްވައި ޑޮކްޓަރު ވިދާޅުވީ އޭރު ރާއްޖެއިން ދިޔައީ ކޮވިޑަށް ތައްޔާރުވަމުން ކަމަށާއި، ލޮކްޑައުންއާއެކު ވަގުތު ލިބި ވަރަށް ގިނަ މަސައްކަތްތައް ކުރެވުނު ކަމަށެވެ.
އެގޮތުން ފެސިލިޓީތައް ގާއިމް ކުރެވި އެނދުގެ ކެޕޭސިޓީ އިތުރު ކުރެވުނު ކަމަށެވެ. އަދި ވިދާޅުވީ ލޮކްޑައުންއާއެކު ވަރަށް ގިނަ އެހެނިހެން މައްސަލަތައް ކުރިމަތިވާތީ މިހާރު މަސައްކަތް ކުރަމުންދަނީ ލޮކްޑައުންއަކަށް ނުގޮސް ބަލި ކޮންޓްރޯލް ކުރުމަށް ކަމަށެވެ. އަދި ފިޔަވަޅުތައް ހަރުކަށި ކުރެވި ތަންފީޒު ކުރެވިއްޖެނަމަ ބަލި ކޮންޓްރޯލް ކުރެވޭނެ ކަމަށް ޑރ. އަލީ ލަތީފް ވިދާޅުވިއެވެ.
ރާއްޖޭގެ ކޮވިޑް-19ގެ ހާލަތަށް ބަލާއިރު، މިހާތަނަށް 17،507 މީހުން ކޮވިޑަށް ޕޮޒިޓިވްވެފައިވެއެވެ. މިވަގުތު ބައްޔަށް ފަރުވާ ހޯދަމުންދަނީ 2،302 މީހުންނެވެ. މީގެ ތެރެއިން 206 މީހުންނަށް ފަރުވާދެމުންދަނީ އެޑްމިޓްކޮށްގެންނެވެ.
ކޭސްތައް އިތުރުވަމުންދާތީ އެޗްއީއޯސީން ދަނީ އަޅާފައިވާ ފިޔަވަޅުތައް އިތުރަށް ހަރުކަށި ކުރަމުންނެވެ. އެގޮތުން ރޭގަނޑު 11:00ން 4:30ށް މާލެ ސަރަހައްދުގައި ދަނީ ކާފިއު ހިންގަމުންދާއިރު، އިރުއޮއްސި 6:00ން ހެނދުނު 6:00ށް އުޅަނދު ދުއްވުން މަނާކޮށްފައިވެއެވެ. އަދި އެއްފަހަރާ ދިހަ މީހުންނަށްވުރެ އިތުރަށް އެއްވެ އުޅުން ވެސް ވަނީ މަނާކޮށްފައެވެ.
