ކޮވިޑް-19އަށް އިތުރު 186 މީހުން ޕޮޒިޓިވްވެއްޖެ
އަތޮޅު ތެރެއިން 14 މީހަކު ވަނީ ޕޮޒިޓިވްވެފައި
ކޮވިޑް-19ގެ ރޭންޑަމް ސާމްޕަލިންގ ނަގަމުން ދަނިކޮށް
ފާއިތުވެދިޔަ 24 ގަޑިއިރު ތެރޭގައި ކޮވިޑް-19އަށް ރާއްޖެއިން އިތުރު 186 މީހުން ޕޮޒިޓިވްވެފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ހާމަކޮށްފައިވާ ތަފާސް ހިސާބުތައް ދައްކާ ގޮތުން ބުދަ ދުވަހުގެ ހަވީރު 06:00 އިން ފެށިގެން ބުރާސްފަތި ދުވަހުގެ ހަވީރު 06:00 އާއި ހަމައަށް ރާއްޖެއިން 4،765 ސާމްޕަލް ވަނީ ޓެސްޓު ކޮށްފައެވެ. އަދި އޭގެ ތެރެއިން 186 މީހުން ވަނީ ޕޮޒިޓިވްވެފައެވެ.
އެޗްޕީއޭގެ ތަފާސް ހިސާބުތައް ދައްކާ ގޮތުން ފާއިތުވެދިޔަ 24 ގަޑިއިރު ތެރޭގައި ޕޮޒިޓިވްވި މީހުންގެ ތެރެއިން 162 މީހުން ޕޮޒިޓިވްވެފައި ވަނީ މާލެ ސަރަހައްދުންނެވެ. އަދި އަތޮޅު ތެރެއިން 14 މީހަކު ޕޮޒިޓިވްވެފައިވާއިރު، ރިސޯޓުތަކުން 10 މީހަކު ވަނީ ޕޮޒިޓިވްވެފައެވެ.
އިތުރު 186 މީހަކު ކޮވިޑަށް ޕޮޒިޓިވްވުމާއިއެކު ރާއްޖެއިން މިހާތަނަށް 17،387 މީހަކު ވަނީ ބައްޔަށް ޕޮޒިޓިވްވެފައެވެ. އަދި އެކްޓިވް ކޭސްތަކުގެ ގޮތުގައި 2،243 ކޭސް ރިޕޯޓް ކޮށްފައިވާއިރު، 211 މީހަކަށް ހޮސްޕިޓަލުގައި އެޑްމިޓް ކޮށްގެން އަންނަނީ ފަރުވާ ދެމުންނެވެ. ރާއްޖެއިން މިހާތަނަށް 56 މީހަކު މި ބަލީގައި ނިޔާވެފައިވާއިރު، 15،081 މީހުން ވަނީ ބަލިން ފަސޭހަވެފައެވެ.
ރާއްޖެއިން ކޮވިޑް ފެންނަ މިންވަރު އިތުރުވެފައި ވަނީ ޖަނަވަރީ މަހުގެ 24 ވަނަ ދުވަހުންނެވެ. އަދި ސިއްހީ މާހިރުން ވަނީ މިއީ ކޮވިޑްގެ ތިންވަނަ ރާޅު ކަމަށް ބުނެފައެވެ. އެޗްޕީއޭއިން ހާމަ ކޮށްފައިވާ ތަފާސް ހިސާބުތައް ދައްކާ ގޮތުން ގުޅުމެއް ނެތް ކޭސްތަކުގެ އަދަދު އުޅެނީ 20 އިންސައްތައިގައެވެ. އަދި ފްލޫ ކްލިނިކް ތަކުން ޕޮޒިޓިވްވާ މީހުންގެ އަދަދު އުޅެނީ 4 އިންސައްތައިގަައެވެ.
ރާއްޖެއިން ކޮވިޑް-19ގެ ފުރަތަމަ ކޭސް ފެނުނުތާ 341 ދުވަސް ވެފައިވާއިރު ކޮވިޑްގެ ދެ ރާޅެއް ރާއްޖެއަށް ވަނީ ނަގައިފައެވެ. ކޮވިޑްގެ ފުރަތަމަ ރާޅާއިއެކު ރާއްޖޭގެ ބޯޑަރުތައް މާރޗް މަހު ބަންދުކުރިއިރު، ޖުލައި މަހުގެ 15 ވަނަ ދުވަހު ވަނީ ރާއްޖޭގެ ބޯޑަރުތައް އަލުން ހުޅުވާލައިފައެވެ. ރާއްޖެއަށް ކޮވިޑްގެ ތިންވަނަ ރާޅެއް ބިންދާލައިފައިވާއިރު، މިހާރު ޕޮޒިޓިވްވާ ކޭސްތަކުގެ އަދަދު އިތުރުވަމުން އަންނަނީ އައު ވޭރިއަންޓްގެ ސަބަބުން ކަމަށް އެޗްޕީއޭއިން ވަނީ ބުނެފައެވެ. އެއާއިއެކު ކޮވިޑުން ރައްކާތެރިވުމަށް އަޅާފައިވާ ފިޔަވަޅުތައް ވަނީ ހަރުކަށި ކޮށްފައެވެ.
