ބިދޭސީންގެ ވަރކް ޕަރމިޓް ދޫކުރަން ހޯމަ ދުވަހު ފަށަނީ
12 ފެބުރުއަރީ 2021 | ހުކުރު 10:18ވަރކް ޕަރމިޓް ދޫކުރެވޭނީ، އިކޮނޮމިކް މިނިސްޓްރީން ބިދޭސީންގެ ވެރިފިކޭޝަނެއް ފުރިހަމަކުރުމަށް ފަހު
ރާއްޖޭގައި މަސައްކަތްކުރާ ބިދޭސީންތަކެއް
ރާއްޖޭގައި ވަޒީފާ އަދާކުރާ ބިދޭސީންނަށް ވަރކް ޕަރމިޓް ދޫކުރަން ފެބްރުއަރީ 15 ގައި ފަށާނެ ކަމަށް އިކޮނޮމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން ނެރެފައިވާ ބަޔާނެއްގައި ބުނެފައި ވަނީ ރާއްޖޭގައި ބިދޭސީން ވަޒީފާ އަދާކުރުމާބެހޭ ގަވައިދުގެ 15 ވަނަ މާއްދާގައި ބަޔާންކޮށްފައިވާ ގޮތަށް 15 ފެބްރުވަރީ 2021 ވަނަ ދުވަހުން ފެށިގެން އެ މިނިސްޓްރީން ވަރކް ޕަރމިޓް ދޫކުރަން ފަށާނެކަމަށެވެ.
އެގޮތުން ރާއްޖޭގައި ބިދޭސީން ވަޒީފާ އަދާކުރުމާބެހޭ ގަވައިދުގައި ބަޔާންކުރާ ގޮތަށް ވަރކް ޕަރމިޓް ދޫކުރެވޭނީ، އިކޮނޮމިކް މިނިސްޓްރީން ބިދޭސީންގެ ވެރިފިކޭޝަނެއް ފުރިހަމަ ކުރުމަށް ފަހުކަމަށާއި، އެކްސްޕެޓް ސިސްޓަމް މެދުވެރިކޮށް ވެރިފިކޭޝަން ފުރިހަމަ ކުރެވޭނެ ކަމަށް އެ މިނިސްޓްރީން ބުނެއެވެ.
އިކޮނޮމިކް މިނިސްޓްރީން ބުނީ ވެރިފިކޭޝަން ފުރިހަމަ ކުރުމަށް އެޕޮއިންޓްމެންޓެއް ހެދުމަށްފަހު، ވަޒީފާދޭ ފަރާތުން ނުވަތަ އެ ފަރާތުން އައްޔަންކުރާ އެހެން ފަރާތަކުން، ހުރަވީ ބިލްޑިންގެ 3 ވަނަ ފަންގިފިލާގައި ހުންނަ އިކޮނޮމިކް މިނިސްޓްރީގެ އެމްޕްލޯއިމަންޓް ރަޖިސްޓްރޭޝަން ސެކްޝަންގެ ކައުންޓަރަށް ބިދޭސީން ގެންދަން ޖެހެއެވެ.
ބިދޭސީން ރާއްޖެ އެތެރެވާ ދުވަހުން ފެށިގެން، ވަރކް ޕަރމިޓް ހޯދަން ކަނޑައެޅިފައިވާ މުއްދަތު ހަމަވަންދެން ކޮންމެ ދުވަހަކުވެސް ވެރިފިކޭޝަންގެ ޚިދުމަށް ހޯދޭނެ ކަމަށް އެ މިނިސްޓްރީން ބުނެއެވެ.
އެ މިނިސްޓްރީން ބުނީ މި ތާރީޚުން ފެށިގެން، ރާއްޖޭގައި ވަޒީފާ އަދާކުރުމަށް އަލަށް ގެނެވޭ ބިދޭސީންނާއި ފެބްރުވަރީ 14 ވަނަ ދުވަހުގެ ނިޔަލަށް ގެނެވިފައިވާ ބިދޭސީންނަށް، ރާއްޖޭގައި ބިދޭސީން ވަޒީފާ އަދާކުރުމާބެހޭ ގަވައިދުގައި ބަޔާންކޮށްފައިވާ ގޮތަށް ވަރކް ޕަރމިޓް ހޯދަން ޖެހޭނެކަމަށެވެ. އަދި ފެބްރުއަރީ 15 ވަނަ ދުވަހުން ފެށިގެން މިހާރު ދޫކުރަމުންދާ "އެމްޕްލޯއިމަންޓް އެޕްރޫވަލް" ދޫކުރުން ހުއްޓާލެވޭނެކަމަށާއި، ރާއްޖޭގައި ވަޒީފާ އަދާކުރުމަށް ގެނެވޭ ބިދޭސީންނަށް ރާއްޖެ ވަނުމުގެ ހުއްދައެއްގެ ގޮތުގައި، "ވަރކްޕަރމިޓް އެންޓްރީ ޕާސް" ދޫކުރެވޭނެކަމަށް ވެސް މިނިސްޓްރީން ބުނެއެވެ.
މި ބަދަލު ގެނެވުނު ނަމަވެސް، ފެބްރުވަރީ 14 ވަނަ ދުވަހުގެ ނިޔަލަށް، ދޫކޮށްފައިވާ އެމްޕްލޯއިމަންޓް އެޕްރޫވަލްތަކުގެ ތެރެއިން، 90 ދުވަސް ހަމަވެފައިނުވާ އެމްޕްލޯއިމަންޓް އެޕްރޫވަލްގެ ދަށުން، ރާއްޖޭގައި ވަޒީފާ އަދާކުރުމަށް ގެނެވޭ ބިދޭސީންނަށް، ރާއްޖެ އެތެރެވޭވެނެކަމަށް އިކޮނޮމިކް މިނިސްޓްރީން ބުނެއެވެ.
ވަރކް ޕަރމިޓް ފީގެ ގޮތުގައި މަހަކަށް 350 ރުފިޔާ ދައްކަން ޖެހޭ އިރު، މި ފީ ބަލައިގަނެވޭނީ، އެކްސްޕެޓް ސިސްޓަމް މެދުވެރިކޮށް އޮންލައިންކޮށް ކަމަށާއި ވަރކް ޕަރމިޓް ކާޑް އިކޮނޮމިކް މިނިސްޓްރީގެ ކައުންޓަރުތަކުން އެޕޮއިންޓްމެންޓް ހައްދައިގެން ލިބޭނެ އިންތިޒާމްތައް ހަމަޖެހިފައިވާ ކަމަށް މިނިސްޓްރީން ބުނެއެވެ.
ރާއްޖޭގައި ބިދޭސީން ވަޒީފާ އަދާކުރުމާބެހޭ ގަވައިދުގެ 15 ވަނަ މާއްދާ ބުނާގޮތުން ބިދޭސީންނަށް ރާއްޖޭގައި ވަޒީފާ އަދާކުރުމަށް ހުރެވޭނީ، ވަޒީފާ އަދާކުރާ މުއްދަތުގައި ރާއްޖޭގައި ހުރުމުގެ ހުއްދަ ނުވަތަ ވަރކް ޕަރމިޓް ހޯދުމަށްފަހުއެވެ. އެގޮތުން ވަރކް ޕަރމިޓް ދޫކުރެވޭނީ ރާއްޖޭގައި ވަޒީފާ އަދާކުރާ ބިދޭސީ ފަރާތް ރާއްޖެ އައުމުގެ ކުރިން އަދި ރާއްޖެ އައުމުގެ ފަހުން ފުރިހަމަކުރަންޖެހޭ ކަންކަން ފުރިހަމަކުރުމުންނެވެ.
ރާއްޖޭގައި ވަޒީފާ އަދާކުރާ ބިދޭސީ ފަރާތް ރާއްޖެ އައުމުގެ ކުރިން، ވަރކް ޕަރމިޓަށް އެދި ހުށަހަޅަންޖެހޭ ލިޔެކިޔުންތައް ހުށަހަޅައި، ވަޒީފާ އަދާކުރުމަށް ރާއްޖެއަށް އެތެރެވުމަށް ދޫކުރާ ވަރކް ޕަރމިޓް އެންޓްރީ ޕާސް ހޯދަންޖެހެއެވެ. ރާއްޖޭގައި ވަޒީފާ އަދާކުރާ ބިދޭސީ ފަރާތް ރާއްޖެ އައުމަށްފަހު، ފުރިހަމަކުރަންޖެހޭ ކަންތައްތައް ފުރިހަމަކޮށް ވަރކް ޕަރމިޓް ހޯދަންޖެހެއެވެ. އަދި ވަރކް ޕަރމިޓް ހޯދާފައިވާ މުއްދަތަށް، ވަރކް ޕަރމިޓް ފީ ދައްކަންޖެހެއެވެ.
ރާއްޖޭގައި މަސައްކަތްކުރާ ބިދޭސީންނަށް ވަރކް ޕަރމިޓް ދޫކުރެވޭނީ ޕްރޮފެޝަނަލް އެންޑް މެނީޖީރިއަލް ކެޓަގަރީ، ނޮން-ޕްރޮފެޝަނަލް ކެޓަގަރީ އަދި ޑޮމެސްޓިކް ކެޓަގަރީ އަށެވެ.
